Perde Brasa of Pia​—⁠Esei Por Sosode Cu Bo?

Benjamin tabata pafó ta tuma e solo di primavera cu tabata calentá e stad di Sarajevo. Lugá, el a trapa riba un mina di tera. E mina a bula kita su pia robes afó. Benjamin ta conta: “Mi a purba lanta, pero mi no tabata por.” Benjamin ta solamente un dje 20.000 hendenan cu tur aña ta ser matá of mancá dor di mina di tera.

NA ANGOLA tin asta 15 miyon mina di tera plamá. Esei ta mas cu un pa cada homber, muher i mucha den e pais ei. Actualmente Angola tin 70.000 hende cu a perde un brasa of pia. Cambodia ta conta cu ocho pa dies miyon mina di tera i e tin e porcentahe mas haltu na mundu di hende cu a perde brasa of pia: rond di 1 di cada 236 hende. Segun informe, Bosnia i Herzegovina tin mas cu tres miyon mina, esta, 59 pa cada kilometer cuadrá.

Pero no ta den paisnan asotá pa guera so hende ta perde brasa of pia. Por ehempel, tin rond di 400.000 hende asina na Merca. Di e cantidad ei, mayoria adulto a perde un brasa of pia pa motibu di un condicion crónico cu nan a duna e término general di “malesa di ader den man cu pia” of PVD (dje nomber na ingles, “peripheral vascular disease”). Esaki ta abarcá vários malesa. Taber’s Cyclopedic Medical Dictionary ta definí PVD como un término inexacto cu ta abarcá “malesanan di ader i bena den man cu pia, foral e condicionnan cu ta stroba un bon circulacion di sanger den man cu pia.” Un dje causanan principal di PVD ta diabétis. Segun The World Health Report 1998, “mundialmente, casonan di diabétis bou di adultonan lo bira mas cu dòbel, for di 143 miyon na 1997 te na 300 miyon pa aña 2025.”

Na Merca, e di dos causa principal di pérdida di brasa of pia ta lesion causá dor di accidente cu mashin of aparatonan eléctrico i arma di candela. Lesion ta responsabel pa 20 te 30 porciento di tur amputacion. Otro causanan di pérdida di brasa of pia ta tumor (rond di 6 porciento) i defectonan di nacementu (rond di 4 porciento).

E idea di perde un brasa of pia precioso ta inkietante, anto esei ta poco bisá. Tin un manera pa reducí e rísico? I si bo a perde un brasa of pia caba, con bo por gosa di un bon calidad di bida? E siguiente artículonan ta considerá esakinan i tambe otro preguntanan.