Duna Yunan Loke Nan Mester

PUES anto, mucha chikí klaramente tin mester di hopi atenshon, i evidensia ta mustra ku hopi di nan no ta hañando loke nan tin mester. E situashon di hóbennan djawe ta indiká presisamente esei. Un investigadó ku a ser sitá den e korant The Globe and Mail di Toronto, Canada, a lamentá: “Nunka promé nos hóbennan tabata asina isolá for di nan famianan, ku asina tiki eksperensia práktiko i sabiduria práktiko.”

Ta kiko a bai robes? Akaso por atribuí e problema, por lo ménos en parte, na e echo ku mayornan no a realisá e importansia di duna atenshon na nan yunan ora esakinan tabata hopi chikí? Un sikólogo ku ta yuda hende muhé di poko rekurso siña kuida nan yunan resien nasí, a splika: “Nos tur tin ku siña kon pa ta mama i tata. I nos tin ku realisá ku nos lo ser rekompensá ampliamente pa e tempu ku nos ta dediká awor na nos yunan.”

Asta beibinan mester di instrukshon regular. No simplemente un par di minüt de bes en kuando, sino ku regularidat, sí, henter dia. Tempu dediká na mucha chikí for di ora nan ta beibi en adelante, ta vital pa nan desaroyá sano.

Mester Hasi Preparashon

Pa por kumpli ku nan responsabilidat pisá, mayornan tin ku prepará pa e yegada di nan beibi. Nan lo por siña for di un prinsipio ku Hesukristu a trese dilanti relashoná ku e importansia di plania di antemano. El a bisa: “Kual di boso, ora ku e kier traha un toren, no ta sinta kalkulá e gastunan promé?” (Lukas 14:28) Kriamentu di un yu—ku hopi bes ta ser yamá un proyekto di 20 aña—ta muchu mas kompliká ku konstrukshon di un toren. P’esei pa kria un yu ku éksito nos mester tin, na moda di papia, un mapa òf plano pa e trabou.

Na promé lugá, ta importante pa hasi preparashon mental i spiritual pa karga e responsabilidatnan di mayor. Un estudio di 2.000 muhé na estado na Alemania a revelá ku e yunan di mamanan ku tabata ansioso pa forma un famia tabata muchu mas salú—tantu emoshonal- komo físikamente—ku e yunan di mamanan ku no tabata deseá nan beibi. Di otro banda, un investigadó a kalkulá ku un muhé ku ta den un matrimonio turbulento tin 237 porshento mas tantu chèns di duna lus na un beibi emoshonalmente òf físikamente perhudiká, ku un muhé ku ta den un relashon kaminda tin siguridat.

Pues, ta bisto ku tatanan ta importante pa un mucha por desaroyá bon. Dr. Thomas Verny a remarká: “Masha poko kos ta mas peligroso pa un mucha, emoshonalmente i físikamente, ku un tata ku ta abusá òf neglishá su kasá na estado.” Sí, hopi bes a ser komentá ku e mihó regalo ku un yu por haña ta un tata ku ta stima su mama.

Hormonnan relashoná ku ansiedat i strès, ku ta drenta den e mama su sanger, por afektá e feto. Sin embargo, evidensia ta parse di indiká ku ta solamente ansiedat maternal intenso òf prolongá ta peligroso, i no djis emoshonnan negativo òf susesonan yen di strès ku ta surgi de bes en kuando. E faktor mas importante aparentemente ta kon e mama na estado ta sinti pa ku e yu den su barika.a

Kiko bo tin ku hasi si bo ta na estado i bo esposo no ta apoyá bo, òf kiko si abo personalmente no ta kontentu ku e idea di bira mama? No ta algu straño ku sirkunstansianan por pone un muhé sintié deprimí ku e ta na estado. Sin embargo, semper kòrda ku no ta bo yu su falta. Pero kon bo por mantené un aktitut trankil apesar di sirkunstansianan difísil?

E guia sabí ku e Palabra di Dios ta perkurá, a yuda miónes di hende. Beibel ta bisa: “Den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” Lo bo keda sorprendí ku dor di apliká e palabranan ei lo bo por sigui e konseho aki: “No preokupá pa nada.” (Filipensenan 4:6, 7) Lo bo sinti e apoyo i kuido di e Kreadó, kende por perkurá pa bo.—1 Pedro 5:7.

No Ta un Eksperensia Poko Komun

Den e promé simannan despues di a duna lus, algun mama ta eksperensiá un tristesa i kurpa sin grasia ineksplikabel. Asta muhénan ku tabata kontentu ku nan tin un beibi por haña mal beis. E kambionan di beis ei no ta un kos straño. Esei ta pasobra despues di duna lus, muhénan por eksperensiá kambionan drástiko den nan nivel di hormon. Tambe ta komun ku un mama nobo ta sintié inundá pa e eksigensianan di maternidat: duna e beibi—ku no ta tene kuenta ku ora—kuminda, kambia su bruki i kuid’é.

Un mama tabata sinti ku su beibi ta yora djis pa torment’é. Nada straño ku un spesialista riba tereno di kriamentu di yu na Hapon a bisa: “Niun hende no ta liber di e strès asosiá ku kriamentu di yu.” Segun e spesialista aki, “e kos mas importante ta pa un mama nunka isolá su mes.”

Asta si un mama de bes en kuando ta sinti su mes deprimí, e por protehá su yu pa e yu no ser afektá dor di su kambio di beis. E revista Time a informá: “Mamanan deprimí ku a logra superá nan tristesa, i a duna nan beibi hopi atenshon i a hunga ku nan, tabatin yunan ku aktividat selebral di un naturalesa hopi mas alegre.”b

Kon un Tata Por Yuda

Tata di e beibi hopi bes ta den e mihó posishon pa duna e yudansa i apoyo nesesario. Ora ku e beibi ta yora meianochi, den hopi kaso e tata por atendé e beibi su nesesidatnan ya asina su kasá por drumi. Beibel ta bisa: “Esposonan, biba ku boso esposanan ku komprenshon.”—1 Pedro 3:7.

Hesukristu a pone un ehèmpel perfekto pa esposonan sigui. El a asta duna su bida pa su siguidónan. (Efesionan 5:28-30; 1 Pedro 2:21-24) Pues, esposo ku ta dispuesto pa sakrifiká nan propio komodidat pa asina mustra algun inisiativa den kriamentu di yu, ta imitando Kristu. Bon mirá, kriamentu di yu ta un ‘joint venture,’ un trabou di koperashon den kua ámbos mayor tin ku partisipá.

Un Trabou di Koperashon

Yoichiro, tata di un yu muhé di dos aña, a bisa: “Komo esposo i esposa, nos a papia detayadamente riba kon nos lo lanta nos yu muhé. Kada biaha ku un kuestion a presentá, nos a kòmbersá riba kiko nos lo bai hasi awor.” Yoichiro ta realisá ku su esposa tin mester di sufisiente sosiegu, i p’esei hopi bes ora Yoichiro ta bai hasi rospondi e ta bai ku su yu muhé.

Den pasado, tempu ku famianan normalmente tabata grandi i hopi será ku otro, yunan mas grandi i otro miembronan di famia tabata duna mayornan un man den kuido di yu. P’esei no ta un sorpresa ku un trahadó na e Sentro pa Apoyo den Kriamentu di Yu na Kawasaki, Hapon, a komentá: “Den mayoria kaso, mamanan lo sinti alivio ora nan papia ku otro hende tokante e asuntu. Ku djis un tiki yudansa, hopi mama a logra trata ku e situashon apesar di opstákulo.”

E revista Parents ta bisa ku mayornan “tin mester di un grupo di hende ku nan por akudí na dje pa ekspresá nan preokupashonnan.” Unda nan por haña un grupo di hende asina? Mama ku tata nobo por benefisiá bastante di nan propio mayornan òf suegronan dor di skucha nan i ta habrí pa nan sugerensianan. Klaru ku e wela- i tawelanan mester komprondé ku e desishon final ta sinta den man di e pareha hóben.c

Un otro rekurso ku mayornan hóben hopi bes por konta kuné ta rumannan den fe. Den e kongregashon lokal di Testigunan di Yehova, bo por haña hende ku tabatin hopi aña di eksperensia den kriamentu di yu i ku ta dispuesto pa skucha bo problemanan. Nan por duna bo algun sugerensia práktiko. Hopi bes, bo por pidi yudansa di “muhénan di edat”—manera Beibel ta yama esnan ku tin mas eksperensia den e bida kristian—ku ta dispuesto pa yuda muhénan mas hóben.—Tito 2:3-5.

Klaru ku mayornan mester ta selektivo ora nan ta skucha e opinion di otro hende. Yoichiro a bisa: “Diripiente, e hendenan rònt di nos a bira eksperto den edukashon di mucha.” Su kasá, Takako, a atmití: “Na promé instante, e sugerensianan ku otro hende tabata duna nos a molestiá mi, ya ku mi a sinti ku nan tabata kritiká mi falta di eksperensia komo mayor.” Sin embargo, dor di siña for di otro hende, hopi esposo i esposa a haña yudansa pa nan tin un punto di bista balansá den perkurá loke nan yunan mester.

E Mihó Yudansa Disponibel

Asta si ta parse ku no tin niun hende pa yuda bo, tin un fuente konfiabel di fortalesa. Esei ta Yehova Dios, esun ku a krea nos, esun kende su wowonan por mira asta e èmbrio òf “supstansia sin forma” di esnan ku nase riba tera. (Salmo 139:16) Manera ta pará skirbí den su Palabra, Beibel, Yehova a yega di bisa su pueblo di pasado: “Un muhé por lubidá su yu ku e ta kria na pechu, i no tene kompashon ku e yu di su mondongo? Esakinan por lubidá, ma ami sí lo no lubidá bo.”—Isaias 49:15; Salmo 27:10.

Nò, Yehova no ta lubidá mayornan. El a perkurá ekselente instrukshon pa nan den Beibel tokante kriamentu di yu. Por ehèmpel, un 3.500 aña pasá, e profeta di Dios, Moisés, a skirbi: “Stima SEÑOR bo Dios ku henter bo kurason, ku henter bo alma i ku tur bo forsa.” Anto Moisés a agregá: “E palabranan aki [inkluso e animashon pa stima Yehova i sirbié], ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.”—Deuteronomio 6:5-7.

Kiko segun bo ta e punto esensial di e instrukshon aki den e Palabra di Dios? No ta asina ku instruí bo yunan mester ta un proseso regular i kontinuo ku bo tin ku efektuá tur dia? De echo, no ta basta pa djis programá de bes en kuando e asina yamá tempu di kalidat pa bo chikitinnan. Siendo ku momentunan importante di komunikashon ta hopi bes spontáneo, bo mester sòru pa bo ta disponibel pa bo yunan riba un base regular. Dor di hasi esei lo ta posibel pa bo kumpli ku e mandamentu bíbliko: “Instruí un mucha den e kaminda ku e mester kana.”—Proverbionan 22:6.

Pa duna bo yunan e debido edukashon bo mester, entre otro kosnan, lesa pa nan na bos haltu. Beibel ta bisa nos ku Timoteo, un disipel di promé siglo, ‘tabata konosé e skrituranan santu for di infansia.’ Pues evidentemente su mama, Eunise, i su wela Loida, a lesa p’e na bos haltu ora ku e tabata beibi ainda. (2 Timoteo 1:5; 3:14, 15) Ta bon pa kuminsá hasi esaki asina ku bo kuminsá papia ku bo beibi. Pero kiko bo por lesa, i kon ta e mihó manera pa siña un beibi?

Laga bo yu tende bo lesa Beibel. Parse ku ta e Palabra di Dios nan a lesa pa Timoteo. Tambe tin bukinan disponibel ku ta laga mucha sera konosí ku Beibel mediante plachinan kolorido. Esaki ta yuda un mucha visualisá e kosnan ku Beibel ta siña. Por ehèmpel, tin Mi buki di relato bíblico i E homber mas importante cu hamás a biba. Mediante bukinan asina, siñansanan di Beibel a keda grabá den mente i kurason di miónes di chikitin.

Manera Beibel ta bisa, “yunan ta un herensia di SEÑOR; e fruta di barika ta un rekompensa.” (Salmo 127:3) Bo Kreadó a konfiá bo ku “un herensia,” un dushi beibi, ku por ta un fuente di orguyo i goso. En bèrdat kriamentu di yu, spesialmente pa nan bira alabadó di nan Kreadó, ta un karera rekompensador!

[Nota]

[Plachi na página 8]

Loke un mama ta sinti pa ku e yu den su barika ta hopi importante

[Plachi na página 9]

Ounke un mama nobo por eksperensiá kambio di beis despues di parto, tin hopi kos ku e por hasi pa laga su yu sinti su mes stimá i protehá

[Plachi na página 10]

Tatanan tin e responsabilidat di yuda den e kuido di yu

[Plachi na página 10]

Mester kuminsá lesa pa un mucha for di infansia