Con un Stral di Lechi Ta Bira un Cuchara di Puiru

Dje Coresponsal Di Spierta! NA NUEVA ZELANDIA

PA MILES di aña, lechi ta un alimento básico pa hende di casi tur nacion. Claro cu lechi ta bini di klir di pechu dje género femenino i ta un alimento completo pa nan baby. Pero distinto di otro criatura, hende a obtené e alimento sumamente nutritivo aki for di vários mamífero, foral di baca, búfalo, cabritu, carné, kamel, lama i rendier. Ademas di bebe lechi puru, hende ta gusta tambe e hopi productonan cu ta derivá for di dje. Algun di esnan mas popular ta manteca, keshi, yogurt i ijscream.

Un dje lechinan mas comun, lechi di baca, ta consistí principalmente di 87 porciento awa i 13 porciento substancianan sólido, entre otro, carbohidrato, proteina, vet, vitamina i mineralnan manera calcio, cu ta importante pa desaroyo di wesu i pa mantené nan den bon condicion. Por cierto, baca no ta producí e lechi mas nutritivo. Dje animalnan mencioná ariba, ta rendier ta esun cu ta producí e lechi mas nutritivo. Su lechi ta contené rond di 37 porciento di substancia sólido!

Sea cual sea e fuente, lechi no ta wanta hopi, a ménos cu pon’é den frishider. Un solucion popular pa e problema aki ta lechi na puiru. Pero con nan ta transformá lechi líkido den puiru? Laga nos ban haci un bishita corticu na un planta moderno di procesá lechi na Waikato, Nueva Zelandia. E planta aki ta un di esnan mas grandi di su sorto na mundu i ta producí tur dia 400 ton di puiru enrikesé pa e industria mundial di alimento.

Di Líkido pa Puiru

Tur dia, un cantidad di truck cu tanki di stal lombrante ta trece lechi frescu for dje haciendanan di lechi di Nueva Zelandia n’e planta. Ei nan ta tene e lechi frescu den contenedornan cu nan ta mantené friu. For di ei, e lechi ta pasa dor di mashin cu ta separ’é den lechi sin vet i crema di lechi. Caba, nan ta bolbe mescla nan huntu den cantidadnan specífico pa duna e producto final e consistencia corecto. For di ei, e ta ser almacená promé cu combirtié den puiru.

Despues dje proceso di pasteurisacion, nan ta herebé e lechi den un contenedor sin aire. Di con sin aire? Esaki ta haci sigur cu e lechi ta herebé na un temperatura hopi mas abou cu normal, loke ta minimisá daño causá pa cayente. Despues dje fase aki cu ta pone e lechi evaporá, e concentracion sólido dje lechi ta rond di 48 porciento. E producto concentrá aki ta cla awor pa e proceso final, esta seca e lechi.

E proceso di seca e lechi ta cuminsá ora manda e lechi concentrá via pipa te na top di un secadó di stainless steel cu ta consistí di vários piso di contenedor riba otro. Ta spuit e lechi den e contenedor cu tin aire cayente. E grado di humedad dje lechi ta baha te na 6 porciento i e ta bira puiru. Un fase mas ta reducí su humedad te na 3 porciento, despues di cua nan ta fria e puiru poco-poco pa prepar’é pa ser empaketá i mandá. Henter e proceso ta sosodé bou di control estricto cu un pérdida mínimo dje balor nutritivo i sabor dje lechi.

Kisas bo ta biba den un área caminda ta fácil pa haña lechi frescu. Pero hopi hende ta biba den áreanan isolá caminda lechi frescu ta caru i masha difícil pa haña. Danki na e maraviya di lechi na puiru, nan problema ta resolvé. Nan ta djis mescla algun cuchara di puiru den awa, i nan tin lechi, aunke e no ta mes dushi cu lechi frescu, tog e ta un producto nutritivo.

[Kuadro/Plachi na página 12]

Kico Ta Pasteurisacion i Homogenisacion?

Pasteurisacion, un proceso cu nan a duna e nomber dje científico frances Louis Pasteur, ta encerá keinta lechi pa un cierto cantidad di tempu, i despues fri’é lihé. E proceso aki ta mata bacterianan perhudicial, loke ta alargá e tempu cu e lechi por wanta. Pero no ta tur bacteria ta muri, di manera cu tog e tempu cu por warda productonan di lechi ta limitá. Ora ward’é debidamente den frishider, lechi pasteurisá di calidad haltu por wanta 14 dia.

Homogenisacion ta cambia e consistencia físico dje glóbulonan di vet of crema den e lechi pa nan no keda drif ariba anto forma un capa di crema. Substancianan di homogenisacion ta kibra e glóbulonan di vet, haci nan suficiente chikitu pa nan keda den e lechi i dun’é un consistencia ricu i uniforme.

[Rekonosementu]

Cortesia di Biblioteca Nacional Mericano di Medicina

[Plachinan na página 13]

E secadó di vários piso aki por seca mas cu nuebe ton di lechi na puiru pa ora