Observando e Mundu

Un Generacion Desesperá

The Australian ta informá cu encuestanan cu a compará e actitud di hóbennan djawe entre 15 pa 24 aña cu hóbennan di dos generacion pasá a revelá cu uso di droga, crímen i suicidio a aumentá. Richard Eckersley, un analista estratégico i escritor científico, a resumí e sintimentunan di hopi hóben awe, bisando: “Hóbennan ta kere cu bida mester ta excitante i leuk, cu nan tin cu percurá pa nan mes, cu nan mester por scoge nan estilo di bida. Tambe nan ta kere cu gobiernunan no ta capas pa solucioná e problemanan di sociedad i cu nan mes ta impotente pa cambia condicionnan social.” Un mucha muher di 15 aña cu yama Shanu a bisa: “E poblacion ta aumentando i nos tin cu competí pa ménos cupo di trabou, ménos bibienda, ménos di tur cos.”

Potoshi den Stacion Espacial

Despues di 11 aña, esnan cu ta usa e stacion espacial ruso Mir ta siñando pa trata cu un problema cu hopi residente terenal ta masha conocí cuné: kico pa haci cu tur e potoshinan cu ta montoná. Den espacio caminda nada tin peso, mester mara cosnan necesario manera trahenan di espacio, kabelnan di computer, paketenan di cuminda, piesa i hermentnan na flur, plafon i muraya. Pero dor cu tin tantu potoshi cu a acumulá caba te na casi un pia haltu riba tur superficie, e murayanan dje Mir ta cerando. Ora lansa e Stacion Espacial Internacional nobo, un cos cu astronauta i cosmonautanan lo por haña den dje ta un aparato pa comprimí basura. Sin duda nan lo apreciá esei mashá, pasobra te cu awor, despues di a cena e residentenan di Mir mester a machicá e blekinan, pone esnan bashí bek den e pakinan di cuminda i mara nan na muraya.

Babun cu Gana di Bringa

Na cuminsamentu dje aña aki shofernan riba un dje careteranan mas druk di Sur Africa a haña nan enfrentá cu un peliger inusual: un yobida di piedra cu un trupa di macacu babun tabata tira. Segun the International Herald Tribune, e babunnan a sconde tras di cerunan riba e caminda entre Cape Town i Johannesburg pa atacá e automobilistanan. Maske no a raportá ningun herido ni accidente di auto, polis di tráfico a tira e babunnan bek cu piedra den un intento pa core cu e animalnan for dje caretera. Den e bataya di tiramentu di piedra entre polis i babun no tabatin ègt un partido ganadó.

Seminario Ta Suavisá Prohibicion Riba Sex

Segun e revista The Christian Century, un seminario dje Iglesia Episcopal na Virginia “a suavisá e prohibicion cu e tabatin pa 25 aña contra sex pafó di matrimonio i conducta homosexual pa studiantenan i e facultad.” E presidente dje hunta, Peter J. Lee, a bisa: “Laga nos ta franco, mayoria seminarista ta den nan 30 of 40 aña. No tin ningun madre superiora ni ningun inspeccion djanochi.” Den e último 11 añanan, inscripcion n’e seminario a baha cu 33 porciento. Ademas, den e último 25 añanan, e edad promedio dje studiantenan cu ta drenta e seminario a subi di 27 pa 40 aña. Lee a bisa: “Loke mi ta purbando pa haci como presidente dje hunta ta prevení cu un hóben di 28 aña ta keda sin ser admití, djis pasobra nos a descubrí cu e tin sex cu su namorada.”

Pasaboca i Putrimentu di Djente

Pa hopi tempu caba tabata conocí cu por combatí putrimentu di djente dor di come ménos cos dushi. Pero, segun e guia dental pa famia How to Keep Your Family Smiling (Con Laga Bo Famia Keda Smile), loke foral ta importante ta pa tene cuenta ki ora i cu ki frecuencia bo ta come pasaboca. Ora cos dushi of cu ta contené carbohidrato refiná bini den contacto cu e placa dental riba bo djentenan, un ácido ta forma. Na su turno, e foyeto ta bisa, e ácido aki ta atacá e enamel di bo djentenan pa rond di 20 minuut. Durante e tempu aki, buracunan den djente por cuminsá forma. Ademas, “esaki por sosodé cada bes cu bo come un cos dushi of un pasaboca cu ta contené carbohidrato.” Pues si bo ta bai come pasaboca, “mihó bo com’é den un solo biaha,” exponiendo bo djentenan asina un biaha so n’e ácido. Pero si bo keda ches riba e mésun pasaboca pa mas tempu, e ácido ta atacá bo djentenan pa mas tempu. Dentistanan ta recomendá pa skeiru djente por lo ménos dos bes pa dia pa yuda prevení putrimentu di djente. I, no lubidá di limpia tur dia meimei bo djentenan cu hilu dental.