Dios Su Nòmber Riba un Kastel di Edat Media

DI UN ESKRITOR DI SPIÈRTA! NA SLOVAKIA

SLOVAKIA ta un pais chikí pero ku paisahe masha bunita ku ta keda den kurason di Europa. E paisahe pintoresko di kunuku ta dòrná ku vários kastel ku ta para komo evidensia di e region su historia largu i riku. Un di e kastelnan mas remarkabel ta Kastel Orava, konstruí na un haltura di 112 meter riba baranka di kalki, i e ta sobresalí riba e pueblito pegá kuné.

E promé registronan tokante Kastel Orava ta data di aña 1267. Atraves di tempu el a pasa den masha hopi man. Na 1556 un famia riku, famia Thurzó, a bira doño di e kastel. E famia a drecha i agregá vários kos na e kastel, entre otro, nan a konstruí e kastel su kapia.

Tur aña Kastel Orava i su eksibishonnan ta hala dies di míles di bishitante for di hopi pais. Den e patio di e kastel, bishitantenan por mira algu di interes spesial ku a keda konserbá den un relieve di piedra di e eskudo di famia Thurzó. E relieve ta kontené e nòmber bíbliko di Dios—Yehova—na latin.