E Moda di Siña di Hesus

UN DIA Hesus a bisa un hòmber ku e tin ku stima su próhimo. E hòmber a puntra Hesus: ‘Ken ta mi próhimo?’ Wèl, Hesus tabata sa kiko e hòmber tabata pensa. E hòmber tabata pensa ku ta hende di su mes rasa i religion so ta su próhimo. Laga nos mira loke Hesus a bis’é.

Tin bes Hesus tabata siña hende dor di konta un relato. El a hasi esei na e okashon aki tambe. El a konta un relato di un hudiu i un samaritano. Nos a siña kaba ku mayoria hudiu no tabata gusta samaritano. Wèl, esaki ta e relato di Hesus:

Un dia un hudiu tabata baha seru riba kaminda pa Jeriko. Pero bandidu a atak’é. Nan a hòrta su plaka i a gòlpié te ku nan a kasi mat’é.

Despues un saserdote hudiu a pasa riba e kaminda. El a mira e hòmber gòlpiá. Kiko bo ta kere ku el a hasi? Wèl, el a krusa bai na otro banda di e kaminda i a sigui bai. Anto un otro hende masha religioso a pasa. E tabata un levita. El a para? Nò, e tampoko no a para pa yuda e hòmber gòlpiá. Bo por mira e saserdote i e levita leu riba kaminda.

Pero mira ken ta einan serka e hòmber gòlpiá. Esei ta un samaritano. I el a yuda e hudiu. El a pone remedi riba su heridanan. Despues, el a hiba e hudiu un lugá kaminda e por a sosegá i bira bon.

Despues di a konta e relato, Hesus a puntra e hòmber ku a hasié e pregunta: ‘Kua di e tresnan a trata e hòmber gòlpiá komo su próhimo? E saserdote, e levita òf e samaritano?’

E hòmber a kontestá: ‘E samaritano. El a trata e hòmber gòlpiá ku bondat.’

Hesus a bisa: ‘Bo tin rason. P’esei, bai i trata otro hende meskos ku el a hasi.’

Bo no ta gusta e moda di siña di Hesus? Nos por siña mashá hopi kos importante si nos presta atenshon na loke Hesus a bisa den Beibel, no ta bèrdat?