Yudansa pa Dolor di Pia

“MI PIANAN ta matá mi!” Bon, esaki ta un exageracion. No obstante, e problema cu dolor di pia ta suficiente serio na Merca pa duna trabou na miles di podoterapista.

Despues di a repasá mas cu 2.000 operacion di pia cu el a haci durante un periodo di 14 aña, Dr. Michael Coughlin, un ciruhano ortopédico, a descubrí algu sorprendente. E ta bisa: “Ta increibel. Mi a nota cu casi tur e operacionnan aki tabata riba hende muher.” Pakico hende muher ta mas incliná pa haña problemanan cu pia?

Loke Ta Pas, Loke Ta Moda i Bo Pianan

Un investigacion entre 356 hende muher a mustra cu casi 9 di cada 10 tabata bisti sapatunan cu, como promedio, tabata mas cu henter un size muchu smal pa nan pia! Parti dje problema ta sinta den e manera cu nan ta traha sapatu pa hende muher. E ciruhano ortopédico, Francesca Thompson, ta splica: “E sapaténan no ta usa e leis cu splits mas cu por haci un sapatu bini cu un hilchi smal i un punta mas hanchu.”a

Pues, ora di pas sapatu, hopi hende muher ta haña cu ora e punta ta sinta bon, e patras ta muchu hanchu; pero ora e hilchi ta bon, e punta ta primi. Otronan ta opta pa un hilchi cómodo i un punta cu ta primi, siendo cu e otro alternativa lo nificá cu e hilchi ta sali cu cada stap cu dal.

Ta hopi incómodo caba pa forsa e pia den un punta smal di sapatu. Pero riba dje diseñadónan ta hisa e hilchi dje sapatu un par di centimeter. Aunke hende ta haña esei elegante, un hilchi haltu ta pone tur e presion riba e bala di pia, i ta forsa e pia bai padilanti den un punta di sapatu cu ya caba por ta muchu smal. Segun Dr. David Garrett, un podoterapista: “No ta existí un sapatu hilchi haltu cu ta bon pa bo.” Algun ta bisa cu a lo largu hilchi haltu por daña e pianan, enkelnan, batat’i pia, rudia i lomba di esun cu ta bisti nan. Tambe nan por haci e músculonan i tendonnan di pia mas corticu, locual por aumentá e chens pa coredónan haña lesionnan serio.

E pia di un hende muher no ta adaptá bon na e abusu cu e ta sufri. Eigenlijk, atrabes di añanan, e parti dilanti dje pia ta hancha so e ta hancha—asta despues cu un hende bira adulto. Pero esei no ta e caso cu e hilchi. Dr. Thompson ta bisa: “E hilchi tin un wesu so, i e ta keda mes smal na edad di 84 cu e tabata na edad di 14.” Esaki ta hacié mas difícil ainda pa un hende muher haña un sapatu cu ta pas bon di hilchi te tenchi.

Tipnan pa Ora Bai di Compra

Ya cu loke ta na moda ta un desbentaha pa nan, con hende muher por evitá di haña dolor di pia? E contesta ta cuminsá den e sapateria. Algun experto ta recomendá lo siguiente:

● Haci compra na fin di dia, ora bo pianan ta un tiki mas hinchá.

● Pas tur dos sapatu—no un so.

● Haci sigur cu bo hilchi ta sinta bon i cu e punta ta suficiente largu, hanchu i haltu.

● Corda cu e sapateria por tin un tapijt hopi diki, locual por haci asta sapatu pertá parce cómodo pa un ratu.

● No cumpra sapatu verlak of charol ni di material sintético. Distinto di cueru suave of swède, e materialnan ei no ta span ora bo ta cana.

● Si bo cumpra sapatu hilchi haltu, purba hinca plantia di cueru pa mas comodidad. Purba wak si bo por evitá di bisti hilchi haltu henter dia i cambi’é pa sapatu cu hilchi mas plat de bes en cuando durante dia.

Ademas di tur esaki, corda semper cu un sapatu mester ta cómodo ora bo cumpr’é. Contrario na loke hopi hende ta kere, no ta berdad cu mester cana cuné pa poco tempu pa hanch’é. Dr. Coughlin ta spierta: “Nunca, nunca laga e bendedó convencé bo cu e sapatu pertá lo sinta mihó despues cu bo cana cuné. Ta bo pia ta esun cu lo keda lastimá.”

Pero kico bo mester haci si bo único opcionnan ta un dilanti pertá i un hilchi cómodo of un dilanti cómodo i un hilchi cu ta sali? Dr. Annu Goel, un podoterapista, ta bisa cu bo mester dicidí cua di dos ta mas fácil pa bo corigí. E ta bisa: “Tin dos manera pa haci esaki. Promé, bo por cumpra sapatu cu ta suficiente hanchu dilanti anto hinca plantia pa haci nan sinta mas net. . . . E di dos estrategia ta pa cumpra un sapatu cu un hilchi net i laga hancha e dilanti di sapatu. Pero por lo general esaki por solamente cu sapatu di cueru.”

Ya cu hopi hende muher ta cana mas of ménos 15 kilometer pa dia, nan lo haci bon di examiná nan sapatunan. Manera e revista American Health ta bisa: “Dor di trata bo pia cu mas consideracion—specialmente dor di bisti sapatu cu ta sinta bon—bo por prevení mayoria problema cu pia.”

[Nota]

[Plachi na página 26]

Cuater Problema Comun cu Pia

Wanete. Un wanete ta un bònkònkò na banda dje tenchi grandi. Ora wanete no ta hereditario, ta sapatu pertá of hilchi haltu por caus’é. Por aliviá e dolor temporalmente dor di pone algu cayente of ijs. Pero pa kita un wanete permanentemente, lo mester haci un operacion.

Tenchi krom. E causa di tenchinan cu ta bira krom bai abou por ta sapatunan cu ta pone muchu presion riba e parti dilanti dje pia. Lo por rekerí operacion pa corigí e deformacion.

Likdor. Bònkònkò den forma di papureshi [‘cone’] riba e tenchinan, causá dor di feilamentu i presion, tin biaha por ta e resultado di bisti sapatu muchu smal. Remedi di cas lo por trece alivio temporal, pero por lo general operacion ta necesario pa corigí e tenchinan deformá cu ta causa feilamentu.

Cayo. Capanan di cueru diki i morto ta protehá e pia di mas feilamentu. Por suavisá cayo dor di pone pia den awa lou cu Epsom salt. Pero no purba corta nan, ya cu esei lo por causa infeccion.

[Plachi Rekonosementu na página 26]

The Complete Encyclopedia of Illustration/J. G. Heck