MUNDU TA UN KÁOS

3 | Fortalesé Bo Relashon ku Esnan Ku Bo Ta Stima

DIKON ESEI TA IMPORTANTE?

Komo ku mundu ta un káos, hende por sinti nan mas i mas anshá, i sin ku nan sa, e ansiedat ei por afektá nan relashon ku otro hende.

Hende ta isolá nan mes for di nan amigunan.
Parehanan kasá ta trata otro mas i mas malu.
Mayornan kasi no ta tuma tempu pa sa loke ta preokupá nan yunan.

Loke Ta Bon pa Bo Sa

Ta importante pa nos tin amigu, pasobra nan ta yuda nos trata ku strès spesialmente den tempu difísil.
E problemanan den mundu ta kousa strès ku por afektá abo i bo famia den manera ku kisas bo no ta spera.
Ora bo yunan skucha òf mira notisia di kosnan malu ku ta sosodé, esei por afektá nan mas di loke bo ta pensa.

Loke Bo Por Hasi Awor

Beibel ta bisa: “Un berdadero amigu ta stima semper; e ta un ruman ku bo por konta kuné den tempu difísil.”—Proverbionan 17:17.

Nos amigunan por yuda nos i duna nos bon konseho. E tipo di amigunan amoroso ei por yuda nos haña e forsa ku nos tin mester pa trata ku e difikultatnan di tur dia.

KIKO BO POR HASI?—Algun Sugerensia Práktiko

Loke bo por hasi pa fortalesé bo relashon ku esnan ku bo ta stima den tempu di krísis i kalamidat

FORTALESÉ BO MATRIMONIO

Fortalesé bo matrimonio

Beibel ta bisa: “Dos ta mihó ku un . . . Si un di nan kai, e otro persona por yud’é lanta.” (Eklesiástes 4:9, 10) Parehanan kasá mester traha komo piloto i ko-piloto riba e mesun avion ku ta bai den e mesun direkshon, i no komo dos avion di guera ku ta purba di tumba otro.

Sea determiná pa no baha bo strès riba bo kasá. Purba di tene pasenshi ku otro.
Purba di papia ku otro, a lo ménos un biaha pa siman, tokante kualke problema ku por presentá. Kòrda ku e meta ta pa resolvé e problema i no pa ataká otro.
Apartá tempu pa hasi kos huntu ku boso tur dos ta gusta.
Pensa riba e dushi tempu ku boso a yega di pasa huntu, kisas boso por wak potrèt di boso kasamentu òf di otro okashon spesial.

“Kisas no ta semper un pareha ta di akuerdo riba tur kos, pero esei no ke men ku nan no por traha huntu komo tim. Un pareha por tuma desishon huntu i despues traha huntu pa e desishon ei por tin éksito.”—David.

SIGUI FORTALESÉ BO AMISTATNAN

Sigui fortalesé bo amistatnan

Nos amigunan ta apoyá nos, pero nos tambe mester pensa riba manera ku nos por apoyá nan. Ora bo fortalesé otro hende, bo ta fortalesiendo bo mes.
Tuma kontakto ku algun di bo amigunan tur dia pa wak kon ta ku nan.
Puntra bo amigunan kon nan a trata ku difikultatnan ku ta similar na esnan ku abo ta pasando aden.

“Ora tormentanan pisá di atversidat ta hasié difísil pa nos mira, nos amigunan ta yuda nos sa unda nos ta i unda nos tin ku bai. Tin biaha, nan tin ku djis kòrda nos kosnan ku nos sa kaba. Bo amigunan ta stima bo, i nan sa ku bo tambe ta stima nan.”—Nicole.

MUSTRA INTERES DEN BO YUNAN I YUDA NAN

Mustra interes den bo yunan i yuda nan

Beibel ta bisa: “Hende mester ta kla pa skucha, slo pa papia.” (Santiago 1:19) Na promé instante, kisas bo yu ta duda si e mester laga bo sa kiko ta dun’é miedu i kiko ta preokup’é. Pero, si bo ta skuch’é ku pasenshi, lo ta mas fásil pa e papia tokante su sintimentunan.

Hasi sigur ku bo yu ta sintié kómodo, pa asina e por papia tokante su sintimentunan. Tin mucha ta sinti ku ta mas fásil pa nan papia ora ku nan ta relahá. Pues, kisas bo por purba di papia ku bo yu ora boso ta kore den outo òf kana, en bes di djis sinta kara-kara kuné.
Hasi sigur ku bo yu no ta mira demasiado notisia tokante kos ku por preokup’é.
Laga bo yu sa ki plan boso a traha pa asina boso famia por ta safe.
Traha un plan pa ora tin emergensia i praktik’é huntu ku bo yu.

“Papia ku bo yunan, i laga nan ekspresá kon nan ta sinti. Kisas nan no ta bisa bo e kosnan ku ta duna nan miedu òf ansiedat òf ku ta pone nan rabia. Laga nan sa ku abo tambe ta lucha ku e mesun sintimentunan ei, i bisa nan kon abo a trata ku e tipo di sintimentunan ei.”—Bethany.