For Di Nos Lectornan

Divorcio Mi ta skirbiendo pa expresá mi mas sincero gradicimentu pa e seri “Cua Ta e Punto Punto di Bista Balansá di Tutela?” (8 di december 1997) Despues di mi divorcio, tabatin problema pa determiná cu ki frecuencia mi ex-casá tabatin mag di bishitá nos yu muher. Mi esposo actual tabata haña cu nan mester a nengu’é e derecho di bishita mas tantu posibel. Pero e Spierta! a aclará e asuntu aki dor di pone e bienestar dje mucha na promé lugá i no e emocionnan dje mayornan of padrasonan.

L. C., Gales

Nan a kita mi yu muher, mi único yu, for di mi ora corte a dicta cu e mester biba cerca su tata. P’esei a parce manera e artículo tabata skirbí pa mi. Ta un bendicion pa sa cu Jehova ta duna nos nos “alimento n’e debido tempu.”—Mateo 24:45.

D. B., Suisa

Cu lágrima na wowo mi a gradicí Jehova ora mi a mira e kaft di Spierta!, ya cu pa dos aña largu mi tabata den un lucha pa tutela pa mi yunan. Esei tabata un experencia hopi emocional. Mi ta apreciá mashá e manera informativo i bon pensá cu boso a presentá e tópico aki.

A. F., Merca

Tempu mi tabata apénas un mucha, mi mayornan a divorciá. Mi a sintí mi manera partí den nan dos. P’esei, boso no por imaginá cuantu mi a gusta e artículonan tocante e tema aki. Mi ta profundamente gradicidu cu boso a trata e problema aki desde e punto di bista dje yunan.

K. D., Yugoslavia

Parkenan Alpino Mi kier a gradicí boso masha tantu mes pa e artículo “E Bunitesa di Parkenan Nacional Alpino.” (8 di december 1997) Pa mi ta franco, mi a keda sin lesa artículonan anterior tocante naturalesa. Pero ora mi a wak e potretnan magnífico den e artículo, mi a dicidí di les’é. Ora mi a caba, mi a realisá cu mi a perde hopi dor di a keda sin lesa tur e otro artículonan tocante naturalesa.

T. M., Ucrania

Mi kier a gradicí boso pa e interesante artículo. Ya cu mi gusta ceru i fotografia, mi tabatin e placer di a saca potret di tur e animalnan describí den e artículo aki. Sin embargo, mi ta kere cu tabatin un eror den e palabranan cu a compañá e potret mas ariba na página 15. Mi ta kere cu e animalnan riba e potret ei no ta gems, sino ibex hembra.

M. D. M., Italia

Nos kier a gradicí nos lector cu el a mira e eror aki.—RED.

Homosexualidad Mi tabata excitá ora mi a ricibí mi Spierta! di 8 di december 1997, cu e artículo “E Punto di Bista Bíblico: Cristiannan Mester Odia Homosexualnan?” E artículo tabata bon skirbí i a trata e tópico hopi delicado aki di un manera balansá.

L. W., Merca

Laf Mi a duna mi supervisor un ehemplar dje artículo “Bo Ta Haña Bo Trabou Laf?” (8 di januari 1998) E siguiente mainta na trabou, el a bisá mi cu e artículo tabata excelente. El a pas’é rond pa algun di mi coleganan i a laga un copia dje artículo den nos zitkamer. Boso a skirbi e artículo net na ora!

V. L., Merca

Danki pa e informacion interesante. Mi tin 17 aña di edad i tin un trabou full-time. E artículo a duna conseho excelente tocante con pa haci mi trabou mas placentero. Danki!

E. A., Italia

Masha, masha danki pa e artículo. Actualmente mi ta den mi di dos aña como aprendis. Mi tabata pasando dor di un periodo cu mi a perde smak den mi trabou, i no tabata gust’é mas. E artículo a yudá mi gusta mi trabou atrobe.

I. F., Alemania