Jezabel—Un Reina Malbado

DESPUES di morto di Rei Jeroboam, tur rei ku a goberná e reino di 10 tribu di nort tabata malu. Rei Akab tabata esun pió. Bo sa pakiko? Un di e motibunan prinsipal ta su kasá Jezabel, e reina malbado.

Jezabel no tabata israelita. E tabata yu muhé di e rei di Sidon. E tabata adorá e dios falsu Baal, i el a pone Akab i hopi israelita tambe adorá Baal. Jezabel tabata odia Yehova i a mata hopi profeta di dje. Otro profetanan a skonde den kueba pa nan no ser matá. Ora Jezabel tabata ke un kos, e por a asta mata hende pa hañ’é.

Un dia Rei Akab tabata sintié masha tristu. P’esei Jezabel a puntr’é: ‘Pakiko bo ta tristu awe?’

Akab a kontestá: ‘Dor di loke Nabot a bisa mi. Mi kier a kumpra su kunuku di wendrùif. Pero el a bisa mi ku mi no por hañ’é.’

‘No preokupá bo,’ Jezabel a bisa. ‘Mi ta sòru pa bo hañ’é.’

Pues, Jezabel a skirbi algun karta na e hòmbernan prinsipal di e stat kaminda Nabot tabata biba. ‘Buska un par di hòmber ku no ta sirbi pa nada, pa nan bisa ku Nabot a plega Dios i e rei,’ Jezabel a bisa nan. ‘Anto hiba Nabot pafó di e stat i piedr’é mata.’

Asina ku Jezabel a tende ku Nabot tabata morto, el a bisa Akab: ‘Awor bai i tuma su kunuku di wendrùif.’ Bo no ta kere ku Jezabel mester a haña kastigu pa un kos asina teribel?

Pues, ku tempu, Yehova a manda e hòmber Jehú pa kastig’é. Ora Jezabel a tende ku Jehú ta bini, el a pinta su wowo i a drecha su mes pa e keda bunita. Pero ora ku Jehú a yega i a mira Jezabel sintá den bentana, el a grita e hòmbernan den e palasio: ‘Tir’é abou!’ E hòmbernan a obedesé, manera bo ta mira riba e plachi. Nan a tir’é abou i el a muri. Esei tabata e fin di e reina malbado Jezabel.