3 Rèspèt

LOKE ESAKI TA NIFIKÁ

Parehanan kasá ku tin rèspèt pa otro ta mustra kariño na otro asta ora nan tin un desakuerdo. E buki Ten Lessons to Transform Your Marriage ta bisa: “E parehanan akí no ta bira kabesura. Nan ta sigui papia ku otro tokante e problema. Nan ta skucha e punto di bista di otro ku rèspèt i ta trata na yega na un solushon kumbiniente pa nan tur dos.”

PRINSIPIO DI BEIBEL: “Amor . . . no ta buska su mes interes.”—1 Korintionan 13:4, 5.

“Segun mi, mustra rèspèt pa mi kasá ta enserá ku mi ta balor’é i ku mi no ke hasi nada ku ta kousa ni e ni nos matrimonio daño.”—Micah.

DIKON ESEI TA IMPORTANTE?

Si parehanan kasá no tin rèspèt pa otro, nan lo kuminsá papia ku otro na un manera krítiko, sarkástiko i asta ku despresio, lokual segun ekspertonan ta un di e promé indikashonnan ku e matrimonio probablemente lo terminá den divorsio.

“Ora bo rebahá bo kasá, insult’é na un manera fini òf hasi chèrchi di dje, esei lo pon’é pèrdè balor propio i konfiansa den bo i esaki lo por kousa daño na bo matrimonio.”—Brian.

LOKE BO POR HASI

PUNTRA BO MES:

Promé, presta atenshon na loke bo ta bisa i hasi pa un siman. Despues, hasi bo mes e siguiente preguntanan:

• Kuantu biaha mi a kritiká mi kasá i kuantu biaha mi a elogi’é?

• Den ki manera spesífiko mi a mustra rèspèt pa mi kasá?

PAPIA KU OTRO TOKANTE LO SIGUIENTE:

• Ki palabra i akshon boso ta konsiderá respetuoso?

• Ki palabra i akshon boso no ta konsiderá respetuoso?

ALGUN SUGERENSIA

• Traha un lista chikitu di tres punto ku lo bo ke pa bo kasá traha ariba pa mustra rèspèt na bo. I laga bo kasá hasi meskos. Interkambiá boso listanan i traha riba e tres puntonan ei.

• Traha un lista di e kualidatnan ku bo ta gusta di bo kasá. I despues, bisa bo kasá kuantu bo ta gusta e kualidatnan ei.

“Segun mi, mustra rèspèt pa mi esposo ta enserá demostrá pa medio di mi akshonnan ku mi ta balor’é i ku mi ke p’e ta felis. No ta semper mi mester hasi algu grandi, hopi biaha ta e kosnan chikitu ku mi ta hasi p’e òf bis’é ta demostrá ku mi ta respet’é di bèrdat.”—Megan.

Pero al fin i al kabo, no ta un kuestion di si abo ta konsiderá bo mes respetuoso sino si bo kasá ta haña bo respetuoso òf nò.

PRINSIPIO DI BEIBEL: “Bisti tierno kompashon, bondat, humildat, suavedat i pasenshi.”—Kolosensenan 3:12.