Kon Nos Por Biba Pa Semper

BO SA kiko e mucha muhé chikitu i su amigunan ta lesa? Sí, e mesun buki aki—Mi Buki di Relato Bíbliko. I nan ta lesa e mesun relato ku bo ta lesa—“Kon nos por biba pa semper.”

Bo sa kiko nan ta siña? Di promé, nan ta siña ku nos tin ku konosé Yehova i su Yu Hesus pa nos biba pa semper. Beibel ta bisa: ‘Esaki ta e manera pa biba pa semper. Siña konosé e úniko Dios berdadero, i su Yu ku el a manda na tera, Hesukristu.’

Kon nos por siña di Yehova Dios i di su Yu Hesus? Un manera ta di lesa Mi Buki di Relato Bíbliko for di kuminsamentu te final. E ta siña nos hopi kos di Yehova i di Hesus, no ta bèrdat? I e ta siña nos hopi di loke nan a hasi kaba i loke nan lo hasi ainda. Pero nos tin ku hasi mas ku lesa e buki so.

Bo ta mira e otro buki na suela? Esei ta Beibel. Laga un hende lesa pa bo e partinan di Beibel for di kua e relatonan ku tin den e buki aki ta tumá. Beibel ta duna nos tur informashon ku nos tin mester pa nos tur por sirbi Yehova na e manera korekto i haña bida eterno. P’esei nos mester tin e kustumber di studia Beibel regularmente.

Pero siña so di Yehova Dios i di Hesukristu no ta basta. Nos por tin mashá konosementu di nan i di nan siñansanan, i tòg no gana bida eterno. Bo sa kiko mas nos mester hasi?

Nos tin ku biba di akuerdo ku loke nos ta siña tambe. Bo ta kòrda Hudas Iskariote? E tabata un di e diesdosnan ku Hesus a skohe komo su apòstel. Hudas tabatin hopi konosementu di Yehova i di Hesus. Pero kiko a pas’é? Despues di poko tempu el a bira egoista i a traishoná Hesus pa 30 pida plata. P’esei Hudas lo no risibí bida eterno.

Bo ta kòrda Gehazi, e hòmber ku nos a siña di dje den Relato 69? E kier a haña paña i plaka ku no tabata di dje. P’esei, el a gaña pa haña nan. Pero Yehova a kastig’é. I Dios lo kastigá nos tambe si nos no obedesé su lei.

Pero tabatin hopi bon hende ku semper a sirbi Yehova fielmente. Nos ke bira manera nan, no ta bèrdat? E mucha Samuel ta un bon ehèmpel pa nos sigui. Bo ta kòrda ku nos a lesa den Relato 55 ku Samuel tabatin kuater òf sinku aña so ora el a kuminsá sirbi Yehova den e tabernakel. Pues, no ta importá kon chikitu bo ta, bo no ta demasiado yòn pa sirbi Yehova.

Naturalmente esun ku nos tur ke sigui ta Hesukristu. Segun Relato 87, ounke Hesus tabata mucha, e tabata den tèmpel papiando ku otronan tokante su Tata selestial. Laga nos sigui su ehèmpel. Laga nos bisa mas tantu hende posibel tokante Yehova nos Dios maravioso i su Yu Hesukristu. Si nos hasi e kosnan aki, anto nos por biba pa semper den e paradeis nobo di Dios riba tera.