E Punto di Bista Biblico

E Balor di Ta Bo So

NA UN ocasion Jesus “a subi e ceru su so pa haci oracion. Maske tabata lat, e tabata ei su so.” (Mateo 14:23) Na un otro ocasion, “ora di dia a habri, el a sali bai un lugá solitario.” (Lucas 4:42) E textonan aki ta mustra cu Jesucristo a busca pa ta su so de bes en cuando, i a apreciá e ocasionnan aki mashá.

Bijbel ta duna otro ehempelnan di hombernan cu, mescos cu Jesus, a atesorá momentonan solitario. Tabata na momentonan asina den anochi cu e salmista a meditá riba e grandesa di su Magnífico Creador. Anto den e caso di Jesucristo, ora el a caba di haña e noticia dje morto di Juan Bautista, el a bai “un lugá solitario pa ta su so.”—Mateo 14:13; Salmo 63:6.

Awe, cu tur e bochincha di bida moderno, momentonan solitario, sea cu un hende ta scoge esei of no, no ta un opcion cu tin prioridad haltu. Bo ta corda cua ta e último biaha cu bo a pasa tempu bo so? Un señora hóben casá a bisa: “Den mi bida, nunca mi tabata mi so.”

Pero di berdad ta necesario pa ta nos so? Si ta asina, con nos por beneficiá di momentonan ketu i haña recompensa? I ki papel ekilibrio ta hunga den busca momentonan solitario?

Momentonan Solitario—Pakico Balioso?

Bijbel ta bisa nos cu Isaac, un homber di Dios di antigwedad, a busca pa ta su so, “den cunucu rond dje tempu ora anochi tabata cera.” Pa haci kico? “Pa meditá,” e ta bisa. (Génesis 24:63) Segun un diccionario, meditá ta “pensa den un manera sosegá of refleccioná riba asuntunan.” E ta “encerá un periodo di concentracion serio i largu.” Pa Isaac, cu tabata na punto di haña responsabilidadnan pisá, meditacion sin distraicion asina lo por a yud’é clara su mente, organisá su pensamentunan i evaluá su prioridadnan.

Un experto di salú mental ta bisa cu tanten ‘cu nos mantené soledad denter di límitenan, e ausencia di otronan ta haci posibel pa organisá nos pensamentunan i concentrá mihó.’ Hopi hende lo por bisa di experencia cu esaki por ta refrescante, fortalecedor i saludabel.

Entre e frutanan deseabel di meditacion ta cu bo ta bira un persona cauteloso i yen di perspicacia. Esakinan ta cualidadnan cu ta hiba na abla i accionnan discreto, cu na nan turno, ta hiba na relacionnan humano armonioso. Por ehempel, un persona cu ta siña meditá, por siña tambe ki ora pa keda ketu. En bes di papia sin pensa, e ta considerá promé ki efecto su palabranan lo por tin. Un escritor inspirá di Bijbel ta puntra: “Bo a contemplá un homber cu ta purá cu su palabranan?” E ta sigui bisa: “Tin mas speransa pa un estúpido cu p’e.” (Proverbionan 29:20) Cua ta e remedi pa e uso sin pensa aki dje lenga? Bijbel ta bisa: “E curason dje hustu ta meditá pa duna un contesta.”—Proverbionan 15:28; compará cu Salmo 49:3.

Pa un cristian, meditacion den kietud na momentonan solitario ta un factor vital pa crece na madures spiritual. E palabranan di apostel Pablo ta masha al caso: “Refleccioná riba e cosnan aki; sea intensamente ocupá den nan, pa bo progreso por ser manifestá na tur hende.”—1 Timoteo 4:15.

Usa Momentonan Solitario pa Hala Mas Cerca di Dios

Un autor ingles a yega di bisa: “Momentonan solitario ta momentonan di audiencia cerca Dios.” Tabatin biaha cu Jesus a sinti e necesidad di apartá di otro hende i drenta den presencia di Dios su so. Un ehempel di esaki ta describí den Bijbel: “Mainta trempan, miéntras cu tabata scur ainda, el a lanta sali bai pafó na un lugá solitario, i ei el a cuminsá haci oracion.”—Marco 1:35.

E Salmonan ta haci vários mencion di meditacion riba cosnan di Dios. Papiando cu Jehova, Rey David a bisa: “Mi ta meditá riba bo.” Asaf tambe ta bisa algu similar: “Siguramente lo mi meditá riba tur bo actividad, i den bo tratonan lo mi interesá mi mes intensamente.” (Salmo 63:6; 77:12) Pues, meditá riba Dios su trato i atributonan ta trece recompensanan ricu. E ta aumentá nos aprecio pa Dios, loke ta pone cu nos ta hala mas cerca di dje.—Santiago 4:8.

Moderacion Ta Necesario

Claro cu nos mester ta moderá den busca pa ta nos so. Nos lo por describí momentonan solitario como un bon lugá pa bishitá, pero un lugá peligroso pa keda ei. Isolá bo mes muchu ta bai contra e necesidad humano básico di asociá, comunicá i expresá amor. Ademas, por compará isolacion cu un tera den cua e mal yerbanan di bobedad i egoismo ta crece. E proverbio bíblico ta spierta: “Un persona cu ta isolá su mes lo busca su mes anhelo egoista; contra tur sabiduria práctico lo e lanta.” (Proverbionan 18:1) Pa ta balansá den busca momentonan solitario, nos mester reconocé e peligernan di isolacion.

Mescos cu Jesus i otro hombernan spiritual di tempu bíblico, cristiannan djawe ta atesorá e momentonan cu nan por ta nan so. Ta cierto cu ora nos tin hopi responsabilidad i preocupacion, ta masha difícil pa haña tempu i oportunidad pa ta nos so pa meditá. Pero mescos cu ta e caso cu tur cos di berdadero balor, nos tin cu ‘cumpra e tempu oportuno.’ (Efesionan 5:15, 16) E ora ei nos lo por bisa, mescos cu e salmista: “Laga e dichonan di mi boca i e meditacion di mi curason bira agradabel dilanti bo, O Jehova.”—Salmo 19:14.