Dikon Hende No Tin Rèspèt Mas pa Otro Hende?

DIKON TA IMPORTANTE PA MUSTRA RÈSPÈT NA OTRO HENDE

Ora nos mustra rèspèt na otro hende, esei por kalma un situashon tenso i evitá ku un situashon malu ta bira pió.

Un proverbio den Beibel ta bisa: “Un kontesta suave ta kalma rabia, pero palabra ku ta kousa doló ta lanta rabia.” (Proverbionan 15:1) Ora hende papia òf hasi kos ku ta mustra falta di rèspèt, ta komo si fuera nan ta basha gasolin riba kandela i hopi biaha esei ta hiba na konsekuensia desastroso.
Hesus a bisa: “Di loke kurason ta yen di dje, boka ta papia.” (Mateo 12:34) Si nos no mustra rèspèt na otro hende ora nos ta papia ku nan, esei por revelá ku tin un problema mas serio. Esei por indiká kon realmente nos ta sinti pa hende di otro rasa, tribu, nashonalidat òf posishon sosial.

Segun un enkuesta ku a hasi resientemente bou di 32.000 partisipante den 28 pais, 65 porshento di nan a bisa ku hamas nan a mira asina tantu falta di rèspèt entre hende.

LOKE BO POR HASI

Sea ku bo ta na skol òf na trabou, respetá tur hende, asta hende ku no tin mesun punto di bista ku bo. Buska kos ku boso por tin en komun. Esei lo yuda bo evitá di kritiká òf husga un persona.

“Stòp di husga, pa boso no ser husgá.”—Mateo 7:1.

Trata otro hende manera bo ke pa nan trata bo. Si bo ta trata otro hende bon i na un manera hustu, e chèns ta grandi ku nan lo trata bo meskos.

“Manera boso ke pa hende hasi ku boso, boso mester hasi meskos ku nan.”—Lukas 6:31.

Sea kla pa pordoná. No pensa mesora ku un persona ku a ofendé bo a hasi esei pa malu. Kisas no tabata su intenshon. P’esei, lo ta mihó pa laga e ofensa pasa.

“Un hende ku perspikasia no ta rabia lihé, i ta bunita di su parti ku e ta laga un ofensa pasa.”—Proverbionan 19:11.

Parti paden di un Salòn di Reino di Testigunan di Yehova nèt promé ku reunion kuminsá. Hende di diferente edat i kultura ta kumindá otro i papia ku otro.

LOKE NOS TA HASI

Testigunan di Yehova ta konosí pa e manera ku nan ta promové rèspèt, tantu kaminda nan ta biba komo kaminda nan ta traha.

Nos ta ofresé kurso di Beibel grátis na tur hende, pero nunka nos lo obligá hende aseptá nos kreensianan òf nos punto di bista. En bes di esei, nos ta sigui e konseho ku tin den Beibel pa prediká na hende “na un manera suave i ku rèspèt profundo.”—1 Pedro 3:15; 2 Timoteo 2:24.

Nos no ta diskriminá hende. Tur hende ku ke siña loke Beibel ta bisa ta bonbiní na nos reunionnan, sin importá ki nashonalidat òf posishon sosial nan tin. Nos ta hasi esfuerso pa “respetá tur hende,” asta si nos no ta di akuerdo ku e desishonnan ku nan ta tuma.—1 Pedro 2:17, Beibel na papiamentu koriente.

Nos ta respetá e leinan di gobièrnu kaminda nos ta biba. (Romanonan 13:1) Nos ta obedesé lei i paga belasting. Maske nos ta keda neutral den asuntu polítiko, nos ta respetá e derecho ku otro hende tin pa tuma nan propio desishonnan pa loke ta trata asuntu polítiko.