Atake Celebral!

UN DJE causanan principal di morto i incapacidad crónico den e mundu occidental industrialisá ta atake celebral. E palabra “atake” mes ta implicá con repentino e ta sosodé. Un momento, bo por ta sinti bon-bon, i e próximo momento, bo ta sinti manera ta un rayo di weerlicht a dal bo—un atake celebral fuerte cu por cambia bo bida di golpi i dramáticamente. E ta mancá bo di un manera cruel: e por lagá bo keda muda, confundí bo emocionnan, cambia bo personalidad i bo facultad di percepcion, i por bentá bo den un lucha aparentemente infinito pa bolbe na e bida normal cu abo i bo famia na un tempu a conocé.

Tuma por ehempel Ellen Morgan.a Diarason, Ellen tabata un señora salú i activo di 64 aña. Diahuebs, haciendo compra cu su casá, di ripiente Ellen no por a papia mas i su cara a desfigurá. Su curpa a bira swak i e tabata tambaleá como si fuera e tabata fuma. Ellen tabata hañando un atake celebral fuerte!

Despues dje atake, Ellen tabata asina incapacitá cu asta e cosnan di mas simpel, manera baña of bisti paña, e no por a haci. Siendo cu e no por a skirbi, brei ni cose, el a hañ’é plagá cu atakenan di yoramentu incontrolabel i fatiga abrumador. Atrabes di tur esaki, e facultad di pensa di Ellen no a ser afectá; sin embargo, e tabata haña bergwensa ora e sinti cu otronan a consider’é como kens. Mas despues, Ellen a splica: “Poco hende ta realisá con e shok dje cambio repentino aki ta afectá bo emocionalmente i sicológicamente. Casi mi a sinti cu tabata e fin di mi existencia como persona.”

Kico ta causa un atake celebral? Tur hende cu haña un atake celebral ta ser afectá mescos? Con esnan cu a sobrebibié a logra trata cu e malesa aki? Con nan famianan ta haci? Kico nos tur por haci pa yuda? Spierta! ta examiná e preguntanan aki i ta poné bo den contacto cu bida di esnan cu tabata víctima di un atake celebral i nan famia cu ta lucha huntu cu nan.

[Nota]