Namibia Su Esculturanan Movibel

DJE CORESPONSAL DI SPIERTA! NA SUR ÁFRICA

E ESTILO dje artista ta cambia constant, i tog e efecto ta bunita. E material ta santu. E artista? Bientu, cu ta moldea e cerunan di santu movibel (duin) den formanan único. Podisé e forma mas conocí ta esun curvá, manera mitar luna. E banda dje “escultura” cu ta cara pa bientu tin un bahada gradual. E banda dje ceru di santu protehá contra bientu ta mas steil i corticu. E rand ariba dje duin ta parce hopi skerpi, pero fácilmente bo ta hacié stompi si bo descuidá dal e un skop.

E desierto Namib den zuidwest di África ta un bon lugá pa mira e esculturanan movibel aki. E tin algun dje duinnan mas haltu na mundu, alcansando halturanan di mas cu 400 meter. Pero pa loke ta superficie, Namib ta mas chikitu cu e desiertonan grandi di mundu. For di océano Atlántico e ta extendé te na un máximo di 160 kilometer riba tera, i e ta 1.900 kilometer largu.

Otro Artistanan na Obra

Bientu no ta e único artista cu ta ser presentá den e ‘galeria di arte’ remoto aki. Un examinacion mas djacerca dje duinnan ta duna evidencia di diseñonan único di otro artista. Por ehempel, ta posibel cu bo ta mira loke ta parce un cadena largu i fini, bentá abou casualmente riba e santu. Si bo warda suficiente largu, bo por asta mira e artista trahando. E “cadena” ta consistí di marca di pia cu bacatòr ta laga atras ora nan ta cana riba e santu anochi. No muchu leu for dje “cadena” tin un rij simétrico di loke ta parce buracunan chikititu den santu. Esakinan tambe ta marca di pia cu e slurfspitsmuis ta laga atras, segun cu e ta salta bai su destino. Di ripiente bo ta realisá cu e galeria di arte remoto aki i aparentemente bashí, ta abundá cu bida.

Pa nort, a lo largu di costa Eskeleto, bo por mira e obra di otro artistanan di desierto. Nan ta trata e santu di un manera brutu i e producto final ta un poco bruhá. Tene cuidou! Ata nan ta bini, crusando e duinnan cu salto grandi. Un cos ta sigur, nan ta gosa di nan actividad creativo. E criaturanan grandi aki ta core baha e duin cu un velocidad sorprendente, tirando santu den tur direccion. Nan no ta keda contentu cu core so, sino tambe ta slide, lastrando nan patanan patras i lagando canalnan hundu den santu. Nan ta basha bai na un buracu di awa djis pegá, bula aden i ta sapatiá manera mucha contentu. E artistanan aki, e olefante africano, ta pisa cada unu rond di seis ton!

Un otro artista excéntrico cu un estilo curioso, pero sin embargo no dje brutu ei, ta e víbora Péringuey (dwergpofadder). Su diseño riba santu ta parce un seri di palu trocí. E colebra ta laga e marcanan aki atras segun cu e ta pusha bai dilanti den un forma peculiar di banda. Di ripiente e marca cu e ta laga atras ta stop, i bo no ta mira e víbora niun caminda. Unda el a bai? Si bo wak cuidadosamente, bo ta mira dos wowo smal ta wak bo dor dje santu. E sobrá dje colebra ta completamente derá bou di santu. Bon camuflá asina, e ta warda cu pacenshi pa su cuminda, generalmente un lagadishi cu pasa eibanda.

Tin un diseño den e santu cu kisas no ta dje bunita ei. Bo por mira marca hanchu di tayer di motosaikel di tres wiel, diseñá special pa core riba e tipo di tereno aki. Asina hende tambe a laga su marca.

Un Artista Impredicibel

Hopi otro artista mas ta laga nan marca riba e santunan aki, pero nan ta muchu hopi pa mencioná. Entre nan tin rinócero, leon, giraf i chacal, cu bo por mira tambe na e parke di bestia salbahe di costa Eskeleto i na otro parti.

Pero e artista principal ta bientu. E ta determiná e aparencia general dje galeria i ta reareglá e formanan na su antoho. E ta haci cambio constant. Si bo bolbe na e galeria ei aki un aña, lo bo ripará cu durante bo ausencia algun dje duinnan a move te cu 30 meter! Esei ta loke e bientunan di Namibia por haci.

[Mapa na página 17]

ÁFRICA

NAMIBIA

[Plachi na página 16]

Slurf-spitsmuis

[Rekonosementu pa Potrèt na página 16]

Des i Jen Bartlett