Un Ladron Den Israel

MIRA loke e hòmber ei ta dera den su tènt! Un mantel bunita, i un bara di oro i algun pida plata. El a kohe nan for di e stat Jeriko. Pero, kiko nan mester a hasi ku e kosnan di Jeriko? Bo ta kòrda?

Nan mester a destruí nan, i e oro i plata mester a ser duná na e tesoro di e tabernakel di Yehova. Pues, e hendenan ei a desobedesé Dios. Nan a hòrta loke ta pertenesé na Dios. E nòmber di e hòmber ta Akan, i e hendenan huntu kuné ta miembronan di su famia. Laga nos mira kiko a sosodé.

Despues ku Akan a hòrta e kosnan ei, Josué a manda algun hòmber pa bringa kontra e stat Ai. Pero nan a ser derotá den bataya. Algun a ser matá, i otronan a kore bai. Josué a keda masha tristu. El a tira su kurpa abou ku kara na suela i a puntra Yehova den orashon: ‘Pakiko bo a laga e kos aki sosodé ku nos?’

Yehova a kontestá: ‘Lanta ariba! Israel a peka. Nan a kohe algun di e kosnan ku nan mester a destruí òf duna na e tabernakel di Yehova. Nan a hòrta un mantel bunita i a tene esei sekreto. Lo mi no bendishoná bo te ora bo destruí e mantel i tambe e hende ku a hòrta e kosnan ei.’ Yehova a bisa ku lo e mustra Josué ken ta e mal hende.

P’esei Josué a reuní henter e pueblo, i Yehova a indiká ku e mal hende ta Akan. Akan a bisa: ‘Mi a peka. Mi a mira un mantel bunita, i un bara di oro i e pida platanan. Mi tabata ke nan asina tantu ku mi a kohe nan. Bo por haña nan derá den mi tènt.’

Ora ku nan a haña e kosnan i a hiba nan pa Josué, el a puntra Akan: ‘Pakiko bo a trese difikultat pa nos? Awor Yehova lo manda difikultat pa bo!’ E ora ei henter e pueblo a piedra Akan i su famia mata. Esei no ta mustra ku nunka nos no mag kohe loke no ta di nos?

Despues Israel a sali pa bai bringa kontra Ai atrobe. E biaha ei Yehova a yuda su pueblo, i nan a gana e bataya.