Pedro Ta Bishitá Cornelio

EI NOS ta mira apòstel Pedro pará, i su tras algun amigu di dje. Pero pakiko e hòmber ta na rudia dilanti Pedro? E mag hasi esei? Bo sa ken e ta?

E hòmber ta Cornelio, un ofisial di ehérsito romano. Cornelio no konosé Pedro, pero el a ser mandá pa invitá Pedro na su kas. Laga nos mira kon esei a sosodé.

E promé siguidónan di Hesus tabata hudiu, pero Cornelio no tabata hudiu. Tòg el a stima Dios, a hasi orashon na dje i a trata hende ku bondat. Wèl, un atardi un angel a aparesé na dje i a bis’é: ‘Dios ta kontentu ku bo, i e lo kontestá bo orashonnan. Manda algun hende serka un sierto hòmber yamá Pedro. E ta kedando na Jope den kas di Simon, kende ta biba kant’i laman.’

Wèl, mesora Cornelio a manda algun hòmber bai buska Pedro. Su siguiente dia, ora e hòmbernan tabata yegando Jope, Pedro tabata riba e dak plat di kas di Simon. Ei Dios a duna Pedro un vishon di un laken grandi bahando for di shelu. Tabatin tur sorto di bestia den e laken. Segun e lei di Dios, e bestianan aki tabata impuru pa kome pero tòg un stèm a bisa: ‘Pedro, lanta. Mata i kome.’

Pedro a kontestá: ‘Nò! Nunka mi a kome kos impuru.’ Pero e bos a bisa Pedro: ‘No yama impuru loke Dios ta yama puru awor.’ Esei a sosodé tres bes. Miéntras ku Pedro tabata pensando kiko esei ke men, e hòmbernan ku Cornelio a manda a yega na e kas i a puntra pa Pedro.

Pedro a baha bai abou i a bisa: ‘Ami ta esun ku boso ta buska. Pakiko boso a bin?’ Despues ku e hòmbernan a splika ku un angel a bisa Cornelio pa invitá Pedro na su kas, Pedro a kumbiní pa bai ku nan. E dia siguiente Pedro i algun amigu a sali pa bai bishitá Cornelio na Cesarea.

Cornelio a reuní su famia- i amigunan íntimo. Ora Pedro a yega, Cornelio a risibié i a kai na rudia dilanti di Pedro, manera bo ta mira ei. Pero Pedro a bisa: ‘Lanta para, ta djis un hende mi tambe ta.’ Sí, Beibel ta bisa ku no ta bon pa bùig i adorá hende. Nos tin ku adorá Yehova so.

Awor Pedro a prediká na e hendenan reuní. El a bisa: ‘Mi ta mira ku Dios ta aseptá tur hende ku ke sirbié.’ I miéntras e tabata papia, Dios a manda su spiritu santu i e hendenan a kuminsá papia diferente idioma. E disipelnan hudiu ku a bin ku Pedro a keda asombrá, pasobra nan a kere ku Dios ta faboresé hudiu so. Pues, esei a siña nan ku Dios no ta konsiderá hende di un rasa mihó òf mas importante ku hende di otro rasa. Esei no ta un bon kos pa nos tur kòrda?