For di Diluvio te na Liberashon for di Egipto

Ocho hende so a sobrebibí Diluvio, pero ku tempu nan a oumentá na kantidat te bira hopi míles. Anto 352 aña despues di Diluvio, Abraham a nase. Nos lo siña kon Dios a kumpli ku su promesa dunando Abraham un yu ku a ser yamá Isaak. Anto, di e dos yunan di Isaak, Dios a skohe Jakòb.

Jakòb tabatin un famia grandi di 12 yu hòmber i algun yu muhé. Dies yu hòmber di Jakòb a odia Hosé, un ruman chikí di nan, i nan a bend’é pa e bira esklabo na Egipto. Despues, Hosé a bira un gobernante importante di Egipto. Ora un hamber grandi a bini, Hosé a pone su rumannan na prueba pa e mira si nan kurason a kambia. Finalmente, tur e famia di Jakòb, e israelitanan, a bai biba na Egipto. Esei a sosodé 290 aña despues di nasementu di Abraham.

Durante e siguiente 215 añanan e israelitanan a biba na Egipto. Despues di morto di Hosé, nan a bira esklabo ei. Ku tempu Moisés a nase, i Dios a us’é pa liberá e israelitanan for di Egipto. En total, Parti DOS ta kubri 857 aña di historia.