Salú Perfecto Ta Djis un Soño?

BO A yega di ta hopi malu of pasa den un operacion pisá? Si ta asina, probablemente bo ta apreciá bida mas tantu awor. Pero sea cual sea bo condicion físico, bo ta kere cu ta posibel pa hende gosa di un salú perfecto? Esaki por parce algu irealístico en bista dje prevalencia di enfermedadnan debilitante manera cancer of malesa di curason. Sí, mayoria di nos ta bira malu de bes en cuando. Pero, ser completamente bon no ta djis un soño.

Dios a crea hende pa gosa di excelente salú, no pa lucha cu malesa i morto. P’esei, pa caba cu malesa i morto, Jehova a percurá e base pa nos haña salú perfecto i bida eterno mediante e sacrificio di rescate di Cristo Jesus. “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Esnan cu lo biba pa semper den Dios su mundu nobo primintí lo no lucha cu problema di salú of behes. Si ta asina, kico lo sosodé cu enfermedad?

Alivio for di Malesa

E manera cu Jesucristo a cura enfermonan ta duna nos un idea. Tocante e curacionnan ei nan a bisa: “E ciegunan ta mira atrobe, i e cohonan ta cana rond, e leprosonan ta ser hací limpi i e surdunan ta tende, i e mortonan ta ser lantá, i esnan pober ta haña e bon nobo declará na nan.” (Mateo 11:3-5) Sí, tur esnan cu un hendikep cu a acercá Jesus “a bira completamente bon.” (Mateo 14:36) E consecuencia di esei tabata cu “e multitud a keda asombrá ora nan a mira e mudanan papia i e cohonan cana i e ciegunan mira, i nan a glorificá e Dios di Israel.”—Mateo 15:31.

Sí, aunke ningun hende awe por haci e tipo di curacionnan aki, nos por tin sigur cu bou dje gobernacion di Dios, humanidad lo ser elevá na perfeccion, curá di tur malesa mental i físico. Dios su promesa ta pará na Revelacion 21:3, 4: “Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.”

Djis imaginá bo un mundu unda no tin mester mas di ningun fábrica di remedi ni ningun hospital, nada di cirugia ni terapia! Ademas, den e Paradijs restorá, depresion i enfermedadnan mental lo ta cos di pasado. Lo ta un berdadero deleite pa ta na bida; i felicidad lo ta un sintimentu permanente. Sí, e poder infinito di Dios lo activá e curpa su procesonan regenerativo, i e beneficionan dje rescate lo eliminá e efecto debilitador di picá. “Ningun residente lo bisa: ‘Mi ta malu.’ ”—Isaías 33:24.

Ki un speransa maraviyoso—gosa di un salú perfecto, físico i spiritual, bou dje Reino di Dios! Mantené awor un estilo di bida balansá i saludabel, miéntras bo ta spera cu anhelo riba e bendicionnan di Dios su mundu nobo. Cu Jehova ‘yena henter bo bida cu loke ta bon, i cu bo hubentud sigui renobá su mes mescos cu esun di un águila’!—Salmo 103:5.