E Punto Di Bista Bíblico

Kico e Spiritu Santu di Dios Ta?

“Awor ora cu tur hende a bautisá, Jesus tambe a bautisá i, miéntras e tabata haci oracion, shelu a habri i spiritu santu den forma corporal di un palomba a baha riba dje, i un bos a sali for di shelu: ‘Abo ta mi Yu, esun stimá; mi a aproba bo.’ ”—Lucas 3:21, 22.

DEN un discurso na un grupo di filósofo na antiguo Grecia, apostel Pablo a yama Dios “Señor di shelu i tera.” Segun Pablo, ta e Dios aki “a traha mundu i tur loke tin den dje” i “ta duna tur persona bida i rosea i tur cos.” (Echonan 17:24-28) Con Dios ta logra haci tur esaki? Mediante su spiritu santu, of forsa activo.

Tambe Bijbel ta splica cu Dios tin un “abundancia di energia dinámico, pasobra tambe e ta vigoroso den poder.” (Isaías 40:26) Sí, Dios a crea henter e universo, cu ta manifestá su energia dinámico i poder.

Poder den Accion

Lo no ta masha exacto pa bisa cu e spiritu santu ta Dios su poder, pasobra poder por ta latente, esta, por keda inactivo un caminda, den un persona of algu, manera e coriente cu tin den un bateria cargá cu no ta den uso. Sin embargo, e Scritura ta presentá Dios su spiritu como algu cu ta den movecion, mescos cu e coriente cu ta sali for di un bateria cu ta den uso. (Génesis 1:2) P’esei, Dios su spiritu santu ta su energia mandá, su forsa activo.

Tin biaha Bijbel ta bisa cu spiritu santu ta logra haci un cierto tarea of cu e ta na un otro caminda for di Dios. (Mateo 28:19, 20; Lucas 3:21, 22; Echonan 8:39; 13:4; 15:28, 29) Algun hende cu a lesa pasashinan asina, ta asumí cu spiritu santu ta un persona riba su mes, apart for di Dios. Di con Scritura ta usa un idioma asina? Spiritu santu ta un entidad separá for di Dios?

Dios Todopoderoso ta existí riba un plano cu ta completamente distinto for di su creacion material. E ta un spiritu, invisibel pa nos sentidonan limitá. (Juan 4:24) Bijbel ta bisa cu Jehova Dios ta biba den shelu i cu e ta mira humanidad for di ei. (Salmo 33:13, 14) Nos por comprendé esaki. E Creador mester ta mas grandi cu e elementonan cu e ta traha cuné. E ta dominá nan, ta manipulá nan, ta forma nan i ta controlá nan.—Génesis 1:1.

For di su lugá di habitacion invisibel, Dios por pone cosnan sosodé ki ora cu e kier i na unda cu e kier. Pues, e no tin nodi ta na e lugá caminda su forsa activo ta operá. E por manda su spiritu pa cumpli cu un tarea. (Salmo 104:30) Esaki ta fácil pa comprendé pa hende den e mundu moderno aki cu ta traha cu artefactonan di cas cu ta funcioná cu control remoto. Awe nos ta reconocé e poder di forsanan invisibel manera coriente of onda infrarood. Ta mescos cu e forsa of spiritu santu di Dios: cuné Dios por haci cualkier cos cu el a pon’é pa haci, sin tin cu bai personalmente di un lugá pa otro.—Isaías 55:11.

Den tempu bíblico e concepto aki lo por tabata difícil pa hende capta. Sin duda, dor di describí spiritu santu como un forsa separá, e lectornan por a comprendé con Dios ta ehercé su poder sin cu e ta personalmente presente n’e lugá unda e ta haciendo algu. Ora Bijbel ta bisa cu spiritu santu a haci esaki of esaya, en realidad e ta bisando cu ta Dios mes a manda of a ehercé su poder riba hende of cos pa cumpli cu su boluntad.

E Diferente Maneranan cu Spiritu Santu Ta Operá

Jehova a usa su spiritu santu ora el a crea tur cos cu bida i cos sin bida. (Salmo 33:6) Tambe Dios a us’é pa destruí un generacion di hende violento i no-repentí mediante un diluvio. (Génesis 6:1-22) Tabata e mésun forsa activo aki Dios a usa pa transferí e bida precioso di su Yu pa matris dje bírgen hudiu Maria.—Lucas 1:35.

Tin biaha e spiritu a hinca forsa den hende pa nan papia e berdad cu curashi dilanti nan enemigunan, hopi bes cu e rísico di perde nan bida. (Mikéas 3:8) I tin hopi ocasion den Bijbel, foral den caso di profecia, cu hende homber i muher a haña perspicacia of comprendimentu special mediante e forsa aki. Ya cu no tin ningun humano cu por predicí cu exactitud loke tin den futuro, esaki ta un manera sobresaliente cu e spiritu ta operá.—2 Pedro 1:20, 21.

Tambe e spiritu por duna personanan individual poder milagroso. Por ehempel, mediante e forsa aki, Jesus por a controlá e forsanan di naturalesa, cura hende enfermo i asta lanta morto. (Lucas 4:18-21; 8:22-26, 49-56; 9:11) Ta e spiritu a yuda organisá e promé cristiannan i a yena nan cu vigor pa sirbi como Dios su testigonan riba henter e tera.—Echonan 1:8; 2:1-47; Romanonan 15:18, 19; 1 Corintionan 12:4-11.

Dios Ta Usa Su Poder na Nos Fabor

Ta posibel awe pa Dios su sirbidónan humano haci uso dje fuente sin límite aki di energia? Sí! Dios ta duna su pueblo un midí di su spiritu santu pa yuda nan comprendé i cumpli cu su boluntad. E ta duna su spiritu na esnan cu ta pidi p’e den oracion cu sinceridad, cu tin e motivacion corecto di curason i cu ta ahustá nan mes na su rekisitonan. (1 Corintionan 2:10-16) E spiritu ei por duna hende imperfecto “poder mas ayá di loke ta normal,” di manera cu nan por sirbi Dios fielmente apesar di obstáculo. Sigur anto, tur hende cu ta teme Dios ta deseá di ricibí i keda cu Dios su spiritu.—2 Corintionan 4:7; Lucas 11:13; Echonan 15:8; Efesionan 4:30.

Pronto Dios lo usa su forsa dinámico pa pone un fin n’e inhusticia i sufrimentu den e mundu malbado aki. Asina lo e santificá su gran nomber santu. Spiritu santu lo cambia henter mundu hacié bon, i e resultado lo ta bisto pa tur hende, dunando asina gloria na su Originador.—Galationan 5:22, 23; Revelacion 21:3, 4.