Kiko Ta Strès?

Strès ta un reakshon di e kurpa humano na situashon masha difísil. E selebro ta manda un gran kantidat di hormona pa henter e kurpa. E hormonanan ta pone bo kurason bati mas duru, subi bo preshon, pone bo hala rosea mas lihé i pone bo spirnan bira tenso. Promé ku bo realisá kiko ta pasando, ya bo kurpa a hasi tur e kosnan ei pa prepará bo pa tuma akshon. Ora e situashon ku ta kousa strès pasa, tur kos den bo kurpa ta normalisá atrobe.

STRÈS TIN SU BANDA BON I SU BANDA MALU

Strès ta un reakshon normal di e kurpa ku ta yuda bo enfrentá situashon peligroso òf difísil. E proseso akí ta kuminsá den bo selebro. Strès ku ta bon ta yuda bo reakshoná lihé. Ademas, un sierto grado di strès por yuda bo logra bo metanan òf hasi sierto kos mas mihó, manera entre otro eksámen, entrevista òf deporte.

Pero di otro banda, demasiado strès, strès pa un tempu muchu largu òf strès króniko por kousa bo daño. Si bo kurpa kada bes òf konstantemente tin ku prepará bo pa enfrentá situashon difísil, bo por sufri daño físiko, emoshonal i mental. Bo komportashon i bo manera di trata hende por kambia. Ademas, hende ku ta sufri di strès króniko hopi biaha ta kuminsá bebe di mas, usa droga, abusá di remedi, kome di mas, huma, etcetera. Otro konsekuensia por ta ku e persona por kuminsá sintié deprimí, haña burnout òf kuminsá pensa riba suisidio.

Aunke strès no tin e mesun efekto riba tur hende, e por kousa vários malesa i afektá kasi tur parti di e kurpa.