Ken Lo Proteha Nos Muchanan?

TA BON pa sa cu awor hende ta reconocé cu abusu di mucha ta un problema mundial. Iniciativanan manera e Congreso Contra Explotacion Sexual Comercial di Mucha, tené na Stockholm, i na cua representantenan for di 130 pais a asistí, a duna atencion n’e problema aki.

Ademas, tin algun pais cu awor ta pasa ley cu ta prohibí turismo pa sex i pornografia di mucha. Algun a asta cuminsá tene registro di pedofilnan conocí, di manera cu nan no por yega asina fácil na mucha.

Anto tin hende cu ta haci intento pa duna mucha un mihó bida dor di pasa ley pa protehá nan. I un par di pais i personanan mas ta nenga di cumpra artículo producí cu labor infantil.

Aunke nos tur sigur ta aplaudí intentonan asina pa eliminá abusu di mucha for di sociedad, nos mester ta realístico i reconocé cu abusu di mucha tin rais masha profundo den sociedad humano. Lo ta ingenuo pa pensa cu un solucion simpel manera ley lo percurá proteccion completo pa nos muchanan. Ya caba hende a pasa hopi ley, i tog e problema ta persistí. Bon mirá, e echo cu mester protehá e derecho natural pa gosa di un infancia mediante un gran cantidad di ley, ta revelá masha cla con delincuente e adultonan dje mundu aki ta.

Leynan no ta e máximo proteccion pa mucha. Nos tin cu djis wak e resultado di tal legislacion inmenso, manera e Declaracion di Nacionnan Uní dje Derechonan di Mucha, cu hopi gobiernu a firma. Ta bon documentá cu asta hopi dje gobiernunan aki, limitá dor di problemanan económico, no ta haci lo suficiente pa para e explotacion di nan muchanan. Abusu di mucha ta sigui ta un problema internacional grandi.

Mayornan Por Haci Hopi

Cria yu cu éxito ta un tarea exigente. E ta rekerí sacrificio. Pero mayornan interesá tin cu haci sigur cu no ta nan yunan ta esnan cu nan ta sacrificá. E revista Maclean’s ta comentá cu hopi bes “hende ta mira criamentu di yu como un hobi.” Por benta un co’i hunga afó of stop cu un hobi, pero cria yu ta un responsabilidad cu a bini di Dios.

Ser un bon mayor ta un dje regalonan mas balioso cu bo por duna bo yu. Asina bo ta yud’é tin un infancia felis i sigur. E siguridad ei no ta dependé di bo státus social of económico den bida. Bo yu tin mester di abo, di bo amor i cariño, di bo tempu i pa bo trankilis’é ora e ta sintié menasá. Bo yu kier tende bo stem cont’é cuenta, e kier abo como su ‘role model’ i e kier bo disiplina amoroso.

Riba e tema di moralidad sexual, mayornan, trata boso relacion di famia cu modestia i cu respet pa boso yunan su mente i curpa. Mucha ta siña masha lihé ki tipo di accion ta pasa e límitenan moral cu nan mayornan ta pone pa nan. Mester siña nan con pa comportá nan mes tantu na cas como pafó di cas. Si boso no haci esaki, un otro hende lo hacié pa boso, i por ta cu boso lo no gusta e resultado. Siña muchanan con pa reaccioná si un dia nan sinti nan menasá moralmente. Laga nan sa ki propósito nan partinan privá di curpa tin, i siña nan cu no mag laga hende mishi cu esakinan. Bisa nan con pa reaccioná si ken cu e kier ta, acercá nan pa probechá di nan.

Sa na tur momento unda bo yunan ta i cu ken nan ta. Ken ta bo yu su amigunan íntimo? Ken ta cuida bo yu ora bo no t’ei? Bo por confia nan? Naturalmente, esaki no kier men cu un mayor mester desconfiá tur hende. Haci un bon evaluacion dje adultonan den bo yu su bida, i wak mas leu cu aparencia exterior.

Pensa riba e sufrimentu di mayornan cu a descubrí, muchu lat, cu nan yunan a ser abusá dor di hende di confiansa manera pastor, maestro of asta miembronan yegá di famia. Lo ta bon pa abo como mayor puntra bo mes: ‘Mi iglesia ta tolerá of tapa abusu di mucha? Mi religion ta tene su mes firmemente na principionan moral haltu?’ Contesta riba preguntanan asina lo por yuda bo tuma decisionnan sabí pa protehá bo yunan.

Pero riba tur cos, purba yuda bo yunan siña conocé i stima e principionan dje Creador, loke lo protehá nan di daño. Ora muchanan mira e respet cu nan mayornan tin pa principionan moral haltu, nan lo ta mas dispuesto pa sigui e bon ehempel aki.

E Unico Solucion Berdadero

Naturalmente, riba nan mes, ley i sentencianan mas pisá lo no protehá nos muchanan. E Creador mes mediante su Palabra inspirá, Bijbel, por logra producí conducta decente na un manera eficas. E ta haci esei dor di cambia pensamentu di hende cu tabata mescos cu bestia, pa bira miembronan amoroso i decente di cualkier comunidad.

A keda demostrá caba cu esaki ta posibel. Tin hopi hende cu a bandoná nan estilo di bida inmoral di ántes. Awor nan ta duna prueba bibu dje poder dje Palabra di Dios. Pero maske esaki ta un paso den e bon direccion, mayoria malechor perverso lo no cambia. Ta p’e motibu aki Jehova Dios a primintí cu pronto lo e eliminá for di tera tur esnan cu ta explotá nos muchanan, huntu cu nan filosofia, nan mal deseo i nan golosidad.—1 Juan 2:15-17.

E ora ei, den Dios su mundu nobo, caminda lo no tin pobresa mas, tur mucha lo disfrutá di un infancia trankil i sin abusu, loke ta un derecho cu Dios a duna nan. Esaki lo nificá no solamente fin di abusu di mucha, sino tambe fin di tur recuerdo doloroso cu ta daña hende su bida awe: “E cosnan anterior lo no ser recordá, ni nan lo no subi na curason.”—Isaías 65:17.

Pues, den Dios su mundu nobo, e palabranan di Jesucristo lo haña berdadero nificacion den un manera magnífico: “Laga e muchanan chikitu na pas, i no stroba nan di bini cerca mi, pasobra e reino di shelu [cu ta goberná riba e tera, hende su hogar paradísico] ta pertenecé na esnan cu ta asina.”—Mateo 19:14.

[Plachi na página 9]

Yuda bo yunan siña dje propósito i principionan dje Creador

[Plachi na página 9]

Usa tacto pa siña bo yunan con pa reaccioná si nan sinti nan menasá sexualmente

[Plachi na página 9]

Ser un bon mayor ta un regalo balioso pa bo yunan

[Plachinan na página 10]

Den Dios su mundu nobo, tur mucha lo disfrutá plenamente di nan infancia