E Punto di Bista Biblico

Di Con Unidad Religioso den Matrimonio Ta Importante

UN FAMIA ta sintá na mesa pa come. Miéntras e tata ta pronunciá un oracion, e mama ta resa den su mes na un otro dios. Den un otro famia, e esposa ta bai misa, pero e esposo ta asistí na snoa. Den algun famia un mayor ta siña e yunan tocante Santa Claus, miéntras cu e otro ta conta nan di Hanuká.

Estudionan recien ta mustra cu esaki a bira masha comun, ya cu mas i mas persona ta casa cu hende di otro religion. Un encuesta ta mustra cu na Merca, 21 porciento di católico ta casa cu hende di otro fe awor. Entre mormon e porcentahe ta 30, pa moslim 40 i pa hudiu mas cu 50 porciento. Ya cu tabatin siglonan di enemistad religioso, algun hende ta mira matrimonio di hende di diferente fe como un victoria riba intolerancia. Un columnista di korant a skirbi: “Matrimonio mesclá di cualkier tipo ta algu di celebrá.” Esaki ta e punto di bista di Bijbel?

Mester remarcá aki cu Bijbel no ta apoyá prehuicio racial of étnico. E Palabra di Dios ta promové imparcialidad racial. Apostel Pedro a haci e punto aki masha cla ora el a bisa: “Siguramente mi ta percibí cu Dios no ta parcial, sino den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) Pero na mes momento, Bijbel ta siña cu berdadero adoradónan di Jehova mester casa “solamente den Señor.” (1 Corintionan 7:39) Di con?

E Propósito di Matrimonio

Dios su propósito tabata pa matrimonio ta un vínculo specialmente íntimo. (Génesis 2:24) Cu e areglo di matrimonio, Dios no a pensa riba compañerismo so. Ora Jehova a duna e promé pareha e tarea di cria yu i cuida nan hogar terenal, el a mustra cu nan mester a traha estrechamente huntu pa logra cumpli cu su boluntad. (Génesis 1:28) Si nan a cooperá cu otro den sirbi Dios den e sentido aki, homber i muher lo a disfrutá, no solamente di compañerismo, sino tambe di un relacion estrecho i duradero.—Compará cu Malakías 2:14.

Jesus a haci referencia na e relacion aki ora el a expresá e palabranan bon conocí aki: “Nan no ta dos mas, sino un solo carni. P’esei, no laga ningun hende separá loke Dios a uni bou di un yugo.” (Mateo 19:6) Jesus a usa un lenguahe ilustrativo, comparando e union matrimonial cu un yugo cu ta tene dos bestia di hala carga cu ta trek of move e mésun cos huntu. Imaginá bo cuantu tension e dos bestianan bou dje yugo ei lo tin si cada un mester trek pa su banda! Asina tambe, esnan cu casa cu un hende cu no ta dje berdadero fe, por haña nan cu hopi tension tratando di biba segun principionan bíblico cu un casá cu ta resistí. Ta na su lugá anto cu Bijbel ta declará: “No bira uní bou di yugo desigual cu incrédulonan.”—2 Corintionan 6:14.

Un Mihó Matrimonio

Ser uní den adoracion berdadero por fortalecé un matrimonio masha hopi mes. Un escritor a comentá: “Adorá huntu ta un dje característicanan principal di famianan sano i felis.” Eclesiástes 4:9, 10 ta bisa: “Dos ta mihó cu unu, pasobra nan tin un bon recompensa pa nan trabou duru. Pasobra si un di nan mester cai, e otro por lanta su compañero.”

Si un pareha cristian laga nan bida drei rond di nan adoracion, nan lo no ta uní físicamente so, sino tambe spiritualmente. Segun cu nan ta haci oracion huntu, studia e Palabra di Dios huntu, congregá huntu cu compañeronan cristian i compartí nan fe cu otro hende, nan ta fomentá un banchi spiritual cu ta pone nan hala mas cerca di otro den nan matrimonio. Un muher cristian a comentá: “Adoracion berdadero ta un estilo di bida. Ami no por imaginá mi ta scoge pa casa cu un hende cu no ta compartí e base di loke mi ta i ken mi ta.”—Compará cu Marco 3:35.

Esnan cu casa “den Señor” por verwagt cu nan casá lo imitá Jesus su conducta. Esposonan cristian tin cu trata nan casá mes amorosamente cu Jesus a trata e congregacion. Esposanan cristian tin cu trata nan casá cu respet. (1 Corintionan 11:3; Efesionan 5:25, 29, 33) Cristiannan no ta haci esaki djis pa complacé nan casá, sino pa agradá Dios, kende ta tene parehanan casá responsabel pa e manera cu nan ta trata otro.—Malakías 2:13, 14; 1 Pedro 3:1-7.

E echo cu nan tin e mésun creencianan tambe ta yuda parehanan cristian resolvé diferencianan di un manera pacífico. Bijbel ta consehá cristiannan pa keda enfocá ‘no cu interes personal riba nan mes asuntunan so, sino tambe cu interes personal riba asuntu dje otronan.’ (Filipensenan 2:4) Sea cual sea nan preferencianan personal, casánan cu ta uní den fe ta acudí na e Palabra di Dios como un autoridad en comun pa resolvé desacuerdo. (2 Timoteo 3:16, 17) Haciendo esei nan ta sigui e conseho bíblico pa cristiannan ta di “e mésun mente.”—1 Corintionan 1:10; 2 Corintionan 13:11; Filipensenan 4:2.

Atraccion i Balornan en Comun

Ta cierto cu un relacion no ta nificá solamente compartí e mésun fe. Nan mester gusta otro tambe. (Cantica di Sálomon 3:5; 4:7, 9; 5:10) Pero pa un matrimonio por dura, ta crucial pa nan tin balornan en comun. Segun e buki Are You the One for Me? (Abo Ta Esun pa Mi?), “parehanan cu tin balornan similar tin un chens hopi mas grandi di crea un relacion felis, armonioso i duradero.”

Desafortunadamente, tin biaha hende cu ta gusta otro no ta papia di diferencianan serio sino te despues cu nan casa. Laga nos haci un comparacion: Imaginá cu bo ta cumpra un cas principalmente debí cu bo ta gusta su aparencia. Pero ta te despues cu bo a bin biba aden, bo ta haña sa cu e fundeshi ta swak. Cu un fundeshi swak, tur e cas su bunitesa ta bira insignificante. Asina tambe, kisas bo por sinti bo atraí na un hende di otro religion cu ta parce di ta e persona cu ta pas cu bo, pero despues di casamentu e relacion lo por resultá di ta un eror grandi.

Pensa un ratu riba algun cuestion difícil cu lo por presentá mas despues den matrimonionan entre hende di diferente religion: Unda e famia lo bai pa adorá? Ki criansa religioso e muchanan lo ricibí? Cua religion e famia lo apoyá financieramente? Un casá lo insistí pa participá den cierto custumbernan religioso i dianan di fiesta cu e otro ta considerá pagano? (Isaías 52:11) Tur matrimonio ta rekerí pa ámbos casá haci ahuste razonabel; pero comprometé principionan bíblico, asta si ta pa conserbá un matrimonio, ta inaceptabel pa Dios.—Compará cu Deuteronomio 7:3, 4; Nehemías 13:26, 27.

Pa mantené pas den matrimonio, algun pareha den matrimonio dividí dor di religion ta practicá nan fe cada un riba su mes. Pero lamentablemente, adoracion independiente ta crea un bashí spiritual den matrimonio. Un muher cristian casá cu un homber di un otro fe a conta: “Maske nos tabata casá pa 40 aña, mi casá no tabata ègt conocé mi.” Na otro banda, den un matrimonio caminda ámbos casá ta adorá “cu spiritu i cu berdad,” nan tin Dios como nan punto central. Bijbel ta usa palabranan poético bisando: “Un cabuya tripel, bo no por kibra na dos lihé.”—Juan 4:23, 24; Eclesiástes 4:12.

Kico dje Yunan?

Algun hende cu ta pensa pa casa cu hende di otro religion ta haña cu nan por exponé nan yunan na tur dos fe i laga p’e muchanan mes scoge. Ta cierto cu tur dos mayor tin e derecho legal i moral pa educá nan yunan den sentido religioso, i cu al final, ta e yunan tin cu tuma nan mes decision.a

Bijbel ta manda muchanan obedecé tur dos mayor “den union cu Señor.” (Efesionan 6:1) Proverbionan 6:20 ta bis’é asina aki: “Warda, o mi yu, e mandamentu di bo tata, i no bandoná e ley di bo mama.” Muchanan cu lanta den un famia den cua tur dos mayor tin e mésun fe, ta uní den loke Bijbel ta yama “un Señor, un fe, un bautismo,” en bes di ta exponé na diferente doctrina.—Efesionan 4:5; Deuteronomio 11:19.

Di Berdad “den Señor”

Si pa logra éxito den un matrimonio, ta importante pa e pareha tin e mésun balornan, lo ta sabí pa casa cu cualkier hende cu ta profesá di ta cristian? Bijbel ta contestá: “Esun cu bisa cu e ta permanecé den union [cu Jesus], e mes ta bou di obligacion tambe di sigui cana mescos cu esun ei a cana.” (1 Juan 2:6) Pues un cristian cu kier casa, mester busca un compañero cristian cu di berdad ta purba sigui Jesus. E prospectivo casá ei mester ta un hende cu a dedicá su bida na Dios i bautisá. E mester ta imitá Jesus su personalidad amoroso i su celo den predicá e Reino di Dios. Mescos cu Jesus, e mester laga su bida drei rond di haci e boluntad di Dios.—Mateo 6:33; 16:24; Lucas 8:1; Juan 18:37.

Si esnan cu ta deseá di casa warda cu pacenshi te ora nan haña un casá cu ta pas cu nan i cu ta parti di Dios su famia di adoradó, nan ta mustra cu nan ta pone e boluntad di Dios promé den nan bida. Al final, esei lo contribuí na un matrimonio mas felis i mas satisfaciente.—Eclesiástes 7:8; Isaías 48:17, 18.

[Nota]

[Kuadro na página 20]

Yudansa pa Famianan Dividí pa Motibu di Religion

Tin diferente motibu pakico awe parehanan casá tin cada un nan mes religion. Kisas algun a scoge un casá cu ta di otro religion. Pero hopi pareha tabatin e mésun religion ora nan a casa; i despues cos a cambia ora un di nan a aceptá un otro forma di adoracion. Por tin otro circunstancianan cu ta trece division religioso den famia. Pero, sea cual sea e motibunan, no mester kibra e votonan di matrimonio of considerá nan di poco balor djis debí cu un no ta di acuerdo cu e religion cu su casá a scoge. Bijbel ta onra e santidad i permanencia di matrimonio, asta ora e casánan no ta uní den adoracion. (1 Pedro 3:1, 2) Apostel Pablo a skirbi: “Si un ruman homber tin un esposa incrédulo, i tog e esposa ta di acuerdo pa biba cuné, laga e esposo no bandon’é.” (1 Corintionan 7:12) Aplicá e principionan hañá den Bijbel por yuda cualkier pareha casá disfrutá di pas den un relacion amoroso i respetuoso.—Efesionan 5:28-33; Colosensenan 3:12-14; Tito 2:4, 5; 1 Pedro 3:7-9.