Hesus Ta Stima Mucha

MIRA kon Hesus ta tene e mucha hòmber den su brasa. Bo por mira ku Hesus en bèrdat ta stima mucha. E hòmbernan ku ta wak ta su apòstelnan. Kiko Hesus ta bisando nan? Ban mira.

Hesus i su apòstelnan a kaba di bolbe di un biahe largu. Riba kaminda e apòstelnan a pleita ku otro. P’esei, despues ku nan a yega, Hesus a puntra nan: ‘Tokante kiko boso tabata pleita na kaminda?’ Pero Hesus tabata sa kaba tokante kiko nan tabata pleita. El a puntra nan pa mira si e apòstelnan lo a bis’é.

E apòstelnan no a kontestá, pasobra na kaminda nan tabata pleita tokante kua di nan ta esun di mas grandi. Algun apòstel tabata deseá di ta mas importante ku e otronan. Kon Hesus a bisa nan ku no ta bon pa deseá di ta esun di mas grandi?

El a yama e mucha hòmber i a pon’é dilanti nan tur. Anto el a bisa su disipelnan: ‘Mi ke pa boso komprondé esaki bon: A ménos ku boso kambia i bira manera mucha chikitu, boso nunka por drenta den e reino di Dios. E persona mas grandi den e reino ta esun ku ta bira manera e mucha aki.’ Bo sa pakiko Hesus a bisa esei?

Wèl, muchanan chikitu no ta preokupá pa ta mas grandi òf mas importante ku otro. P’esei e apòstelnan tabatin ku siña ta manera mucha chikitu den e sentido ei, i no pleita tokante ken ta mas grandi òf importante.

Tabatin otro okashonnan tambe ora Hesus a mustra kuantu e ta stima mucha. Un par di luna despues algun hende a trese nan yunan pa mira Hesus. E apòstelnan a purba stroba nan. Pero Hesus a bisa su apòstelnan: ‘Laga e muchanan bini serka mi i no stroba nan.’ Anto Hesus a brasa e muchanan i a bendishoná nan. No ta bon pa nos sa ku Hesus ta stima mucha?