Un Paradeis Nobo Riba Tera

MIRA e palunan grandi, e flornan bunita i serunan haltu ei. E lugá ei no ta bunita? Mira kon e biná ta tuma kuminda for di man di e mucha hòmber. I wak tambe e leonnan i kabainan aya den sabana. Bo no tin gana di biba den un kas na un lugá asina?

Dios ke pa bo biba pa semper riba tera den un paradeis. I e no ke pa bo sufri di e dolónan ku hende tin awe. Esaki ta e promesa di Beibel pa hende ku lo biba den e paradeis nobo: ‘Dios lo ta ku nan. Hende lo no muri mas ni yora ni sinti doló. E kosnan bieu a pasa kaba.’

Hesus lo pèrkurá pa e kambionan maravioso ei bini. Bo sa na ki tempu? Sí, despues ku e hasi tera limpi di tur maldat i tur mal hende. Kòrda ku ora Hesus tabata riba tera el a kura hende di tur klase di malesa, i asta a resusitá hende for di morto. Hesus a hasi esei pa mustra kiko e ta bai hasi riba henter e tera ora e bira Rei di e reino di Dios.

Imaginá bo kon maravioso e paradeis terenal nobo lo ta! Hesus, huntu ku esnan ku e skohe, lo reina den shelu. Nan lo kuida tur hende riba tera i pèrkurá pa nan ta felis. Laga nos mira kiko nos mester hasi pa Dios duna nos bida eterno den su paradeis nobo.