Kon Bo Por Sa Kiko Ta Bèrdat?

Ta Dios a krea universo i bida òf nan a bini for di nada? E palabranan di e dos sientífikonan ku nos a lesa na komienso di e artíkulo akí i e palabranan den Beibel na Génesis 1:1 ta duna dos kontesta kompletamente diferente pa e pregunta ei. Hende ta apoyá tur dos punto di bista. Tin hende ta konvensí ku e punto di bista ku nan ta apoyá ta korekto, pero tòg tin hopi hende ku no ta sigur. Hende ta diskutí tokante e tópiko akí den hopi buki konosí i programa di televishon.

Kisas bo maestronan di skol a bisa ku konfiansa ku no tin un Kreador i ku universo i bida a bini for di nada. Pero bo maestronan tabatin evidensia pa mustra bo ku no tin un Kreador? Di otro banda, kisas bo a yega di tende lider religioso bisa ku tin un Kreador. Pero nan tabatin evidensia pa komprobá loke nan a bisa? Òf nan a bisa ku bo mester tin “fe” i djis kere den Dios sin evidensia?

Probablemente, bo a pensa tokante e pregunta ei. I kisas bo ta sinti ku niun hende no por bisa sigur si tin un Kreador òf nò. I bo por puntra bo mes tambe: Ta realmente importante pa sa e kontesta?

E edishon akí di Spièrta! lo trata algun evidensia ku a konvensé hopi hende ku tin un Kreador. Ademas, lo e splika dikon e kontesta tokante e orígen di bida ta importante.