Hesus Ta Bolbe na Shelu

DIANAN a pasa i Hesus a aparesé na su disipelnan hopi biaha. Un biaha rònt di 500 disipel a mir’é. Ora el a aparesé na nan, bo sa tokante kiko Hesus a papia ku nan? Di e reino di Dios. Yehova a manda Hesus na mundu pa e siña hende tokante e Reino. I el a sigui hasi esei asta despues ku Dios a lant’é for di morto.

Bo ta kòrda kiko e reino di Dios ta? Sí, e Reino ta un berdadero gobièrnu di Dios den shelu, i Dios a skohe Hesus pa ser rei. Manera nos a siña, Hesus a mustra kaba ku e lo ta un rei maravioso, dor ku el a duna kuminda na hende ku tabatin hamber, a kura hende enfermo i asta a lanta hende morto na bida!

P’esei, ora Hesus ta reina komo rei den shelu pa mil aña, kon tera lo ta? Sí, henter mundu lo bira un paradeis bunita. Lo no tin guera mas, ni krímen, ni malesa i ni sikiera morto. Nos sa ku esei ta sierto pasobra Dios a traha tera p’e ta un paradeis pa hende gosa di dje. P’esei mes el a traha e hòfi di Edén na prinsipio. I Hesus lo perkurá pa e boluntat di Dios ser kumplí finalmente.

Tempu a yega pa Hesus bolbe na shelu. Hesus a aparesé na su disipelnan pa 40 dia. P’esei nan a keda sigur ku Hesus ta bibu atrobe. Pero promé ku el a bai laga su disipelnan, el a bisa nan: ‘Keda na Yerusalèm te ora boso risibí spiritu santu.’ Spiritu santu ta e forsa aktivo di Dios, e ta manera bientu ku ta supla. E spiritu ei lo yuda Hesus su siguidónan hasi Dios su boluntat. Finalmente Hesus a bisa nan: ‘Boso mester prediká tokante mi te na e parti mas leu di tera.’

Despues ku Hesus a bisa esei, un kos asombroso a sosodé. El a kuminsá subi na shelu, manera bo ta mira ei. Anto un nubia a tap’é i e disipelnan no a mira Hesus mas. Hesus a bai shelu i for di aya riba el a kuminsá goberná riba su siguidónan na tera.