For Di Nos Lectornan

Fin na Pobresa Masha masha danki pa e seri “Fin na Pobresa Ta Cerca,” dje edicion di 8 di juni di 1998 Spierta! El a ègt pone cos na nan debido lugá i a haci mi conciente cu mi tin un actitud kehoso. Mi no tin trabou i p’esei mi tin masha tiki cen extra. Ami a kere cu mi tabata pober. Pero no! E artículo aki ta mustra cu tin otronan pió cu mi. Mi mester ta contentu pa loke mi tin caba: cuminda, paña, bon salú i, esun mas importante, Jehova. Mi ta anhelá asina tantu pa mira fin na pobresa. Mi ta decididu pa sigui busca Jehova su Reino i stop di keha.

C. W., Nueva Zelandia

Celibato Mi tin algun aña ta lesa boso revistanan. Mi mester protestá contra boso reportahe tocante e doctrinanan di Iglesia Católico den e artículo “E Punto di Bista Bíblico: Celibato Ta un Rekisito pa Ministernan Cristian?” (8 di juni 1998) Mi ta haña cu boso no tabata imparcial. No ta existí “celibato forsá” den Iglesia Católico! Tin solamente un celibato boluntario como rekisito pa un cierto profesion. Ken cu bisa cu nan a fors’é tuma celibato ta gaña.

R. G., Alemania

Nos ta kere cu tin un diferencia importante entre e frase celibato forsá i e idea cu hende ta ser forsá pa tuma celibato. Si, por ehempel, un corporacion establecé un cierto norma di bisti i ta aceptá solamente trahadónan cu ta bai di acuerdo cuné i ta kita esnan cu ta viol’é, e ora ei por bisa cu e corporacion a “forsa” e norma. Den un sentido similar, ta razonabel pa bisa cu ta existí “celibato forsá” pa pastor católico. Sin embargo, nos artículo ta resaltá foral e falta di un base bíblico pa haci celibato un rekisito pa ministernan cristian. (1 Timoteo 3:2) En bes di criticá esnan cu ta scoge pa keda soltero, e artículo a bisa cu esaki “a resultá di ta un estilo di bida recompensador i spiritualmente satisfaciente pa algun.”—RED.

Mi Mester A Scoge Entre Dos Tata Mi a siña conocé e berdad dje Palabra di Dios for di un amigu di scol tempu mi tabatin 14 aña. Mi mayornan, foral mi tata, a oponé mi studio. Afortunadamente, nunca e no a cumpli cu su menasa di saca mi for di cas. Mi a perseverá i a bautisá cincu aña pasá. Mescos cu e ruman den e artículo (8 di juni 1998), mi ta spera cu un dia mi mayornan tambe por tin e speransa di biba den Jehova su hustu mundu nobo.

W. S. L., Brazil

Mi wowo a yena cu awa ora mi a lesa e artículo. Mi tata ta un opositor fuerte di mi creencianan. Aunke tin biaha nos por papia masha bon cu otro, asina cu e tópico di Bijbel of Testigonan di Jehova surgi, mi ta haña miedu di su explosionnan di rabia. Vários biaha el a yega di agredí mi físicamente. Pero e artículo a duna mi un gran animacion pa para firme, apesar di tantu tension.

I. H., Alemania

E artículo a conmové mi profundamente. Ya cu mi a lanta den un famia dividí pa motibu di religion, mi por comprendé e sufrimentu emocional dje hóben cu a hañ’é den un situacion difícil den cua e mester a scoge.

A. M., Italia

Kico si E No Ta Corespondé Mi Amor? Awe mi a haña e edicion di 8 di juli di Spierta! Anto ora mi a mira e artículo “Hóbennan Sa Puntra . . . Kico si E No Ta Corespondé Mi Amor?,” mesora mi a gradicí Jehova cu el a contestá mi oracionnan. Mi ta decididu pa considerá e artículo aki cu mi mama i aplicá e conseho den mi bida. Di berdad e seri “Hóbennan Sa Puntra . . .” ta un percuracion amoroso di Jehova Dios.

K. M., Kenya