E Punto di Bista Biblico

Con Bo Por Teme un Dios di Amor?

“FELIS TA E HOMBER CU TA TEME JEHOVA.”—Salmo 112:1.

SI “Dios ta amor,” manera Bijbel ta describié, pakico nos mester tem’é? (1 Juan 4:16) Generalmente, hende ta mira amor i temor como dos cos cu no ta bai cu otro. Pues, ki papel temor mester hunga den nos relacion cu Dios? Pakico teme un Dios di amor? Si nos wak mas djacerca con Bijbel ta usa e palabra “temor,” nos lo por haña un mihó comprendimentu dje asuntu aki.

Den mayoria idioma un solo palabra por tin vários matis di nificacion, dependiendo dje contexto. Por ehempel, den algun idioma bo por bisa: “Mi stima bolo,” i tambe: “Mi stima mi yunan.” Tin un gran diferencia den e intensidad i e tipo di amor cu ta ser expresá. Di igual manera, Bijbel ta papia di diferente tipo di temor. Ora e ta usa e palabra en coneccion cu adorá Dios, e no ta referí na teror, miedu of un sentido di cu lo bai bin castigu. Mas bien, e temor di Dios ta inspirá sintimentunan sano: temor reverencial i respet profundo. E emocionnan noble aki ta bai huntu cu amor pa i un atraccion na Dios, no un sintimentu di hui bai for di dje of sconde p’e.

E temor di Dios ta core cu miedu insaludabel cu ta poné bo krimp den otro. En cuanto e homber cu ta teme Dios, e salmista a skirbi: “Lo e no tin miedu ni di mal noticia. Su curason ta constante, confiá den Jehova.” (Salmo 112:7) Ningun menasa di hende malbado ni di Satanas mes por ta mas fuerte cu nos respet profundo i reverencia pa Jehova. (Lucas 12:4, 5) Ni tampoco nos no mester tin miedu di acercá Dios den oracion. Mas bien, den e contexto aki, ‘amor ta saca miedu afó.’—1 Juan 4:18.

Shelu i Dios Su Grandesa

Rey David di pasado tabata un homber temeroso di Dios. El a yena cu temor reverencial ora el a contemplá e bunitesa i complehidad dje creacion. El a sclama: “Lo mi alabá bo pasobra di un manera cu ta inspirá temor mi ta trahá maraviyosamente. Bo obranan ta maraviyoso, manera mi alma sa masha bon.” (Salmo 139:14) Mirando e shelu djanochi, el a sclama: “Shelunan ta declarando e gloria di Dios.” (Salmo 19:1) Bo ta kere cu David a keda spantá dor dje experencia aki? Al contrario, el a conmov’é pa canta alabansa na Jehova.

Awe cu hende sa muchu mas tocante espacio, nos tin mas motibu ainda pa ta den temor reverencial. Recientemente astrónomonan, usando e Telescop Hubble Space, a wak mas profundo den espacio cu ningun otro hende promé cu nan. Nan a selectá un parti di espacio cu a parce di ta bashí ora mir’é cu telescopnan riba tera i a enfocá e Hubble riba un área solamente mes grandi cu un pipita di santu tené na un distancia di un brasa. E potret cu nan a saca a resultá di ta yen, no cu streanan individual, sino cu galaxianan—sistemanan inmenso cu ta consistí di miles di miyones di strea—hamas bisto pa hende!

E magnitud, misterio i maraviya dje universo ta inspirá temor reverencial den un observadó atento. Sin embargo, maraviyanan asina ta solamente un refleccion dje gloria i poder dje Creador. Bijbel ta yama Jehova Dios “e Tata dje lusnan celestial,” i ta bisa nos cu e “ta conta e cantidad di strea; e ta yama nan tur na nan nomber.”—Santiago 1:17; Salmo 147:4.

Por mira e inmensidad dje universo tambe den e cantidad di tempu cu sucesonan celestial ta tuma. E lus dje galaxianan cu nan a mira cu e Telescop Hubble Space a biaha dor di espacio pa miles di miyones di aña! Acaso e recien i e chikitu cu nos ta, na comparacion cu e permanencia dje universo, no mester haci nos sinti temor reverencial profundo pa Esun cu a traha e streanan? (Isaías 40:22, 26) Ora nos realisá cu e Dios cu a crea tur esaki ‘ta tene cuenta cu hende mortal i ta percurá p’e,’ nos aprecio pa nos Creador ta bira mas profundo i nos ta haña e deseo di conoc’é i agrad’é. (Salmo 8:3, 4) E respet i aprecio grandi ei ta loke Bijbel ta yama temor di Dios.

Un Dios Pordonador

Nos tur ta imperfecto. Asta ora nos ta trata na haci loke ta corecto, nos ta peca sin cu nos kier. Ora esei sosodé, nos mester tin teror di perde Dios su fabor? E salmista a skirbi: “Si ta eror ta loke bo ta vigilá, O Jah, O Jehova, ken lo por keda pará? Pasobra cu bo tin e berdadero pordon, pa asina hende tem’é bo.” (Salmo 130:3, 4) E echo cu e “Magnífico Hacidor” ta asina bondadoso i pordonador ta inspirá aprecio profundo i reverencia den su adoradónan.—Isaías 54:5-8.

E temor di Dios ta motivá nos pa haci loke ta bon i tambe pa frena nos mes di haci loke Dios ta bisa ta malu. Por compará nos relacion cu nos Tata celestial cu esun di un bon tata humano cu su yunan. Tin biaha, yunan por lubidá pakico nan tata ta prohibí nan di hunga riba caminda. Tog, ora nan sinti e impulso di core bai tras di un bala cu a bai riba caminda, nan ta wanta ora nan corda e prohibicion di nan tata—por ta scapando nan bida di morto. Mescos tambe, un adulto su temor pa Jehova lo por fren’é di cometé un acto cu lo por ruiná bidanan—di su mes i di otronan.—Proverbionan 14:27.

Miedu pa Dios Su Huicio

Na contraste cu esaki, un hende kende su concenshi no ta fren’é di desagradá Dios tin motibu pa tin miedu den un manera hopi diferente. Mescos cu gobiernunan humano ta castigá elementonan criminal, Dios tin e derecho di actua contra malechornan boluntario i no-repentí. E echo cu Dios ta permití maldad temporalmente a pone cu algun hende a sigui un curso robes. Pero Bijbel ta mustra masha cla cu pronto un dia lo e kita tur e elementonan malbado for di riba tera. (Salmo 37:9, 10; Eclesiástes 8:11; 1 Timoteo 5:24) E malbado no-repentí tin motibu pa tin miedu dje castigu di Dios. Sin embargo, esaki no ta e tipo di temor cu Bijbel ta bisa cu nos mester tin.

Mas bien, Bijbel ta asociá e temor di Jehova cu cosnan bunita den bida—canto, goso, confiansa, sabiduria, bida largu, prosperidad, speransa i pas, djis pa mencioná algun so.a Si nos sigui cana den temor di Jehova, nos lo disfrutá di bendicionnan asina pa semper.—Deuteronomio 10:12-14.

[Nota]

[Plachi Rekonosementu na página 30]

Courtesy of Anglo-Australian Observatory, photograph by David Malin