Riba Kaminda Pa Damasko

BO SA ta ken esun abou na suela ta? Esei ta Saulo. Kòrda, e ta esun ku a kuida mantel di e hòmbernan ku a piedra Esteban. Mira e lus briante ei! Kiko a sosodé?

Despues di morto di Esteban, Saulo a hiba delantera buskando e siguidónan di Hesus pa hasi nan daño. El a bai di un kas pa otro i a saka nan i enkarselá nan. Hopi di e disipelnan a hui bai otro stat i a sigui deklará e “bon nobo.” Pero Saulo a bai na e otro statnan pa buska e siguidónan di Hesus. Awor e ta bai Damasko. Pero riba kaminda e kos asombroso aki a sosodé:

Diripiente un lus for di shelu a lusa rònt di Saulo. El a kai na suela, manera nos ta mira aki. Anto un stèm a yama: ‘Saulo, Saulo! Pakiko bo ta hasi mi daño?’ E hòmbernan huntu ku Saulo ta mira e lus i ta tende e zonidu di e stèm, pero nan no ta komprondé kiko e ta bisa.

Saulo ta puntra: ‘Ken bo ta Señor?’

E stèm ta kontestá: ‘Mi ta Hesus, esun ku bo ta hasi daño.’ Hesus a bisa esei pasobra ora Saulo tabata hasi daño na e siguidónan di Hesus, Hesus a sinti komo si fuera ta na e mes Saulo a hasi daño.

Awor Saulo ta puntra: ‘Kiko mi mester hasi, Señor?’

Hesus ta bisa: ‘Lanta i bai Damasko i aya nan lo bisa bo kiko bo mester hasi.’ Ora Saulo a lanta i a habri su wowo, e no por a mira nada. E tabata siegu! P’esei su kompañeronan a ten’é na su man i a gui’é te na Damasko.

Awor Hesus a papia ku un di su disipelnan na Damasko, bisando: ‘Lanta, Ananias. Bai na e kaya yamá Stret. Puntra na kas di Hudas pa un hòmber ku yama Saulo. Mi a skoh’é pa e bira un sirbidó spesial di mi.’

Ananias a obedesé. Ora el a kontra ku Saulo, el a pone man riba dje i a bisa: ‘Señor a manda mi pa bo por mira atrobe i wòrdu yená ku spiritu santu.’ Mesora algu ku tabata parse skama a kai for di wowo di Saulo, i e por a mira atrobe.

Hesus a usa Saulo na un manera poderoso pa prediká na hende di hopi nashon. El a bira konosí komo apòstel Pablo i nos lo siña hopi mas di dje. Pero promé, ban mira loke Dios a manda Pedro hasi.