E Promé Hòmber i Muhé

KIKO ta diferente riba e plachi aki? Esei ta e hendenan. Nan ta e promé hòmber i muhé. Ken a traha nan? Dios. Bo sa su nòmber? Su nòmber ta Yehova. I e hòmber i e muhé a yega di ser yamá Adam ku Eva.

Esaki ta e manera ku Yehova Dios a traha Adam. El a tuma stòf di tera i ku esei el a forma un kurpa perfekto, un kurpa di hende hòmber. Anto el a supla den nanishi di e hòmber, i Adam a risibí bida.

Yehova Dios tabatin un trabou pa Adam. El a bisa Adam duna nòmber na tur e diferente sortonan di animal. Kisas Adam a wak e bestianan pa basta tempu pa e duna e mihó nòmber na kada un. Miéntras ku Adam tabata duna e bestianan nòmber, el a kuminsá ripará algu. Bo sa kiko el a ripará?

Tur bestia tabatin kompañé. Tabatin olefante tata i olefante mama, i tabatin leon tata i leon mama. Pero Adam so a keda sin kompañé. P’esei Yehova a laga Adam bai un soño profundo, i el a tuma un repchi di su kustia. Usando e repchi aki, Yehova a traha un muhé pa Adam, i el a bira su esposa.

Ki felis Adam a keda awor! Anto imaginá bo kon felis Eva a keda ya ku Dios a lag’é biba den un hòfi bunita asina! Awor nan por a haña yu i biba huntu den felisidat.

Yehova tabata ke pa Adam ku Eva biba pa semper. E tabata ke pa nan hasi henter e tera mes bunita ku e hòfi di Edén. Ki felis Adam ku Eva mester a keda ora nan a pensa di hasi esei! Abo lo tabatin gana di yuda hasi tera un hòfi bunita? Pero e felisidat di Adam ku Eva no a dura. Laga nos mira pakiko.