E Hòmber Mas Fuerte

BO SA e kon yama e hòmber mas fuerte ku a yega di biba? Esei tabata un hues ku yama Samson. Yehova ta esun ku a duna Samson su forsa. Asta promé ku Samson a nase, Yehova a bisa su mama: ‘Pronto lo bo haña un yu hòmber. E lo hiba delantera den salba Israel for di e filisteonan.’

E filisteonan tabata mal hende ku tabata biba na Kánaan. Nan tabatin hopi hòmber di guera, i nan a hasi e israelitanan hopi daño. Un biaha ora Samson tabata bayendo kaminda e filisteonan tabata biba, un leon grandi a sali ta gruña kontra dje. Pero Samson a mata e leon ku su man bashí. Tambe el a mata sientos di mal filisteo.

Despues, Samson a enamorá di un muhé yamá Dalila. E hefenan filisteo a primintí ku kada un lo duna Dalila 1.100 pida plata pa e bisa nan ta kiko a hasi Samson asina fuerte. Dalila tabata ke e plaka. E no tabata un berdadero amiga di Samson, ni di e pueblo di Dios. P’esei el a keda puntra Samson kiko a hasié asina fuerte.

Finalmente Dalila a logra hasi Samson bis’é e sekreto di su forsa. Samson a bisa: ‘Mi kabei no a ser kòrtá nunka. For di tempu ku mi a nase Dios a skohe mi pa ser un sirbidó spesial p’e yamá nazareo. Si mi pela, mi ta pèrdè mi forsa.’

Wèl, ora Dalila a tende esei, el a hasi Samson drumi riba su skochi. Anto el a yama un hòmber pa e drenta i kòrta su kabei. Ora Samson a lanta for di soño, ya el a pèrdè su forsa. Anto e filisteonan a drenta i a koh’é. Nan a saka su wowonan, i a hasié nan esklabo.

Un dia e filisteonan a tene un fiesta grandi pa adorashon di nan dios Dagon, i nan a saka Samson for di prizon pa nan tene mofa di dje. Miéntras tantu, Samson su kabei a krese bèk. Samson a bisa e mucha hòmber ku tabata gui’é na man: ‘Laga mi fula e pilarnan ku ta wanta e edifisio.’ Anto Samson a pidi Yehova dun’é forsa, i el a gara e dos pilarnan. El a grita: ‘Laga mi muri huntu ku e filisteonan.’ Tabatin 3.000 filisteo na e fiesta, i ora Samson a pone forsa kontra e dos pilarnan, e edifisio a kai i a mata tur e mal hendenan.