Mama i Su Dies Yu Muhernan
SEGUN E RELATO DI ESTHER LOZANO
TANTU Mami como Papi a nace na Bitlis, Turkia, i nan mayornan tabata di Armenia. Na principio di siglo pasá, tempu cu tabatin un masacre extenso di armenionan, nos tata a bandoná Turkia i a bini Merca. E tabatin mas o ménos 25 aña. Nos mama Sophia, a bai algun tempu despues ora e tabatin 12 aña.
Ta parce cu e mayornan di tur dos famia a cumbiní pa manda nos mama Merca p’e casa cu nos tata, Aram Vartanian. Ora Sophia a yega Fresno, California, e tabata muchu yong pa casa. P’esei, el a biba cerca su futuro suegra te dia el a bira mayor di edad.
E promé yu di nos mayornan tabata un mucha homber cu nan a yama Antranig. Despues el a cambia su nomber pa Barney. El a nace dia 6 di augustus 1914. Tur e dies yunan cu a sigui tabata mucha muher. Nos tata a bira un Studiante di Bijbel, manera Testigonan di Jehova tabata conocí e tempu ei, ora cu Shield Toutjian a bishitá Fresno i a duna un discurso n’e comunidad armenio na 1924. Despues di esei, nos famia completo tabata asistí huntu na reunionnan cristian.
Na 1931, nos a muda bai Oakland, California, i a asistí na e congregacion einan. Barney a sirbi Jehova fielmente na Napa, California, te na su morto na 1941. Mi tabata e di tres yu muher cu a nace despues di Barney, i mi a simbolisá mi dedicacion na Jehova na 1935. Ta poco tempu ei numa nos ruman muher Agnes a bautisá, despues cu el a asistí pa 75 aña n’e reunionnan! Tur su ruman muhernan tabata presente, i nos tabata masha contentu cu awor e último di e dies ruman muhernan a bautisá.
Lamentablemente, Mama no tabata presente. El a muri net un aña promé na edad di 100 aña i dos dia. E korant di California Hayward News di 14 di mei 1996 a anunciá su morto. E korant a bisa: “El a sirbi comunidad boluntariamente como un Testigo di Jehova dor di duna les di . . . Bijbel na hende interesá pa 54 aña largu.” Tambe e artículo a cita nos ruman muher Elizabeth, kende a bisa: “Hende semper tabata bon biní na nos cas i semper e tabatin lugá pa un hende mas come . . . E tabata bisa: ‘Bin dal un kopi kofi pretu,’ i si pa casualidad bo [a] bini ora el a traha su famoso ‘baklava,’ bo tabata mashá di bon mes.”
Nos ruman muher mas grandi Gladys tin 85 aña i esun mas yong tin 66 aña. Nos tur ta Testigonan activo. Tres di nos a sirbi como misionero despues cu nos a gradua n’e Scol Bíblico di Galad di Watchtower. Elizabeth kende actualmente ta biba na Newport Beach, California, tabata den e di 13 klas i el a sirbi cincu aña na Callao, Perú. Ruth a asistí na e di 35 klas. E cu su casá, Alvin Stauffer, a sirbi como misionero na Australia pa cincu aña. Mi tabata den e di 4 klas di Galad i na 1947 mi a ser asigná pa bai México, unda na 1955, mi a casa cu Rodolfo Lozano.a Desde e tempu ei, nos dos a sirbi na México.
Nos tur dies ruman muher ta masha gradicidu p’e grado di salú cu nos tin. Esaki ta permití nos sigui sirbi Jehova cu tur nos mente, curason i forsa segun su boluntad, tantu awor como den su mundu nobo pa semper.
[Nota]
a Bo por haña su experencia den E Toren di Vigilancia di 1 di januari 2001.
[Plachi na página 20]
Ora Agnes a bautisá na 1997
[Plachi na página 21]
Elizabeth dia cu el a gradua na Galad na 1949
[Plachi na página 21]
Ester (na man drechi) na sucursal di México na 1950
[Plachi na página 21]
Ruth cu Alvin Stauffer sirbiendo como sirbidónan internacional na sucursal di México na 1987