Mata Ta un Fuente Balioso di Remedi

Ekspertonan ta kalkulá ku un kuart di tur remedi moderno ku hende ta dependé di dje a originá—kompletu òf en parte—komo kímiko ku bo ta haña den mata. Hopi bes hende ku ta promové vários remedi di yerba ta menshoná e echo aki.

Mayoria investigashon ku hende ta hasi riba matanan medisinal ta ku e meta pa separá e ingredientenan ku tin un efekto terapéutiko. Un ehèmpel prinsipal di un ingrediente asina ta aspirin, ku ta ser derivá for di salisin, un supstansia ku bo ta haña den e kaska di palu di wilg blanku.

Unabes ku separá e ingredientenan terapéutiko ku bo ta haña den un mata, dòkter por duna pashènt e ingrediente den un dósis adekuá i mas presis. Un buki di referensia a deklará: “Ta hopi mas fásil pa tuma un píldora pa logra bon resultado ku kome supstansia natural. Por ehèmpel, ta hopi mas trabou pa tuma sufisiente kaska di wilg pa logra e benefisionan ku aspirin ta duna òf pa tuma sufisiente blachi di vingerhoekskruid (foxglove) pa logra e pleno efektonan di salba bida ku digitális [un ingrediente ku ta ser usá pa trata problema di kurason] por tin.”

Na otro banda, ora separá e ingrediente terapéutiko di un mata medisinal esei por tin su desbentahanan. Un di nan ta ku bo por pèrdè tur otro benefisio nutritivo i posiblemente medisinal ku otro supstansianan den e mata tin. Es mas, algun organismo ku ta kousa malesa a bira resistente pa e remedi ku ta usa pa kombatí nan.

Kinina, un supstansia derivá for di kaska di e kinaboom, ta un ehèmpel di e desbentahanan di separá e ingrediente terapéutiko di un mata medisinal. Ounke kinina ta mata un porsentahe grandi di parasit ku ta kousa malaria, e parasitnan ku e no ta mata ta bira mas i mas hopi segun ku otro parasit ta muri. Un buki di referensia a splika: “E resistensia ei a bira un preokupashon grandi den medisina.”

[Plachinan na página 23]

Aspirin ta ser optené for di e palu aki di “wilg” blanku

[Rekonosementu]

USDA-NRCS PLANTS Database/Herman, D.E. et al. 1996. North Dakota tree handbook

[Plachinan na página 23]

“Kinaboom,” for di kua nan ta optené kinina

[Rekonosementu]

Kortesia di Satoru Yoshimoto