Hesus Ta Bibu

BO SA ken e señora i e dos hòmbernan ta? E señora ta Maria Magdalena, un amiga di Hesus. I e dos hòmbernan na blanku bistí ta angel. Maria ta pará den porta di e graf kaminda nan a pone e kurpa di Hesus despues di su morto. Pero su kurpa no t’ei! Ken a bai kuné? Laga nos mira.

Despues di Hesus su morto, e saserdotenan a bisa Pilato: ‘Ora Hesus tabata na bida el a bisa ku lo e lanta despues di tres dia. P’esei, duna òrdu pa tene warda na e graf. E ora ei su disipelnan no por bai ku su kurpa i bisa ku el a lanta for di morto!’ Pilato a bisa e saserdotenan pa manda sòldá pa tene warda na e graf.

Pero mainta trempan riba e di tres dia despues di Hesus su morto, un angel di Yehova a presentá diripiente. El a hala e piedra dilanti di e graf un banda. E sòldánan a spantá asina tantu ku nan no por a ni move. Finalmente nan a wak den e graf i e kurpa no tabat’ei! Algun di e sòldánan a drenta e stat i a bisa e saserdotenan. Bo sa kiko e saserdotenan malbado a hasi? Nan a paga e sòldánan pa nan gaña. E saserdotenan a bisa e sòldánan: ‘Bisa ku e disipelnan di Hesus a bin den anochi, miéntras ku e sòldánan tabata drumí, i a bai ku e kurpa di Hesus.’

Miéntras tantu, algun amiga di Hesus a bini na e graf. Nan a keda masha sorprendé ora nan a hañ’é bashí! Diripiente dos angel den bistí briante a aparesé. Nan a puntra: ‘Pakiko boso ta buska Hesus aki? El a ser resusitá. Bai lihé i bisa su disipelnan.’ Esta duru nan a kore! Pero riba kaminda un hòmber a para nan. Bo sa ken esei tabata? Hesus mes! El a bisa: ‘Bai bisa mi disipelnan.’

Ora e hende muhénan a bisa e disipelnan ku Hesus ta bibu i ku nan a mir’é, e disipelnan a haña esei difísil pa kere. Pedro i Juan a kore bai na e graf pa nan mes wak, pero e graf tabata bashí! Despues ku Pedro i Juan a bai, Maria Magdalena a keda atras. E ora ei el a wak den e graf i a mira e dos angelnan.

Bo sa kiko a sosodé ku e kurpa di Hesus? Dios a hasié disparsé. Dios no a resusitá Hesus den e mesun kurpa karnal ku e tabatin ora el a muri. El a duna Hesus un kurpa spiritual nobo, meskos ku angelnan den shelu tin. Pero, p’e mustra su disipelnan ku e ta bibu, Hesus por a aparesé den un kurpa ku hende por mira, segun ku nos lo bai siña despues.