Dios Su Pueblo A Sali for di Babilonia

KASI dos aña a pasa desde ku medo- i personan a dominá Babilonia. I mira loke ta sosodé awor! Sí, e israelitanan ta saliendo for di Babilonia. Kon nan a haña nan libertat? Ken a laga nan bai?

Siro, rei di Persia, a hasi esei. Hopi tempu promé ku Siro a nase, Yehova a laga profeta Isaias skirbi tokante dje: ‘Lo bo hasi nèt loke ami ke. E portanan di e stat lo keda habrí pa bo por kapturá e stat.’ Anto Siro en bèrdat a dirigí e derota di Babilonia. E medo- i personan a drenta e stat den anochi dor di porta ku hende a laga habrí.

Pero Isaias, e profeta di Yehova, a bisa tambe ku Siro lo duna òrdu pa Yerusalèm i su tèmpel ser reedifiká. Siro a duna e òrdu ei? Sí. Esaki ta loke Siro a bisa e israelitanan: ‘Awor, bai Yerusalèm i traha e tèmpel di Yehova boso Dios.’ I e israelitanan ei ta riba kaminda pa bai hasi nèt esei.

Pero no ta tur e israelitanan na Babilonia por a hasi e biahe largu pa bai Yerusalèm bèk. E kaminda ta masha largu, rònt di 800 kilometer, i hopi di nan tabata muchu bieu òf enfermo pa hasi un biahe largu. I tabatin mas motibu pakiko algun hende no por a bai. Pero Siro a bisa esnan ku no por bai: ‘Duna plata i oro i otro regalo na e hendenan ku ta bai bèk pa traha Yerusalèm i su tèmpel.’

P’esei, nan a duna e israelitanan ku tabata bai bèk Yerusalèm hopi regalo. Tambe Siro a duna nan e kònchinan i kopanan ku Rei Nabukodonosor a kohe for di e tèmpel di Yehova ora el a destruí Yerusalèm. E israelitanan tabatin hopi kos pa hiba bèk.

Despues di rònt di kuater luna riba kaminda, e israelitanan a yega Yerusalèm nèt na ora. A kumpli eksaktamente 70 aña desde ku e stat a wòrdu destruí i e tera a keda kompletamente sin hende. Pero ounke e israelitanan a yega bèk den nan pais, nan a pasa den tempu difikultoso, segun ku nos lo mira.