Kon pa Bira un Hende Responsabel

KIKO SER RESPONSABEL TA NIFIKÁ?

Hende responsabel ta konfiabel. Ora bo pidi un hende responsabel hasi algu, bo sa ku nan lo hasi e tarea ei bon i ku nan lo kab’é na tempu.

For di chikitu un mucha por kuminsá siña kon pa bira un persona responsabel. E buki Parenting Without Borders ta bisa: “Ora un mucha hasi un aña i tres luna, ya e por kuminsá yuda ku algun trabou di kas, i ora e hasi un aña i mei, e ta kuminsá haña deseo pa hasi trabou di kas. Den hopi kultura, ora e mucha tin entre sinku ku shete aña, nan mayornan ta kuminsá mustra nan kon nan por yuda ku trabounan di kas. Aunke nan ta hopi chikitu ainda, nan por siña hasi vários tarea bon.”

DIKON TA IMPORTANTE PA TA RESPONSABEL?

Den algun pais, hopi adulto hóben ta purba bai biba riba nan mes, pero hopi bes kos ta bira duru pa nan i nan ta bai biba bèk serka nan mama ku nan tata. Den algun kaso esaki ta sosodé pasobra e hóben nunka no a siña manehá plaka, hasi trabou di kas ni kumpli ku responsabilidat di tur dia.

P’esei, ta bon pa siña bo yunan for di chikitu pa nan por bira personanan responsabel, ya asina nan por para riba nan pia ora nan bira adulto. E buki How to Raise an Adult ta bisa: “Lo bo no ke pa bo yunan dependé di bo te ora nan hasi diesocho aña, anto despues laga nan enfrentá mundu real di gòlpi, i e ora ei numa laga nan enfrentá e realidatnan di bida.”

KIKO POR YUDA BO YU PA E POR BIRA RESPONSABEL?

Duna nan trabou di kas pa hasi.

PRINSIPIO DI BEIBEL: “Den tur trabou tin ganashi [òf, “bentaha,” NW].”—Proverbionan 14:23.

Mucha semper ta deseá di hasi loke su mayornan ta hasi. Probechá di e deseo ku nan tin ei i laga nan hasi algun trabou di kas.

Tin mayor no ke laga nan yunan hasi trabou di kas pasobra nan ta pensa ku e muchanan tin hopi hùiswèrk i nan no ke pone mas karga riba nan.

Pero mucha ku ta hasi trabou di kas lo bai mihó na skol pasobra nan ta siña kuminsá i kaba kualke tarea ku nan haña pa hasi. Ademas, e buki Parenting Without Borders ta bisa: “Si nos ignorá e deseo ku yunan tin pa yuda ora nan ta chikitu, nan ta kuminsá pensa ku yuda otro hende no ta importante . . . Nan ta kuminsá spera tambe ku nos tin ku hasi tur kos pa nan.”

Manera e buki ei ta mustra, ora nos yunan ta hasi trabou di kas riba un base regular, nan ta siña yuda otro hende i pa no ta egoista. Ora nan ta kumpli ku tareanan di kas, nan ta sinti ku nan ta un parti importante di e famia i lo komprondé ku nan tin ku kumpli ku nan responsabilidatnan.

Yuda bo yu mira ku tin konsekuensia ora e hasi fout.

PRINSIPIO DI BEIBEL: “Skucha konseho i aseptá disiplina, pa bo por ta sabí pa restu di bo bida.”—Proverbionan 19:20.

Ora bo yu hasi algu robes, manera por ehèmpel si e kibra algu di un otro hende, no tapa p’e. E por karga e konsekuensia. Den e kaso akí, e por pidi despensa i kisas asta paga p’e daño ku el a kousa.

Ki benefisio bo yu ta risibí ora e siña karga konsekuensia di su foutnan?

• E ta siña ku e mester ta onesto i atmití su foutnan.

• E lo no kulpa otro hende.

• E lo no bini ku èksküs.

• E lo bisa despensa ora ta nesesario.