Hesus A Lanta Hende Morto

E MUCHA muhé ku bo ta mira ei tin 12 aña di edat. Hesus ta tene su man, i su mama ku su tata ta pará serka dje. Bo sa pakiko nan ta asina felis? Laga nos mira.

E tata di e mucha muhé ta un hòmber importante yamá Jairo. Un dia su yu a bira malu, i nan a pon’é drumi. Pero e no a mehorá. El a sigui bira mas i mas malu. Jairo ku su esposa a bira hopi preokupá, pasobra a parse ku nan yu lo muri. Nan tabatin un yu so. P’esei Jairo a bai buska Hesus. El a tende di e milagernan ku Hesus tabata hasi.

Ora Jairo a haña Hesus, tabatin un multitut grandi rònt di dje. Pero Jairo a pasa dor di e multitut i a kai na pia di Hesus. El a bisa: ‘Mi yu ta hopi, hopi malu.’ El a roga: ‘Por fabor, bin kur’é.’ Hesus a bis’é ku e lo bini.

Miéntras ku nan tabata kana e multitut a sigui pusha pa yega mas serka. Diripiente Hesus a para. El a puntra: ‘Ken a mishi ku mi?’ Hesus a sinti poder sali for di dje, i p’esei el a sa ku un hende a mishi kuné. Pero ken? Esei ta un señora ku tabata hopi malu pa 12 aña kaba. El a yega i a mishi ku paña di Hesus, i a ser kurá!

Esei a hasi Jairo sintié mihó pasobra el a mira kon fásil tabata pa Hesus kura hende. Anto un mensahero a yega. El a bisa Jairo: ‘No molestiá Hesus mas. Bo yu a muri.’ Hesus a tende esei i a bisa Jairo: ‘No preokupá bo, lo e bira bon.’

Ora ku finalmente nan a yega na e kas di Jairo, e hendenan tabata yora di gran tristesa. Pero Hesus a bisa: ‘No yora. E yu no a muri. Ta drumi e ta drumi.’ Pero nan a hari i a tene mofa di Hesus, pasobra nan tabata sa ku el a muri.

Anto Hesus a bai ku e tata i mama di e mucha i tres apòstel den e kamber kaminda e mucha tabata drumí. El a tuma su man i a bisa: ‘Lanta!’ I el a bolbe na bida, manera bo ta mira ei. Anto el a lanta i a kana! P’esei su mama ku su tata ta asina felis.

Esei no ta e promé hende ku Hesus a lanta for di morto. Esun promé ku Beibel ta menshoná ta e yu hòmber di un biuda ku a biba den e stat Nain. Despues, Hesus a lanta Lázaro, ruman hòmber di Maria i Marta, tambe for di morto. Ora Hesus ta reina komo e rei di Dios, lo e trese bèk na bida masha hopi hende ku a muri. Nos por ta kontentu ku e lo hasi esei, no ta bèrdat?