Observando Mundu

Lechi di Mama Ta Mihó

“Lechi di pechu ta mama di tur remedi,” segun Newsweek. “Babynan cu beb’é ta haña e substancianan nutritivo cu nan mester pa nan celebro desaroyá bon, miéntras e ta baha nan rísico di tur cos, for di alergia i infeccion te cu diarea, ecsema i pulmonia.” P’esei e Academia Mericano di Pediatria i e Asociacion Dietético Mericano ta urgi mamanan pa duna nan yu recien nací pechu pa por lo ménos un aña. “Tog ta usa e recurso excepcional aki masha poco mes,” Newsweek ta remarcá. Di con? Hopi bes debí na malinformacion. Tin mama ta wori cu nan lo no producí suficiente lechi pa mantené nan baby salú. Otronan ta pensa cu e baby mester di otro cuminda for di trempan. “Echo ta cu mayoria mama por satisfacé tur e necesidadnan nutritivo di un yu te cu 6 luna, ora cu gradualmente ta cuminsá agregá cuminda sólido na e dieta,” e artículo ta declará. “I sin importá kico otro nan come, mucha te cu 2 aña ainda por beneficiá dje anticurpanan i ácidonan vet den e lechi di mama.” Tambe tin beneficio p’e mamanan: Dunamentu di pechu ta baha e rísico di haña cancer na pechu i ta acelerá pérdida di peso despues di duna lus.

Pobresa No Ta Respetá Niun Pais

Segun International Herald Tribune, un raport recien di Nacionnan Uní ta revelá cu pobresa ta aumentando, asta den e paisnan mas ricu na mundu. Hopi hende den paisnan industrialisá falta e “necesidadnan humano básico,” manera trabou, educacion i cuido médico. Segun e raport, 16,5 porciento dje poblacion di Merca ta biba den pobresa. Na Inglatera e cifra ta 15 porciento. Den e mundu industrialisá, 100 miyon hende ta sin cas, 37 miyon ta desempleá i casi 200 miyon tin “un expectativa di bida di ménos cu 60 aña.”

Nan No Ta ègt Lief

“Si bo ta kere cu leon of búfalo Cape ta e animal mas peligroso na Africa, bo ta ekibocá,” segun The Wall Street Journal. “Ta hipopótamo.” Aunke comikita i cuentanan di mucha ta presentá hipopótamo como un bestia amigabel i contentu, i nan ta popular como peluche, hipopótamo ta responsabel pa mas morto na Africa cu cualkier otro bestia. Guianan ta bisa cu e lugá mas peligroso riba e continente ta “entre un hipopótamo i su ruta pa awa” i na di dos lugá “kisas ta entre un mama hipopótamo i su yu.” Aunke hipopótamo ta parce basta trankil ora nan ta descansá huntu meimei di riu caminda e awa ta ketu i profundo, nan ta masha yalurs riba nan teritorio i hopi bes ta masha agresivo ora sorprendé nan of desafiá nan. Nan ta masha poderoso mes. Segun un guia, “un hipopótamo rabiá por morde un crocodil partié na dos, i un canoa na pida-pida.” Awel, pakico hende kier bai pasa cu canoa meimei di nan? Segun e guianan, bo ta haña bistanan espectacular dje riu i dje bestianan na cantu, i “probablemente esei ta ménos peligroso cu algun dje otro actividadnan cu turistanan ta participá aden den e partinan aki: por ehempel, bula cu bungee 110 meter haltu for dje brug di Victoria Falls.”

Señalnan Alarmante di un Posibel Holocausto Ta Reaparecé

Segun The Toronto Star, Irwin Cotler, profesor di ley di Universidad McGill i co-presidente dje Grupo Canades di Vigilancia di Helsinki, ta bisa: “E dianan aki tin patronchinan menasante den abusu di derecho humano, cu ta spantosamente parecido na e dianan scur di añanan ’30, ora cu a sosodé cosnan similar promé cu e Holocausto.” Cotler ta bisa cu un estudio conducí den 41 pais dor dje Federacion di Helsinki pa Derechonan Humano, ta resaltá un señal cla di peliger: un aumento grandi den abla cu ta expresá odio contra minorianan. Hopi bes dor di locutornan i publicacionnan di gobiernu cu ta stimulá odio, i e ta resultá den persecucion di minorianan. Cotler a bisa relacioná cu e tendencia aki: “Esaki ta un les di Guera Mundial II cu nos no a siña.” Segun Cotler, un otro les cu hende a lubidá ta “e crímen di keda indiferente pa cu esakinan, i e conspiracion pa keda ketu tocante nan.”

Mucha—Víctima di Guera

E korant aleman Grevener Zeitung ta informá cu “segun Olara Otunnu, representante special di Nacionnan Uní, guera i conflictonan den e último década a costa bida di dos miyon mucha, a laga mas cu un miyon mucha huérfano i a manca of heridá un seis miyon mucha mas seriamente.” E Conseho di Siguridad di Nacionnan Uní a condená tur práctica cu ta haci mucha e blanco di agresion. Tin un extra preocupacion pa e mas cu 300.000 muchanan rond mundu cu nan ta usa como soldá. Nan ta bisa cu ta obligá hopi dje muchanan aki pa drenta servicio militar, i un tercer parti di nan ta mucha muher. Hopi bes ta usa muchanan soldá como asesinonan suicida. Un coalicion recien formá di organisacionnan no-gubernamental ta exigiendo un protocol internacional cu lo hisa e edad mínimo pa soldá te na 18 aña.

Vaticano Riba Internet

Na 1994 Vaticano a firma un contract pa habri un Web site riba Internet. E korant El Financiero ta informá cu awor tin servicionan religioso disponibel riba Internet, manera confesion directo i consulta cu pastornan tocante “cualkier duda” riba asuntunan religioso. Na un site, “cibercatóliconan,” esta, católiconan cu ta usa Internet, por pidi pa resa pa nan. Tambe ta posibel pa wak un transmision en bibu di papa ta duna su bendicion di diadomingo. Anto tambe tin e propagandanan cu ta duna “oferta riba compra i benta di material religioso.” “E problema ta cu ta masha tiki página católico hende sa bishitá frecuentemente,” segun El Financiero. “E página di Vaticano ta ricibí ménos cu 25 bishita pa dia, i mayoria dje hendenan cu habri e páginanan ta di prensa católico.”

Nan Ta Preferá di Keda Malu

E korant Cape Times ta informá cu “TB [tuberculósis] ta keda e asesino number 1 di mundu.” E ta prevalente entre e hendenan hopi pober di Sur Africa, i ta mata mas cu 13.000 persona einan tur aña. E ta haci hopi hende muchu malu pa traha. P’e últimonan aki, gobiernu ta duna un onderstand pa incapacitacion, i tambe ta haci tratamentu di TB disponibel. Pero como cu trabou ta scars i hopi bes salarionan ta abou, tin pashent ta dicidí di stop nan tratamentu di TB pa asina nan por sigui haña nan onderstand. “E suma ta rond di 10 biaha mas tantu di loke nan sa tin custumber di haña pa trabounan los cu nan ta haci,” segun Ria Grant, director dje organisacion surafricano Cuido di TB. “Una bes e pashentnan mira cuantu placa nan por haña, nan ta kere cu mihó nan ta malu cu nan ta bon.”

Shofernan cu Soño

The Journal of the American Medical Association ta informá cu “tin experto ta bisa cu shofernan cu soño ta mes peligroso cu shofernan burachi. Mayoria biaha ta subestimá e papel cu soño ta hunga den accidentenan [di tráfico], i shofernan cu soño ta un menasa grandi pa salubridad i siguridad público.” Segun The Toronto Star, estudionan a saca afó cu gewoon hende no por predicí ki ora nan lo pega soño ni husga cuantu soño nan tin. Stephanie Faul, bocero dje Fundacion di Asociacion Automobil Mericano pa Siguridad di Tráfico, ta bisa cu “soño ta un necesidad mescos cu hamber i halamentu di rosea. Ora bo curpa tin cu drumi, e ta djis bai drumi.” Kico shofernan tin cu haci ora nan ta blo hap of nan wowo ta cera of nan auto ta hala for di caminda? The Toronto Star ta bisa: “Cosnan cu hende sa haci pa lanta for di soño, manera baha bentana of hisa radio, no ta funcioná. Cafeina ta bon pa haci bo alerto pa un ratu, pero lo no mengua un persona su necesidad fisiológico di drumi.” Nan ta consehá shofernan cu tin soño pa baha for di caminda, bai un lugá safe i tira un cabes.

Cuantu Bacteria Tin?

Bacteria ta un forma comun di bida riba tera. Nan ta existí bou di fondo dje océano mas profundo i 60 kilometer na laira den atmósfera. Nan masa total ta mas grandi cu di cualkier otro forma di bida. Científiconan dje Universidad di Georgia, Merca, a publicá awor loke kisas ta e promé intento serio pa calculá nan cantidad. Segun e cálculo, nan cantidad ta un cincu siguí pa 30 sero. The Times di Londen ta declará cu “mayoria hende ta kere cu bacteria ta causa malesa. Pero solamente un fraccion chikitu ta patogénico. Asta si nos conta tur e bacterianan cu ta biba den tur bestia, nan cantidad lo ta 1 porciento dje total. Mayoria bacteria no solamente ta inofensivo, sino ta esencial, yudando den actividadnan manera digestion.” Sorprendentemente, ta haña 92 pa 94 porciento di tur bacteria den sedimentu mas cu 10 centimeter bou di fondo di laman i den suela na un profundidad di mas cu 9 meter. Antes hende a kere cu e áreanan aki casi no tin ningun forma di bida. Rond di mitar dje peso secu di bacteria ta consistí di loke nan tin na carbon, un elemento esencial pa bida. The Times ta bisa cu “e cantidad di carbon wardá den bacteria ta casi igual cu e cantidad wardá den tur mata na mundu.”