Garabet Coroná Bailarinnan Colorido cu Kuif

DJE CORESPONSAL DI SPIERTA! NA KENYA

E GARABET coroná (Balearica regulorum gibbericeps) ta un dje paranan mas bunita na mundu. E ta un para mahestuoso cu un figura exkisito i colornan cu ta forma un beyesa di combinacion. Su haltura ta un meter i picu. Di punta pa punta su halanan ta inmenso, i e tin un nek largu i delicado, loke ta caracterisá otro tipo di garabetnan tambe.

E machu i hembra dje garabet coroná ta parce otro. E plumanan scur riba su lomba ta forma un rand atractivo pa e plumanan dje halanan cu ta blancu blancu na banda i cerca dje rabu ta bira color di oro. Otro plumanan dje halanan ta maron castaño scur.

E cara dje garabet coroná ta un delicia pa mira. Su bandanan di cara ta color di ivor, i rond di nan tin plumanan suave, color pretu den frenta i garganta. E wowonan ta un blou-cla bunita. N’e plumanan pretu na su garganta tin un lel largu corá bibu. E ta cologá mescos cu un hanger color scarlata ora e garabet rek su cabes bai padilanti. Loke ta destacá mas cu tur cos ta e plumanan fini espectacular color di oro riba su cabes, cu ta forma un magnífico corona simétrico. Ora rayonan di solo cai riba e plumanan fini i lombrante aki, nan ta briya manera oro. Tur e colornan bibu i contrastante aki ta bon balansá riba e dos patanan pretu largu i delegá.

Un dje zonidonan inolvidabel di Africa ta e gritu manera un trompet dje garabet coroná: O-wang! O-wang! O-wang! Por tende e gritu duru aki for di distancianan largu. Hopi bes un par di garabet ta grita huntu segun cu nan ta bula bai na of for dje palunan caminda nan ta reuní. Na cierto temporadanan di aña, garabetnan coroná ta bini huntu i nan por yega te na un total di 30 para, cu ta producí un cacofonia di zonido cu ta un delicia pa scucha.

Cuido di Mayornan

Ta parce cu garabetnan coroná tin un solo partner henter nan bida. Sa haña nan den hopi parti di Oost Africa, specialmente den áreanan cu tin moeras, unda nan ta traha neshi i ta cria nan yunan. E neshi ta un monton grandi cu forma di papureshi, trahá di yerba i richi. E ta percurá un plataforma riba cua e hembra ta pone dos of tres webu grandi, color blou-berde. Beurt pa beurt e machu i e hembra ta sinta riba e webunan, i denter di un luna e puitunan ta sali. E mayornan ta cooperá cu otro pa cria i cuida nan yunan tur na dons i sin miedu nan lo protehá nan chikitinnan indefenso.

E dieta principal di garabet coroná ta consistí di insecto, sapu, colebra chikitu i simia. Cu nan pianan largu i flacu i nan patanan grandi nan ta bati e suela, anto cualkier criatura chikitu cu bula sali e ora ei for dje yerba ta un cuminda pa nan.

Balet di Garabet

Garabet coroná ta bailarinnan entusiasmá i entretenedor. Nan ta bati nan halanan grandi i colorido i ta subi bai haltu verticalmente. Despues nan ta zweef lentamente bin bek tera como si fuera pegá na un parashut. Cu saltonan elegante p’aki p’aya, nan ta core i bula bai laira rond di nan pareha i ta manda nan cabes ariba-abou cu movementunan rápido i chistoso. Teniendo nan halanan grandi habrí, nan ta para regt pa mustra e bunita colornan dje plumanan di nan halanan.

Tin biaha un pareha ta troce nan nek, pon’é den un forma elegante i wak otro den wowo. Pik cu pik, nan ta saca un seri di nota abou i hol, como si fuera nan ta dunando otro un serenata. Despues nan ta lanta stret atrobe i ta cuminsá nan baile elaborá di nobo.

E Lucha pa Sobrebibí

Garabet coroná ta custumbrá basta lihé cu hende i ta fácil pa mansa. Debí na nan figura i color deleitabel i nan desplieguenan di baile entretenedor, nan ta popular den zoológiconan i ta masha cotisá pa dorna propiedadnan i hardinnan privá. Dor cu nan ta asina tantu pidí, no ta un sorpresa cu nan cantidad ta menguando drásticamente. Hende cu ta seca e moerasnan pa plantacion of bibienda i cu ta usa veneno i insecticida, loke ta contaminá lago i riunan, ta pone mas presion ainda riba e garabet coroná.

Lo ta lamentabel si un dia mester sosodé cu nos no por mira ni tende e espectacular garabet coroná mas. Sin embargo, Bijbel ta primintí cu pronto henter e tera lo ser hací nobo. (Compará cu 2 Pedro 3:13.) E ora ei, tur e habitantenan dje tera lo tin deleite pa semper den e obra maestro creativo dje Hacidor Divino, Jehova Dios, i den su bailarinnan colorido cu kuif.