Bo Mester Kere den Dje?

ABO TA kere den Trinidad? Mayoria hende den cristiandad ta kere aden. Despues di tur cos, e ta e doctrina central di e iglesianan pa siglonan.

En bista di esaki, lo bo por pensa cu lo no por tin duda encuanto dje. Pero tin, i últimamente asta algun di su apoyadornan a haci e controversia mas grandi.

Pakico un tópico asina mester ta mas cu un interes pasahero? Pasobra Jesus mes a bisa: “Bida eterno ta esaki: pa conocé bo, e único Dios berdadero, i Jesucristo kende bo a manda.” P’esei henter nos futuro ta dependé riba nos conociendo e berdadero naturaleza di Dios, i esei ta nificá yega na e raiz dje controversia di Trinidad. P’esei, pakico no examin’é pa bo mes?—Juan 17:3, Jerusalem Bible (JB), católico.

Ta existí varios concepto di Trinidad. Pero generalmente e siñanza di Trinidad ta cu den e Divinidad tin tres persona, Tata, Yu i Spiritu Santo; pero toch, hunto nan ta un solo Dios. E doctrina ta bisa cu nan tres ta coigual, todopoderoso i cu no a ser creá, i cu nan a existí eternamente den e Divinidad.

Otronan, sin embargo, ta bisa cu e doctrina di Trinidad ta falso, cu Dios Todopoderoso ta para su só como un ser separá, eterno i omnipotente. Nan ta bisa cu Jesus den su existencia prehumano tabata, mescos cu e angelnan, un persona spiritual separá creá pa Dios, i pa e motibo aki e mester tabatin un principio. Nan ta siña cu Jesus nunca tabata igual cu Dios Todopoderoso den ningun sentido; e semper tabata sometí na Dios i ta te ainda. Nan ta kere tambe cu e spiritu santo no ta un persona pero Dios su spiritu, su forza activo.

Apoyadornan di Trinidad ta bisa cu e ta fundá no solamente riba tradicion religioso pero tambe riba e Bijbel. Críticonan dje doctrina ta bisa cu e no ta un siñanza bíblico, i un fuente di historia asta ta declará: “E orígen di [Trinidad] ta completamente pagano.”—The Paganism in Our Christianity.

Si e siñanza di Trinidad ta berdad, e ta degradá Jesus bisando cu e nunca tabata igual cu Dios como parti di un Divinidad. Pero si e siñanza di Trinidad ta falso, e ta degradá Dios Todopoderoso yamando cualkier persona su igual, i peor ainda yamando Maria e “Mama di Dios.” Si Trinidad ta falso, e ta desonrá Dios bisando, manera a ser mencioná den e buki Catholicism: “Aménos cu [hende] warda e Fe aki completo i sin mancha, sin duda [nan] lo perecé eternamente. I e Fe Católico ta esaki: nos ta adorá un Dios den Trinidad.”

Tin bon motibonan anto, pakico lo bo mester kier sa e berdad encuanto Trinidad. Pero promé cu bo examiná su orígen i su pretencion di ta berdad, lo ta bon pa definí e doctrina aki mas specíficamente. Kico, exactamente, ta Trinidad? Con su apoyadornan ta splik’é?

[Plachi na página 2]

Robez: Escultura egipcio di e segundo milenio (P.E.C.) Trinidad di Amon-Ra, Ramses II i Mut. Drechi: Escultura trinitario di siglo diezcuater (E.C.) di Jesucristo, e Tata, i e spiritu santo. Ripará, tres persona pero solamente cuater pia.