For Di Nos Lectornan

Selvanan di Yobida Danki pa a publicá e informacion cla i consolador tocante selvanan di yobida. (8 di mei 1998) Ta tristu pa mira con hende su locura i golosidad ta destruyendo nos planeta i su precioso fauna i flora. Mi ta contentu pa sa cu un djis nos Magnífico Creador, Jehova, lo cai den e asuntu i defendé e hoya precioso aki i su organismonan bibiente.

F. A., Brazil

Ta un placer pa bisa cu boso artículo a aclará hopi dje problema i cuestionnan relacioná cu e destruccion di nos selvanan di yobida awe. Mi kier a gradicí boso foral pa e informacion dje último paragraf, tocante e speransa cu tin pa e selvanan cu a sobra i cu un futuro generacion di selvanan di yobida lo bona sigur.

J. T., Australia

Mi a caba di lesa e edicion admirabel dje revista Spierta! cu mi a haña for di un Testigo di Jehova amabel cu mi no conocé. Mi ta miembro dje Asociacion Ecológico dje Universidad di Edinburgh; na 1939 mi a haña un grado den cuido di selva na e universidad ei. Nos a siña hopi tocante selva di yobida tropical. Mi ta felicitá boso i boso asistentenan pa e excelencia dje seri di artículo “Por Salba Nos Selvanan di Yobida?” Ni un solo palabra a scapa mi. Ta mi deseo pa boso movementu florecé! Lo e florecé sigur.

L. M., Inglatera

Aña 2000 E artículo “E Punto di Bista Bíblico: Con Importante Aña 2000 Ta?” den e Spierta! di 8 di mei 1998 tabata un recordatorio oportuno. Mi ta apreciá boso frankesa den desanimá cualkier tendencia pa speculá i boso onestidad den splica declaracionnan di pasado relacioná cu e calculacion di Jehova su dia.

S. W., Merca

Bo Ta Husga a Base di Aparencia? E cuenta tocante Nasreddin Hoja a ilustrá bon cu aparencia por ta engañoso. (8 di mei 1998) Danki pa recordá nos cu nos no mester pensa bon of malu di hende a base di nan aparencia, i cu Jehova ta husga nos segun nos curason, i no segun nos aparencia.

A. O. F. A., Brazil

Amor Nunca Ta Faya Mi ta gradicí boso for di profundo di mi curason pa e excelente artículo corticu “ ‘Amor Nunca Ta Faya’—Abo Sí?” (8 di mei 1998) E ideanan tratá eiden relacioná cu e diferente facetanan di berdadero amor, a conmové mi profundamente i a animá mi, foral pasobra e artículo a yega net ora cu mi tabatin ègt mester di yudansa. Awor mi ta convencí cu, sea cual sea e circunstancia, berdadero amor no ta faya nunca.

S. G., Francia

Ehempel pa Sigui Mi a lesa e artículo den e Spierta! di 8 di juni 1998 titulá “Hóbennan Sa Puntra . . . Ken Mi Mester Tuma Como Ehempel?” Anto mi a refleccioná riba e manera cu artículonan manera esaki a enrikesé mi bida. Despues cu mi famia a kibra for di otro, mi a sinti mi atraí na promé instante na amigunan di mi mes edad, loke tabata natural. Pero despues mi a cuminsá pensa seriamente riba e hendenan cu tabatin e impacto mas positivo riba mi bida: rumannan muher cristian di mas edad. Awor mi ta busca pa forma amistadnan manera esun di Pablo cu Timoteo of di Rut cu Noemí. Mi mihó amiga ta un ruman di rond di 50 aña, cu a siña mi tocante goso, amor, compasion, amabilidad i generosidad. Nos a uni forsa; nos a bira compañera di cuarto i a cuminsá den e ministerio di tempu completo. Danki pa boso guia i direccion sano.

C. F., Merca