Observando E Mundu

Contaminacion i Cancer Infantil

Despues di a analisá un estudio di 27 aña bou di 22.400 mucha británico, un tim di epidemiólogo a descubrí cu muchanan cu a nace denter di 5 kilometer di un fuente di contaminacion tabatin 20 porciento mas rísico di muri di leukemia i otro cancer infantil compará cu otro muchanan. Ser exponé na contaminacion den aire ta “e mecanismo cu mas probablemente” a causa aumento den casonan di cancer infantil, The Times di Londen ta informá. E contaminadónan responsabel a parce di ta humanan di gasolin of otro kímiconan orgánico volatil cu plantanan industrial ta benta den aire, manera refinerianan di zeta, fábricanan di auto, plantanan di electricidad no-nuclear, fábricanan di stal i di cement. E estudio ta mustra tambe cu entre e muchanan cu a nace denter di 4 kilometer for di careteranan i spoorban, tin mas morto debí na cancer. Probablemente e causantenan ta gasolin i diesel, segun e autornan dje raport.

Religion na Brazil

ENI Bulletin ta informá cu un encuesta recien ta mustra cu “99 porciento dje brazileñonan ta kere den Dios.” Segun e encuesta bou di casi 2.000 hende, 72 porciento a profesá di ta católico, 11 porciento a bisa cu nan ta protestant i 9 porciento no a profesá di ta forma parti di un religion en particular. E resto a sigui religionnan brazileño i afro-brazileño. ENI ta bisa: “Ora a puntra nan si nan a bai misa of un edificio religioso durante e fin di siman cu a pasa, 57 porciento a bisa cu no.” Solamente 44 porciento ta kere den castigu eterno. Aunke 69 porciento dje brazileñonan ta kere den shelu, solamente 32 porciento ta spera di bai ei.

Ken Ta Tene e Control Remoto?

Na Italia, investigadónan n’e EURISPES (Instituto pa Estudionan Político, Económico i Social) a publicá recientemente e resultadonan di un estudio riba custumbernan di wak television. A entrevistá casi 2.000 famia italiano. Un dje preguntanan tabata ken den e famia mas tantu ta tene i ta usa e control remoto dje television, cu un artículo di korant a yama e bara di autoridad moderno den e famia. Den mayoria caso a mencioná e tata como esun cu tin control. Muchanan a bini na di dos lugá como esnan cu ta dicidí ora ta trata di cambia canal. E mama a bini na último lugá den e lucha pa poder den famia pa tene e control remoto.

Sex Entre Tiener

Segun e korant nigeriano Weekend Concord, un estudio recien a mustra cu “adolesentenan nigeriano ta entre esnan sexualmente mas activo na mundu.” Un 68 porciento dje mucha hombernan i 43 porciento dje mucha muhernan entre e edadnan di 14 pa 19 a admití cu nan tabatin relacion “djis despues cu nan a drenta nan pubertad.” Esaki a hiba na hopi embaraso indeseá. Un otro estudio ta mustra cu “71 porciento di tur e mortonan entre mucha muhernan bou di 19 aña na Nigeria tabata relacioná cu complicacionnan di aborto,” segun Concord.

Crísis den Custumber di Laba Man

Un artículo recien den e korant médico frances Le Quotidien du Médecin a resaltá un tendencia hopi preocupante cu ta parce di ta aumentá—esun di no laba man promé cu come of despues di usa w.c. Segun Dr. Frédéric Saldmann, e simpel falta aki den higiena personal ta forma un rísico grandi pa problema cu cuminda contaminá i ta parce di ta un problema hopi comun. E artículo ta cita un estudio cu a haña cu bakinan di pinda den barnan ta contené rastronan di orina di 12 diferente hende. Un otro estudio den un scol mericano a revelá cu ora un maestro a supervisá labamentu regular di man, e ausencia di muchanan cu ta keda cas pa motibu di problemanan di digestion a baha cu 51 porciento i esnan cu ta ausente pa motibu di problemanan respiratorio a baha cu 23 porciento. E artículo ta concluí enfatisando e importancia di siña muchanan reglanan básico asina di higiena desde infancia.