Den un Sala Será

DESPUES ku Pedro i Juan a bandoná e graf kaminda e kurpa di Hesus tabata, Maria a keda ei su so. El a kuminsá yora. Anto el a sak i a wak den e graf, manera nos a mira riba e plachi promé. El a mira dos angel eiden! Nan a puntr’é: ‘Pakiko bo ta yora?’

Maria a bisa: ‘Nan a hiba mi Señor i mi no sa unda nan a pon’é.’ Despues Maria a drei i a mira un hòmber. E hòmber a puntra Maria: ‘Ken bo ta buska?’

Maria a pensa ku e hòmber tabata e hardinero i ku ta e por a bai ku e kurpa di Hesus. P’esei el a bisa: ‘Si bo a bai kuné, bisa mi unda bo a pon’é.’ Pero e hòmber tabata Hesus mes. El a bisti un kurpa ku Maria no a rekonosé. Pero ora Hesus a yama Maria na su nòmber, Maria a haña sa ku ta Hesus. El a kore bai bisa e disipelnan: ‘Mi a mira Señor!’

Mas lat durante dia, ora dos disipel tabata kana pa bai n’e pueblo Emaus, un hòmber a djòin nan. E disipelnan tabata masha tristu debí n’e morto di Hesus. Pero riba kaminda e hòmber a splika nan hopi kos di Beibel ku a pone nan sinti mihó. Finalmente, ora nan a sinta pa kome, e disipelnan a haña sa ku e hòmber ta Hesus. Anto Hesus a disparsé i e dos disipelnan a bai bèk lihé te na Yerusalèm pa bisa e apòstelnan di dje.

Durante tur esei, Hesus a aparesé na Pedro tambe. E otronan a keda emoshoná ora nan a tende esei. Anto e dos disipelnan a yega Yerusalèm i haña e apòstelnan. Nan a bisa e apòstelnan kon Hesus a aparesé na nan tambe riba kaminda. I nèt durante e kòmbersashon, bo sa ki kos asombroso a sosodé?

Wak e plachi. Hesus a aparesé ei mes den e sala, ounke e porta tabata será. Ki felis e disipelnan a keda! Ki un okashon emoshonante! Bo sa kuantu biaha kaba Hesus a aparesé na su siguidónan? Bo a konta sinku bes?

Apòstel Tomas no tabata ku nan ora Hesus a aparesé. P’esei e disipelnan a bis’é: ‘Nos a mira Señor!’ Pero Tomas a bisa ku e mes tin ku mira Hesus pa e kere. Wèl, despues di ocho dia e disipelnan tabata huntu atrobe den un sala será i e biaha aki Tomas tambe tabata huntu ku nan. Diripiente Hesus a aparesé den e sala. Awor sí Tomas a kere.