Hóbennan Sa Puntra . . .

Di con Mi Mester Biba Sin Mi Mayornan?

“Con bida tabata sin mi mayornan? Wel, mi por bisa cu e tabata basta tristu pa hopi motibu. Ta masha difícil pa crece sin e cariño i amor di bo mayornan.” —Joaquín.

“E momentonan mas difícil pa mi tabata e dianan cu mayornan mester a bin scol pa firma raport. Mi tabata sinti mi hopi tristu i so. Ainda mi ta sinti asina tin biaha.” —Abelina, 16 aña.

UN TRAGEDIA di nos tempu ta e miyones di hóbennan cu ta lanta sin mayor. Den Oost Europa miles a keda huérfano pa via di guera. Na Africa e epidemia di AIDS a causa un devastacion similar. Tin mucha cu nan mayornan a gewoon bandoná nan. Guera of desaster natural a separá famia for di otro.

Situacionnan asina tabata comun asta den tempu bíblico. Por ehempel, hopi bes e Scritura ta mencioná e situacion pertá di huérfanonan. (Salmo 94:6; Malakías 3:5) E tempu ei tambe guera i otro circunstancianan trágico a separá famianan for di otro. Asina Bijbel ta conta di un banda di asaltante sirio cu a ranca un mucha muher for di su mayornan bai cuné.—2 Reynan 5:2.

Kisas abo ta un dje miyones di hóbennan cu tambe ta sin su mayornan. Si esei ta e caso, bo sa precis con doloroso un situacion asina por ta. Di con esaki a sosodé cu bo?

No Ta Bo Falta

Bo sa puntra bo mes si ta castigá Dios ta castigá bo? Of kisas bo sa sinti bo amargamente rabiá cu bo mayornan debí cu nan a muri, como si fuera ta pa malu nan a hacié. Pa cuminsá, bo por ta sigur cu Dios no ta rabiá cu bo. Tampoco bo mayornan no a bai laga bo deliberadamente. Morto ta un tragedia cu ta parti di bida di hende imperfecto, i tin biaha ta sosodé cu mayornan ta muri miéntras nan yunan ta chikitu ainda. (Romanonan 5:12; 6:23) Evidentemente, Jesucristo mes a pasa dor dje experencia dje morto di su padraso stimá, Josef.a Esei sigur no tabata debí na ningun picá di Jesus.

Ademas, no lubidá cu nos ta bibando den un “tempu crítico, duru pa trata cuné.” (2 Timoteo 3:1-5) Violencia, guera i crímen a mata miyones di hende pa loco den e siglo aki. Otronan a bira víctima di “tempu i suceso imprevisto” cu por sosodé cu cualkier hende. (Eclesiástes 9:11) Maske con doloroso e morto di bo mayornan por ta, corda cu no ta bo falta. En bes di tormentá bo mes cu sintimentu di culpa of laga pena aplastá bo, aceptá e consuelo di Dios su promesa di resureccion.b Jesus a predicí: “No straña boso riba esaki, pasobra e ora ta bini den cua tur esnan cu ta den grafnan conmemorativo lo tende su bos i lo sali.” (Juan 5:28, 29) Abelina, mencioná den e introduccion dje artículo aki, ta bisa: “Loke a yuda ami masha hopi tabata mi amor pa Jehova i e speransa di resureccion.”

Pero kico si bo mayornan ta na bida, pero a bandoná bo? Dios ta rekerí pa mayornan cria nan yunan i cuida nan. (Efesionan 6:4; 1 Timoteo 5:8) Sin embargo, ta tristu cu tin mayor cu a mustra un falta escandaloso di “cariño natural” pa nan yunan. (2 Timoteo 3:3) Pa otronan, abandono ta e resultado final di pobresa extremo, adiccion na droga, encarcelacion of alcoholismo. I sí, tin mayornan tambe cu ta bandoná nan yunan djis pa egoismo. Sea cual sea e motibu, ta duru pa ta separá di bo mayornan. Pero esaki no ta nificá cu tin algu malu cu bo, ni cu bo tin cu tormentá bo mes cu sintimentu di culpa. No, ta bo mayornan tin cu duna cuenta na Dios pa e manera con nan a trata bo. (Romanonan 14:12) Claro cu si bo mayornan a haña nan ta separá di bo pa motibu di circunstancianan fuera di nan control, manera desaster natural of malesa, e ora ei no ta niun hende su falta! Semper tin e speransa cu boso lo haña otro atrobe, asta si e speransa ei tin biaha por parce hopi chikitu.—Compará cu Génesis 46:29-31.

Un Experencia Traumático

Pero, miéntras tantu, por ta bo ta haña bo den hopi problema serio. Un estudio cu e Fondo di Nacionnan Uní pa Mucha a haci, yamá Children in War (Mucha den Guera), ta revelá: “Mucha lagá nan so ta esnan mas vulnerabel, ta esnan cu . . . ta enfrentá e obstáculonan mas duru pa sobrebibí, cu ta falta e apoyo pa por desaroyá normal i cu ta sufri di abusu. Separacion for di mayornan por ta un dje pérdidanan mas traumático pa un mucha.” Kisas abo ta haña bo ta lucha cu sintimentunan di depresion i frustracion.

Tuma Joaquín, mencioná mas promé. Su mayornan a separá for di otro i despues a bandoná e i su rumannan. E tempu ei e tabatin un aña so. Su ruman muhernan mas grandi a cri’é. E ta splica: “Mi tabata puntra hopi bes di con nos no tabatin mayor mescos cu mi amigunan. Anto ora mi tabata mira un tata hunga cu su yu, mi tabata deseá pa e tabata mi tata.”

Con pa Haña Yudansa

Pa difícil cu por ta pa crece sin mayor, esei no kier men cu bo ta destiná pa bira un fracaso. Cu yudansa i apoyo, bo por sobrebibí i asta desaroyá bon. Kisas bo ta haña esaki difícil pa kere, foral si bo ta den e agonia di tristesa i pena. Sin embargo, bo mester realisá cu e sintimentunan ei ta normal i cu nan lo no tormentá bo pa semper. Na Eclesiástes 7:2, 3, nos ta lesa: “Bai na e cas di luto ta mihó cu bai na e cas di bankete . . . Iritacion ta mihó cu harimentu, pasobra pa motibu cu e cara ta cerá, e curason ta bai sinti mihó.” Sí, ora un tragedia teribel sosodé, ta masha normal i asta bon pa yora i pena. Lo bo ripará cu ta bon tambe pa bo confia un amigu comprensivo of un miembro maduro dje congregacion i papia cuné di bo dolor.

Por ta bo ta sinti mas gana di isolá bo mes. Pero Proverbionan 18:1 ta spierta: “Un persona cu ta isolá su mes lo busca su mes anhelo egoista; contra tur sabiduria práctico lo e lanta.” Ta mihó pa busca un hende pa yuda bo, un hende cu ta bondadoso i comprensivo. Proverbionan 12:25 ta bisa: “Preocupacion ansioso den curason di un hende ta loke lo hacié dobla, pero e bon palabra ta loke ta hacié alegrá.” Bo por haña e “bon palabra” ei solamente si bo conta un hende di bo “preocupacion ansioso.”

Cu ken bo por papia? Busca apoyo den e congregacion cristian. Jesus ta primintí cu ei bo por haña “ruman homber i ruman muher i mama” cu lo stima bo i mustra interes den bo. (Marco 10:30) Joaquín ta corda: “Asociacion cu rumannan cristian a yuda mi mira bida di un otro manera. Asistencia regular na reunion a pone cu mi a bin stima Jehova mas i cu mi kier a sirbié. Rumannan maduro a duna mi famia yudansa spiritual i conseho. Awe, algun di mi rumannan ta ministernan di tempu completo.”

Corda tambe cu Jehova ta “un tata di huérfanonan di tata.” (Salmo 68:5, 6) Den tempu bíblico, Dios a animá su pueblo pa trata huérfanonan cu misericordia i husticia. (Deuteronomio 24:19; Proverbionan 23:10, 11) I awe e tin e mésun interes den hóbennan cu no tin mayor. Pues, acudí na Dios den oracion cu e siguransa cu e tin interes den bo i cu lo e contestá bo. Rey David a skirbi: “Den caso cu mi mes tata i mi mes mama bandoná mi, asta Jehova mes lo ricibí mi. Spera den Jehova; tene curashi i laga bo curason sea fuerte.”—Salmo 27:10, 14.

Tog, un hóben sin mayor ta enfrentá hopi desafio tur dia. Unda lo bo biba? Con lo bo sobrebibí económicamente? Un futuro artículo lo considerá con pa trata cu algun dje problemanan aki cu éxito.

[Notanan]

[Komentario na página 13]

“Loke a yuda ami masha hopi tabata mi amor pa Jehova i e speransa di resureccion”

[Plachi na página 13]

Kisas tin biaha bo ta sinti bo hopi so

[Plachinan na página 14]

Den congregacion tin amigu cu por yuda bo i animá bo