Ki Efekto Teknologia Tin Riba Bo Amistat Ku Otro Hende?

Awe ta mas fásil ku nunka pa dos hende komuniká ku otro aunke nan ta biba leu for di otro, pasobra nan por usa mensahe di telefòn, e-mail, konferensia di vidio i ret sosial. Pa nan, teknologia ta un hèrmènt ku ta benefisiá nan. Sinembargo, pa algun hende teknologia a bira e manera prinsipal pa komuniká ku nan amigunan.

E hendenan ei por haña nan ku e siguiente problemanan:

Nan ta mustra ménos empatia pa nan amigunan.
Nan ta sinti nan mes so i desanimá.
Nan ta pensa mas riba nan mes ku riba otro hende.

LOKE TA BON PA BO SA

Un mucha muhé tiner ta lat anochi riba ret sosial. Loke e ta bezig ta wak ya tin 723.000 views.

EMPATIA

Pa nos por demostrá empatia, nos mester para ketu un ratu i pensa riba sintimentu di otro hende. Esei por parse difísil pa hasi si konstantemente nos ta manda i lesa mensahe di telefòn i ta wak kos riba ret sosial.

Si bo ta haña hopi mensahe, ta bira difísil pa kontestá un mensahe di bo amigu. Ora nos haña asina tantu mensahe, kisas nos lo sinti ku nos tin ku djis kontestá lihé lihé i e ora ei por ta difísil pa ripará ku un amigu tin mester di yudansa.

PENSA RIBA ESAKI: Kon bo por mustra bo amigunan ku di bèrdat bo ta interesá den nan ora bo ta manda nan mensahe elektróniko?—1 PEDRO 3:8.

DESANIMASHON

Algun sientífiko a hasi un investigashon ku a mustra ku hende ta sinti mas malu despues ku nan pasa tempu riba ret sosial. E sientífikonan a yega na e konklushon ku ora un hende keda mira potrèt di loke otro hende ta hasi, “e por sinti ku e mes no a hasi nada signifikante.”

Ademas, ora hende keda mira potrèt interesante ku otro hende a pone, nan por sinti ku nan bida no ta dje interesante ei. Esei ta pasobra ret sosial por duna e impreshon ku otro hende semper ta pasa bon, i e ora ei nos bida por parse laf.

PENSA RIBA ESAKI: Kon bo por evitá di kompará bo mes ku otro hende ora bo ta usa ret sosial?—GALATIONAN 6:4.

BO TA PENSA MUCHU RIBA BO MES

Un yùfrou a skirbi ku algun di su studiantenan tabata egoista i tabata interesá solamente den amigu ku ta hasi kos pa nan. Nan tabata enfoká riba loke nan por saka for di e amistat. Un persona por kuminsá pensa ku su amigunan ta manera un kòmpiuter ku e por sende ora e tin mester di dje i paga ora e no tin mester di dje.

PENSA RIBA ESAKI: Loke bo ta pone online ta mustra ku bo tin e tendensia di kompetí ku otro hende òf di pensa demasiado riba bo mes?—GALATIONAN 5:26.

KIKO BO POR HASI?

PENSA KI EFEKTO TEKNOLOGIA TIN RIBA BO

Pa bo por keda den kontakto ku bo amigunan i fortalesé bo amistatnan, bo mester tene teknologia na su debido lugá.

PRINSIPIO DI BEIBEL: “Amor . . . no ta buska su mes interes.”—1 KORINTIONAN 13:4, 5.

Marka kua di e sugerensianan aki bou bo tin gana di apliká, òf skirbi algu otro ku bo ke hasi.

Purba di papia ku hende en bes di djis manda mensahe òf e-mail
Warda bo telefòn (òf pon’é riba silensio) ora bo ta kòmbersá ku otro hende
Pone un límite na e kantidat di tempu ku bo ta pasa riba ret sosial
Bira un mihó skuchadó
Tuma kontakto ku un amigu ku ta pasando den tempu difísil