Isla del Coco—Su Historianan di Tesoronan Scondi

Dje coresponsal di Spierta! na Costa Rica

TIN un isla rond di 480 kilometer for dje costa zuidwest di Costa Rica cu ta conocí pa su historianan di tesoronan scondí. Algun hende ta kere cu Robert Louis Stevenson a basa su famoso buki Treasure Island (Isla di Tesoro) riba e storianan tocante tesoronan pirata derá ei.

Desde su descubrimentu den siglo 16, cartógrafonan i marineronan a duna e isla aki diferente nomber. Cerca nativonan di abla spañó e isla ta conocí awe como Isla del Coco.

Entre Costa Rica i e Islanan Galápagos, tin un área di tera bou di laman conocí como Cordiyera del Coco. Actividad volcánico riba e cordiyera aki a crea su único isla. E pida tera yen di punta skerpi aki ta e único isla principal den e parti tropical oost dje Océano Pacífico cu ta haña suficiente awaceru pa por tin un selva tropical di yobida. Tur aña e isla ta haña rond di 7.000 milimeter di awaceru!

E poëta ingles di siglo 18, Coleridge, a describí e apuro dje marinero di antigwedad cu tabatin “awa, awa, tur caminda, pero ni un solo gota pa bebe.” Sin embargo, durante e siglonan 17 i 18, e awanan dushi di Isla del Coco a sirbi como un oásis meimei di océano pa marineronan cu por a localisá e isla.

Un Leyenda di Tesoro Scondí

Den un era caminda comunicacion i comercio internacional tabata dependé di biahenan riba océano, robo armá riba laman ganchu, esta pirateria, tabata un menasa p’e sociedad. Piratanan tabata forma un peliger entre nan mes tambe.

Despues di a sakea un pueblo costeño chikitu of un barcu, nan tabata parti e mercancianan hortá entre e tripulacion. Pues, cada pirata tabatin e dilema con pa protehá su parti dje botin hortá pa su camaradanan no bai cuné. E método preferí tabata di sconde e tesoro na un lugá secreto cu e speransa di bin sak’é bek mas despues. E mapa di tesoro, caracterisá pa instruccionnan secreto cu esun cu a pint’é so tabata comprendé, a bira e clave pa haña e tesoro scondí.

Un dje leyendanan di Isla del Coco ta conta di un banda di pirata cu a logra asaltá vários barcu i stad a lo largu dje Costa Pacífico di América Central, lagando nan cu un inmenso cargamentu di oro i hoya. Como cu e isla tabatin un abundancia di awa dushi i un bon suministro di carni (a introducí porco einan na fin di siglo 18), e capitan dje barcu a planea pa usa Isla del Coco como su base di operacion.

Segun un version dje leyenda, a tuma henter un dia pa parti e botin. Tabata midi oro na pochinan yen. Debí cu e piratanan tabatin miedu pa nan camaradanan golos horta nan rikesa, nan tur a opta pa dera nan parti dje tesoro un caminda riba e isla. Usando cabuyanan pa subi e klipnan cu tin a lo largu dje costa dje isla, cada pirata a drenta den e selva tropical. Aunke algun di nan a confia riba nan memoria, otronan a bolbe bek cu mapanan cu nan so por a decifrá, i cu por a hiba nan bek na nan tesoro. Sin embargo, tur e esfuerso agotador aki tabata por nada. E leyenda ta sigui conta cu despues cu nan a warda nan pertenencianan, e piratanan a barca bai den nan galeon en busca di mas rikesa. Ora nan a yega n’e próximo haf, e capitan, kende tabatin e sospecho cu lo a bai tin un motin, a hisa bela bai despues di a manda e sospechosonan rebelde baha bai tera. El a spera cu nan lo a ser identificá como pirata i cologá, locual a hera di sosodé. Loke e no a anticipá ta cu su dos tripulantenan di rango mas haltu a logra cera un acuerdo cu e autoridadnan cu kier a capturá e capitan. Marina Británico a despachá un barcu ansioso pa bai tras dje galeon, loke a resultá den e captura i morto dje capitan i su tripulacion.

Atrabes dje último siglo, e leyenda aki a lanta e speransa di buscadónan di tesoro. Pero, esnan cu ta pensa di bai busca tesoro mester pensa dos bes promé cu nan emprendé un expedicion pa bai coba na Isla del Coco, manera e siguiente relato ta ilustrá. Un artículo publicá den The New York Times di 14 di augustus, 1892, a describí e búskeda di Capitan August Gisler pa descubrí un tesoro di oro, plata i hoya, balorá na 60 miyon dollar. Gisler su búskeda di tesoro a nificá cu lo e mester a isolá su mes di civilisacion i someté su mes na e condicionnan di mas severo riba e isla bandoná aki yen di selva. El a gasta por lo ménos 50.000 dollar di su mes sacu i a dedicá mas cu 19 aña ta busca e tesoro. Na 1908, Gisler a bandoná Isla del Coco, bankrut i abatí, sin a haña ningun tesoro apesar di tur su esfuersonan.

E echo cu Gisler no a logra descubrí tesoro riba e isla no a desanimá tur hende. Tabatin mas cu 500 expedicion organisá pa e isla. Segun e informacion disponibel, ningun a haña e rikesa dje leyenda.

Tesoronan di Naturalesa Riba Isla del Coco

Recientemente, un otro tipo di buscadó di tesoro a ser atraí pa bin Isla del Coco. Ecoturista i tambe naturalistanan i otro científiconan a ser atraí dor dje flora i fauna dje isla i e coleccion di tesoro di bida marino den e awanan rond di dje.

E isla ta cubrí cu un vegetacion tropical abundante. A identificá rond di 450 especie di insecto i artrópodo (geleedpotigen), aunke ta ser calculá cu tin mas cu 800 especie riba e isla. Tin 28 riu, cu ta lora pasa rond di tereno yen di baranca i ta basha for di klipnan imponente como watervalnan magnífico.

Un dje 97 especienan di para riba e isla ta e meuchi blancu. E tin e característica gracioso di keda zweef den haltu net riba cabes di hende, i ta parce di no tin miedu dje turistanan cu ta bishitá e isla. E tendencia encantador aki a duna e para aki su bijnaam na spañó espíritu santo, refiriendo na e relato bíblico di Jesus su bautismo.—Mira Mateo 3:16.

Hundu den e awanan rond di Isla del Coco tin un mundu cu ta abundá cu tesoronan natural. Entre e ecoturistanan cu ta bishitá e isla tin duikdónan, cu ta keda asombrá cu e concentracion grandi di tribon martin of tribon di crus. E tribon martin i e ala secu ta frecuentá e awanan aki i a yega di mira nan move den gruponan di entre 40 pa 50. Tambe duikdónan ta keda impresioná cu e claridad remarcabel dje awa. E despliegue di color dje piscánan tropical cu ta come lima i plankton ta algu deslumbrante pa nan.

Tradicionalmente e pais di Costa Rica semper a balorá su tesoronan biológico mashá. Actualmente, 18 porciento di su área riba tera ta protehá den un parke nacional i sistema di reservaat. Na 1978, a declará Isla del Coco parti dje sistema di parke ei, cu awor ta consistí di 56 área protehá den e pais. Na 1991 a extendé e área protehá cu 24 kilometer rond dje isla cu ta sirbi como un barera di proteccion. Ta un desafio pa patruyá i protehá e ambiente marino for di piscamentu comercial. Ecologistanan ta teme cu piscamentu sin restriccion lo por daña e ecosistema delicado den e mundu marino rond dje isla.

For di ántes te cu awor, Isla del Coco ta sigui ta conocí pa su leyendanan tocante piratanan aventurero i nan tesoro scondí. Ainda e ta intrigá i atraé buscadónan di tesoro for di tur parti di mundu. Sin embargo, e rikesa mas grandi dje isla ta sintá den su recursonan natural.

[Plachi Rekonosementu na página 23]

Potretnan riba página 23-4: Courtesy of José Pastora, Okeanos

[Plachinan na página 24]

E ala secu (1) i e tribon martin (2, 3) ta move den e awanan rond di Isla del Coco den gruponan di 40 pa 50