Timoteo—Ayudante di Pablo

E HÓBEN ku bo ta mira ei huntu ku apòstel Pablo ta Timoteo. Timoteo ta biba ku su famia na Listra. Su mama yama Eunise i su wela Loida.

Esaki ta e di tres biaha ku Pablo a bishitá Listra. Rònt di un aña promé ku esei, Pablo i Barnabas a yega ei pa promé bes, pa prediká. I awor Pablo a bolbe atrobe ku su amigu Silas.

Bo sa kiko Pablo ta bisando Timoteo? E ta puntr’é: ‘Bo ke kompañá ami ku Silas? Bo por yuda nos prediká na hende na lugánan leu.’

Timoteo a kontestá: ‘Sí, mi tin gana di bai.’ Pronto despues Timoteo a bandoná su famia i a bai ku Pablo i Silas. Promé ku nos lesa tokante nan biahe, laga nos mira kiko Pablo a pasa aden. Rònt di 17 aña a pasa desde ku Hesus a aparesé na dje riba kaminda pa Damasko.

Kòrda ku Pablo a bai Damasko pa persiguí disipel di Hesus, pero awor e mes ta un disipel! Despues algun enemigu a plania pa mata Pablo pasobra nan no tabata gusta pa e siña tokante Hesus. Pero e disipelnan a yuda Pablo hui. Nan a pon’é den un makutu i a bah’é pafó di muraya di e stat.

Despues Pablo a bai na Antiokia pa prediká. Aki ta kaminda nan a yama siguidónan di Hesus kristian pa promé bes. Anto Pablo i Barnabas a ser mandá for di Antiokia pa bai prediká den paisnan mas leu. Un di e statnan ku nan a bishitá ta Listra, kaminda Timoteo tabata biba.

Awor, rònt di un aña despues, Pablo a bolbe na Listra durante su segundo biahe. Ora ku Timoteo a bai ku Pablo i Silas, bo sa unda nan a bai? Wak e mapa i laga nos siña e nòmber di algun di e lugánan.

Promé, nan a bai Ikonio ei serka, i despues nan a bai un otro stat, yamá Antiokia. Despues nan a bai Troas, i despues na Filipos, Tesalónika i Berea. Bo ta mira Atenas riba e mapa? Pablo a prediká ei. Despues nan a pasa un aña i mei predikando na Korinto. Na final nan a hasi un bishita kòrtiku na Efeso. Despues nan a bolbe bai Cesarea ku barku, i a sigui biaha te na Antiokia, i Pablo a keda ei.

Asina Timoteo a biaha sientos i sientos di kilometer yudando Pablo prediká e “bon nobo” i establesé hopi kongregashon kristian. Ora bo bira mas grandi, lo bo bira un fiel sirbidó di Dios meskos ku Timoteo?