Capítulo 8

Con mi por haya berdadero amigo?

“MI a bai scol den e districto aki pa ocho aña, pero den tur e tempo ei mi nunca a logra haya sikiera un amigo! Ni sikiera un.” Asina a lamenta un hoven yamá Ronnie. I kizás tabatin tempo cu abo di igual manera a kere cu bo a malográ den ceramento di amistad. Pero, exactamente kico ta berdadero amigo? I con hende por logra haya amigo?

Un proverbio ta bisa: “Un amigo ta stima na tur tempo, i un ruman ta nací pa tempo desfavorable.” (Proverbio 17:17, Version Moderna) Pero amistad kier men mas cu un hende pa scuchábo deshogábo. Segun un hovencita yama Marvia: “Tin bez cu hende yamá amiga ta mirábo hayábo den dificultad, anto bisa: ‘Mi a mirábo riba e camina ei, pero mi tabatin miedu di bisábo.’ Pero, ora un berdadero amigo ta mirábo bai den mal camina, lo e purba di spiertábo promé cu ta laat—aunque e sa cu kizás lo bo no gusta loke e ta bisábo.”

Bo ta permiti bo orguyo hacíbo rechaza hende cu ta suficiente interesá den bo pa bisábo e berdad? Proverbio 27:6 ta bisa: “Bo tin cu pone mas confianza den golpi di hende cu ta stimábo cu den zunchi abundante di hende cu ta odiábo.” (Byington) Hende cu tin pensamento recto i ta papia recto, pues, ta e clase di hende cu bo mester deseá como amigo.

Amigo falso compará cu amigo berdadero

“Mi bida ta duna prueba cu tur ‘amigo’ no ta yudábo cultiva bon calidad,” segun Patricia di 23 aña di edad. Como tiener, Patricia a keda obligá di hui di cas. Sin embargo, dos Testigo di Jehova a bira amigo di dje—Mito i su esposa, Loíta. Nan a cuminza un estudio bíblico cu Patricia. “E lunanan cu mi a pasa cu nan tabata yená cu berdadero gozo, contentamento i paz,” segun Patricia. Sin embargo, el a decidi di bai cu algun hoven cu el a conoce—i a bandona Mito i Loíta.

Patricia a corda: “Mi a siña hopi cos for di mi ‘amiganan’ nobo—hortamento di stereo, cambiamento di cheque falso pa placa, humamento di marijuana i, finalmente con pa mantene un drogadiccion di $200 pa dia.” Na edad di 18 aña el a yega di conoce un hoven yamá Rey cu a ofrecele tur droga cu e por usa—gratis. “Mi a kere cu tur mi problema a pasa. Nunca mas mi tabatin cu horta i defrauda,” segun Patricia. Sin embargo, Rey a introducié na prostitucion. Despues Patricia a hui dje stad—i di su “amigonan” di mundo.

Den su otro sitio, dos Testigo di Jehova a bishita Patricia un dia. El a bisa: “Lágrima di alegría a yena mi wowo ora mi a braza e dos dama sorprendí. Mi a yega di desprecia e hipocresía di mi ‘amigonan’ di antes, pero tabatin ei dos hende berdaderamente sincero.” Patricia a sigi su estudio di Bijbel.

Sin embargo, no tabata fácil pe conforma su bida cu e camina di Dios. Tabata specialmente dificultoso pe bandona humamento. Pero, un amiga testigo a consehé: “En bez di haci oracion i pidi pordón despues di a cai, pakico no reza di antemano i pidi fortaleza ora bo ta sinti impulso di huma?” Segun Patricia: “E sugerencia bondadoso i práctico a logra . . . . Pe promé bez den hopi aña mi a sintími limpi padén i tabata sa kico kier men tene respet propio.”

Experencia di Patricia ta duna énfasis ne berdad dje palabra bíblico den Proverbio 13:20: “Ken cu sa camna cu hende sabí lo bira sabí, pero ken cu tin tratamento cu hende estúpido lo pasa malu.” Segun Patricia: “Si mi solamente a mantene mi amistad cu e hendenan cu a stima Dios, mi por a evita tur loke awor ta un memoria mahós.”

Hayando amigo

Unda bo por haya amigo cu ta ‘stima Dios’? Den e congregacion cristian. Busca hovenan cu no solamente ta bisa cu nan tin fe sino també tin obra pa duna prueba di nan fe i debocion. (Compara cu Santiago 2:26.) Si hoven asina ta difícil pa haya, cera conocí cu algun hende cristian cu ta mas bieu cu bo. Edad no tin cu stroba amistad. E Bijbel ta bísanos dje modelo di amistad entre David i Jonatán—i Jonatán tabatin suficiente edad pa ser e tata di David!—1 Samuel 18:1.

Pero, con bo por cuminza un amistad asina?

Un interés activo den otro hende

Jesucristo a edifica amistad cu tabata asina fuerte cu amigo di dje a keda dispuesto pa muri pe. Pakico? Entre otro cosnan, Jesus tabata interesá den hende. El a haci esfuerzo pa conocénan i yúdanan. El a ‘deseá’ di enbolbele. (Mateo 8:3) Berdaderamente, teniendo interés den otro hende ta e promé paso pa cera amistad.

Por ehempel, un hoven yamá David, tabatin bon éxito haciendo amigo pasobra “e tabatin berdadero amor pa hende i a mustra interés activo den otronan.” El a bisa: “Un cos mashá importante ta di conoce e nomber dje persona. Hopi bez otronan ta keda impresioná pasobra bo ta suficiente interesá pa corda nan nomber. P’es motibo nan por contábo un experencia of problema i un amistad ta cuminza crece.”

Esei no kier men cu bo tin cu ser un labiador cu sa braza tur hende. Jesus tabata “humilde di curazón,” i no a haci exhibicion i piquete. (Mateo 11:28, 29) Loke ta atrae otro hende ta interés sincero den nan. Hopi bez cos di mas senciyo, tal como come hunto of yuda amigo haci trabao, ta sirbi pa cera amistad mas profundo.

“E manera cu bo ta scucha”

Jesus a recomenda: “Presta atencion ne manera cu boso ta scucha.” (Lucas 8:18) Aunque e tabata pensa dje balor di scucha ne palabra di Dios, e principio ta aplica bon den desaroyo di relacion. Sea un bon scuchador, esei ta vital pa edifica un amistad.

Si nos ta berdaderamente interesá den loke otro hende ta bisa, generalmente esei ta atraénan na nos. Pero esei ta exigi pa bo ‘vigila cu interés personal no bo mes asuntonan so [kizás loke bo so kier bisa], sino també cu interés personal den asunto di otro hende.’—Filipense 2:4.

Sea leal

Jesus a pega na su amigonan. El a “stímanan te ne fin.” (Juan 13:1) Un hoven yamá Gomer ta trata su amigonan mescos: “E calidad principal di un amigo ta su lealtad. E realmente lo para firme cu bo den tempo dificultoso? Mi amigo i mi a defende otro ora otronan a cuminza menospreciános. Nos realmente a para firme pa otro—pero solamente si nos tabatin razón.”

Sin embargo, no ta nada pa amigo falso puñalábo den lomba den hipocresía. Segun Proverbio 18:24: “Ta existi compañé cu ta keda dispuesto di kibra otro na pida pida.” Bo ta “kibra” e bon nomber di un amigo participando den redashi malicioso, of bo ta defendele lealmente?

Expresa bo sintimento

Jesus també a encariñé cu otronan revelando su sintimento di mas profundo. Tabatin bez cu el a duna di conoce cu el a “sinti compasion,” “a sinti amor,” of a keda “profundamente afligí.” Na por lo menos un ocasion e asta a “entrega na lágrima.” Jesus no a sinti bergüenza di habri su curazón pa hende cu el a confia.—Mateo 9:36; 26:38; Marco 10:21; Juan 11:35.

Esei, naturalmente, no kier men cu bo mester expresa emocion pa tur hende cu bo ta encontra! Pero, bo por keda francu cu tur hende. I mientras mas bo conoce i ta confia hende, mas bo por revela poco poco bo sintimento di mas profundo. Ne mesun tempo, siñamento di compasion i “cariño” pa otro hende ta necesario pa un amistad cu un nificacion.—1 Pedro 3:8.

No spera perfeccion

Asta ora un amistad ta cuminza bon, no spera perfeccion. “Nos tur ta haci equibocacion di tur sorto di manera, pero hende cu ta bisa cu nan nunca ta papia malu por considera cu nan ta perfecto.” (Santiago 3:2, Phillips) Además, amistad ta costa algo—tempo i emocion. Un hoven yamá Presley a bisa: “Bo tin cu keda dispuesto di duna, esei ta un parti grandi di amistad. Bo tin bo mes idea tocante cierto cosnan pero bo tin cu keda dispuesto pa haci lugar pa idea i opinion di bo amigonan.”

Sin embargo, e prijs di amistad no por ta compará cu e prijs di no stima—un bida di soledad den bashí. Pues, haci amigo pa bo mes. (Compara cu Lucas 16:9.) Duna di bo mes. Scucha otronan i mustra berdadero interés den nan. Mescos cu Jesus, e ora ei bo por conoce varios hende di locual bo por bisa, “Boso ta mi amigonan.”—Juan 15:14.

Pregunta pa consideracion Capítulo 8

◻ Con bo por reconoce un berdadero amigo? Cua clase di amigo ta falso?

◻ Unda bo por busca pa haya amigo? Nan tin cu ser semper di bo edad?

◻ Kico bo mester haci si un amigo tin problema serio?

◻ Menciona cuater manera pa haci amigo.

[Komentario na página 66]

“Mi a siña hopi cos for di mi ‘amigonan’ nobo—hortamento di stereo, cambiamento di cheque falso pa placa, humamento di marijuana i, finalmente, con pa mantene un drogadiccion di $200 pa dia”

[Kuadro na páginas 68, 69]

Mi mester denuncia mi amigo?

Si bo a haya sa cu un amigo tabata hunga cu droga, tabata experimenta cu sexo, tabata defrauda, of tabata horta—lo bo bisa un hende responsabel tocante dje? Mayor parti di hovenan no ta haci esei, sigiendo un ley straño di silencio cu hopi bez ta existi den hovenan.

Algun tin miedu cu nan lo ser yamá “traidor.” Lealtad falso ta un otro motibo. Mirando disiplina como algo dañoso of perhudicial, nan ta imaginánan cu nan ta haci nan amigo un fabor door di tapa su problema. Además, kibramento dje ley di silencio ta exponébo na mofa di otro hovenan i ne posibilidad di perde amistad.

No obstante, ora un hoven yamá Lee a tende cu su mihor amigo, Cris, tabata huma, el a decidi di haci algo. Segun Lee: “Mi concenshi tabata remordémi pasobra mi tabata sa cu mi tabatin cu bisa autoridad!” Un hoven den tempo bíblico a enfrenta un situacion similar. “Josef, ora e tabatin diesiete aña di edad, tabata atende ne carnénan hunto cu su rumanan . . . Pues, Josef a hiba un mal informe tocante nan na nan tata.” (Génesis 37:2) Josef tabata sa cu si el a warda silencio, e bienestar spiritual di su rumanan lo ta den peliger.

Picá ta un forza cu ta destrui i ta corrumpi. Amenos cu un amigo cu ta haci fout ta recibi yudanza—kizás den e forma di disiplina bíblico firme—e por cai mas leu ainda den maldad. (Eclesiastés 8:11) P’sei, tapamento di malecho di amigo no solamente ta perhudicial sino també por haci malu irreparable.

E Bijbel, pues, ta conseha: “Rumanan, aunque un homber ta dal un paso falso promé cu e sa, boso cu tin calificacion spiritual purba di reahusta tal hende cu un spiritu di suavedad.” (Galatio 6:1) Kizás bo ta kere cu bo no tin e calificacion spiritual pa reahusta un amigo cu a dwal. Pero no ta razonabel pa percura pa informa un ruman cu sí ta capaz pa yuda?

Pues, ta necesario pa bo acerca bo amigo i saca na cla su falta. (Compara cu Mateo 18:15.) Esei ta exigi curashi i franqueza di bo parti. Sea firme, dunando evidencia convenciente di su picá, mencionando específicamente loke bo sa i con bo a yega di sa. (Compara cu Juan 16:8.) No priminti cu lo bo no bisa otro, pasobra promesa asina ta inválido den bista di Dios, cu ta condena tapamento di malecho.—Proverbio 28:13.

Kizás a sosode un malcomprendimento. (Proverbio 18:13) Pero, si no ta asina, i esei realmente ta enbolbe malecho, kizás bo amigo ta sinti alivio ya cu su problema a sali na cla. Sea bon scuchador. (Santiago 1:19) No sofoca expresion liber di su sintimento sacando expresion di huzgamento tal como “Bo no mag . . . ” of expresion di sorpresa, tal como, “Con bo por!” Mustra compasion i sinti loke bo amigo ta sinti.—1 Pedro 3:8.

Hopi bez e situacion ta exigi mas yudanza cu bo ta capaz pa duna. Insisti, anto, pa bo amigo confesa e malecho na su mayornan of na otro adulto responsabel. I, kico lo bo haci si bo amigo ta nenga di haci esei? Duné di comprende cu si e no rectifica e asunto den un tempo razonabel, abo, como su berdadero amigo, ta keda obligá di bai cerca otro hende den su interés.—Proverbio 17:17.

Na principio kizás bo amigo no ta comprende pakico bo ta haci esei. Kizás e ta bira molestiá i den rabia ta termina boso amistad. Pero, segun Lee: “Mi sa cu mi a haci e cos correcto bisando esnan responsabel. Mi concenshi a sintié tanto mas mihor pasobra Cris a haya e yudanza cu e mesté. Despues el a bini i a bisámi cu e no a rabia cu mi pa loke mi a haci i esei també a trankilizámi.”

Si bo conocirnan ta sigi carga rencor debí na bo accion balente, ta keda bisto cu nan nunca tabata berdadero amigo desde principio. Pero, bo tin e satisfaccion di sa cu bo a duna prueba di bo lealtad na Dios i cu bo a mustra cu bo ta un berdadero amigo.

[Plachi na página 67]

Bo tin dificultad haciendo amigo?

[Plachi na página 70]

Mustrando interés den otro hende ta clave pa cuminza amistad